銀行閑談 (144) — 匯豐 EveryMile卡 (上篇) — 「無得飛換 Miles 嚟把 L 咩」
匯豐好耐無出新卡，對上一張旗艦卡 Red Card 已經係 2019 Q3 既事，都真係好耐咯，仲有上次個宣傳明顯無今次咁浩大，所以話匯豐今次真係隆重其事架！
上次 Red Card 我用「盡顯霸氣」四個字嚟總結整張 Red Card，4% 網上簽賬、無回贈上限 (而家係每月上限 $25,000)、無最低簽賬要求、毋須登記、永久免年費，真係技術性擊倒晒當時所有聲稱玩網購既對手，從此江湖都無咩邊張卡夠膽話自己玩網購咯。
Medium 傳送門：信用卡閑談(20) — 匯豐 Red Card 如何盡顯霸氣 Patreon 傳送門：信用卡閑談(20) — 匯豐 Red Card 如何盡顯霸氣
今次呢張 EveryMile 卡都真係有排講，暫時打算分 3 篇寫，中篇同下篇會講吓呢張卡著唔著數、有無誠意、有無霸氣、有咩歷史意義、張卡喺匯豐整個 card business 既大盤上面既定位、匯豐又有咩願望等等，呢篇上篇就剩係想回應一個 point：
無得飛換 Miles 嚟把 L 咩！
我見唔少網民甚至 KOL 都用「無得飛換 Miles 嚟把 L 咩」形容呢張主攻換 miles 既新卡，係咯，「無得飛換 Miles 嚟把 L 咩」。
我諗可能既回應有 3 個啦，包括：
- 換 Miles 唔一定要飛加嘛 (我覺得係唔成立的)
- 如果而家開始玩，夠 miles 都差唔多飛得番喇掛！？(我無水晶球知幾時開番關，不過我估大家唔會半年就攞到幾萬 Miles 掛？)
- 其實唔換 Miles、Keep 番 RC 都得個喎！(呢個 point 係最有力的)
我諗如果換 Miles 係無意義的，一切都真係唔使討論落去，我畀 100% 回贈不過 in 津巴布韋幣就一切都係虛妄啦。
今篇就先講吓換 Miles 既意義吧。
回應 1：換 Miles 唔一定要飛加嘛！咁你就真係太闊綽了
首先講一個唔太成立既回應：「換 Miles 唔一定要飛既，仲有好多嘢可以換既」！
的確 AsiaMiles 喺重組番入 Cathay 之前已經轉型緊做一個 rewards platform，唔單止有機票換，仲可以換禮品、換演唱會、轉做其他平台積分、慈善捐款等等，至於個 conversion rate 抵唔抵我早喺 2018 年 3 月已經寫過一次，睇番 <<信用卡閑談 (14) — 五月天官方黃牛商 : Asia Miles>>：
大佬，30,000 miles 夠去 1 次東京 / 2 次台北 (來回) 喇，坐因航的話張機票都最少值 $3,000 喇掛！要我攞 $3,000 去換一張 $1,180 既演唱會飛？咁即係黃牛啫！講錯咗，係仲衰過黃牛呀！定係你當我弱智先？
其實唔單止係演唱會，換禮物都係痴線的，用最公價既 Apple Product 比較一下：
如果大家喺 AsiaMiles 官網換價值 $1,499 既 AirPods 3 就盛惠 45,930 Miles，即係大概 30 miles 換 $1，以一般銀行成本價 $1 可以買到 10–12 miles 計算，30 miles 既成本係 $2.5 — $3.0，即係話你每換 $1 價值既禮品，AsiaMiles 就食夾棍食咗 $1.5 — $2.0，咁你話用 Miles 換禮品係咪好傻呢？
如果從回贈角度睇，用渣打張 Cathay 卡 (即係 AsiaMiles 卡咯) 食飯 $4 換 1 mile 計算，$100 食飯換到 25 miles，但係 25 miles 用嚟換禮物的話，就連 $1 都換唔番 (30 miles 對 $1 嘛！)，即係張 Cathay 卡既實際回贈連 1% 都做唔到，只能說用 miles 換禮品真係好傻咯。
結論係如果你用 Miles 唔係用嚟飛而係換禮品的話，你就真係太闊綽喇！
回應 2: 儲 miles 都要時間，搞得嚟差唔多飛得番喇掛？
如果大家無玩開 miles，而家先開始玩都的確要少少時間，短則平民艙飛台灣要 15,000 miles、中則飛日本要 30,000 miles、長則飛歐洲要 60,000 miles，喺唔瘋狂玩迎新下，正正經經玩 card feature 去台灣都要消費番幾萬蚊啦。
例如呢張 EveryMile 卡最搶眼球既咖啡店消費 $2 = 1 mile，你都要飲 $30,000 Starbucks 先成到事，就算日日扮藝文青 $43 一杯，一年都「只係」 $15,695 (哇，原來一年唔飲 Starbucks 慳咁多的)，都未夠飛台灣呀。
加上我成日都話，玩得 miles 就唔係望平民艙飛台灣啦，香港飛台北喺疫情前係全球最繁忙國際航線 (沒有之一)，飛機之多、機票之平實在無需要苦苦飲 $30,000 Starbucks 換啦！
咁換咩好呢？要換就至少換香港飛東京商務艙啦！原因同數學喺<<信用卡閑談 (24)>> 已經寫過，大家可以去下面條 link 睇番哦。
Medium 傳送門：信用卡閑談 (24) — 睇嚟換 Miles 會成為我既唯一選擇喇 Patreon 傳送門：信用卡閑談 (24) — 睇嚟換 Miles 會成為我既唯一選擇喇
雖然香港飛東京商務艙計回贈率就好抵既 (用 HSBC VS 的話係 10%+！），不過就要足足 50,000 miles，我同田太兩個人去就要足足 100,000 miles，勉強兩三年一次啦吓。
我就無水晶球知道兩三年之後咩光景啦，話唔定東京沉咗呢？或者東京無沉到，但係日本政府唔承認特區護照呢？(嗱嗱嗱，BNO 我國唔承認架吓！)
邊個又說得準呢？不過，我估等兩三年之後情況應該有變喇掛？仲有呢，近年 AsiaMiles 改咗少少玩法，只要你個戶口 keep 住有動作啲 Miles 就唔會過期，所以之前嗰啲「唔夠時間儲夠 60,000 miles 飛歐洲」既挑戰唔成立架喇。
喺 1) 儲 Miles 都要時間、同 2) Miles 可以不斷延期下，我覺得「搞得嚟差唔多飛得」都算勉強合格回應到「無得飛換 Miles 嚟把 L 咩」既挑戰吧。
回應 3: 其實唔換 Miles，Keep 番 RC 都得個喎！大家有無留意呢？
其實呢，呢張 EveryMile 卡係可以唔換 Miles 的；或者精準啲講，大家係可以睇住個環球飛行情況嚟決定要唔要換 Miles，因為呢張卡其實係先賺 Reward Cash (RC)，再自行將 RC 轉做 Miles 的！
呢度就要講吓匯豐近年既「信用卡獎賞消費機制」 (行內 jargon 叫 burning system，相對於賺分機制 earning system) 啦。
匯豐既玩法一直唔似渣打咁直接外判整個 reward system 畀 Asia Miles。
渣打 Cathay 卡既玩法係客戶既消費獎賞直接以 Miles 呈現，而無經過過什麼 SC Dollar 一類獎賞貨幣。因為一開始 earning 已經係 AsiaMiles，又因為 AsiaMiles 係一個渣打以外既獨立平台，所有 burning 既動作哪管係換機票、換禮品定慈善捐款，都已經同渣打無關係了。
Patreon 傳送門：銀行閑閑談 #104 — 鄭經理卡 2.0 點樣反映國泰同渣打既關係更進一步呢？ Patreon 傳送門：銀行閑閑談 #105 — 從「亞洲萬里通定期存款」看「虛銀之雞肋」
其實唔單止係 Cathay 卡，渣打連開戶口、做定期等等既基礎銀行服務都會用 AsiaMiles 作為獎勵貨幣，始終維護 burning system 都要成本，outsource 個工作畀 AsiaMiles 一類既獎勵平台，可能係一個渣打、AsiaMiles 同客戶都開心既做法。
相反匯豐就一直有維繫住自己既 burning system，無論大家用咩信用卡嚟消費，所有既獎勵都會先以匯豐既自家獎賞貨幣 Reward Cash (RC) 呈現，然後以 Reward+ 作為 burning platform 開放唔同渠道畀客戶去 burn 啲 RC，除咗 AsiaMiles，仲有百佳易賞錢、直接對沖卡數、換禮品、快閃兌換指定商戶等等多個選項畀客戶選擇。
呢張 EveryMile 卡雖然係主打換 Miles，但係佢並無離開過 RC 同 Reward+ 所構建既系統。
以宣傳得最勁既本地交通出行、咖啡店 & 輕食、網上娛樂平台 $2 = 1 mile 為例，喺呢堆指定商戶消費首先會有 2.5% RC 回贈 (而唔係 Miles！)，然後呢張卡入面既 RC 可以喺 Reward+ 用特惠比率 1RC = 20 miles 去 burn (原比率係 1RC = 10 miles)。
即係話每 $100 指定商戶消費先換 2.5 RC，然後 2.5RC 透過 Reward+ 再換 50 miles，做到宣傳入面既 $2 = 1 mile。
講咗咁大堆理論，係要指出「你係可以唔換 miles 的」，又或者係睇吓環球飛行情況先決定將唔將啲 RC 換做 miles 咯。咁 RC 既有效期一般係 1 — 2 年 (睇卡種，呢張未搵到)，即係大家仲有時間決定要唔要換 Miles。
呢度對比起渣打仲有個超大好處，就係大家可以根據大家需要幾多 Miles 嚟決定將幾多 RC 換成 Miles 而唔需要煩嗰啲「零頭」既問題，呢個好重要架，我畀你有 14,999 miles 你話點處理好呢？(加錢咯，貴咯)
咁 2.5% RC 回贈又抵唔抵呢？以匯豐而家兩張主卡嚟比較，Red Card 網購有 4% 回贈；Visa Signature 如果配合最紅獎賞放晒落賞滋味，咁食飯就有 3.6%，咁樣比較 2.5% 就差啲既。
不過公平啲睇，2.5% 都已經好癲，而其實 Red Card 同 Visa Signature 係包唔晒 3 大指定商戶類別 (交通出行、咖啡店 & 輕食、網上娛樂平台)。
咦咦，乜唔係 Red Card 包網上消費，Visa Signature 賞滋味包咖啡店咩？的確係包唔晒的，呢個就牽涉到呢張 EveryMile 卡喺整個匯豐信用卡大盤上面既定位問題，呢個就要留番下篇再講。
無得飛換 Miles 嚟把 L 咩！嘻，你唔鍾意飛既，有得飛都把 L 用啦
今篇嘗試回應吓「無得飛換 Miles 嚟把 L 咩」呢個挑戰，其實儲 Miles 時間之長、RC 換 Miles 又有緩衝期同直接用 RC 呢個選擇，應該都夠大家慢慢決定到底要唔要換 Miles 啦！
其實計我話，如果你唔鍾意飛 / 好驚飛 / 乾脆唔鍾意去旅行 / 飛咗就無錢買樓，有得飛都把 L 用啦。
下篇會正式講吓呢張卡 (哈，原來寫咗 2,800 字都未入正題)，EveryMile 喺匯豐整個信用卡大盤既定位如何呢？Offer 又有無誠意呢？
多謝大家下篇繼續支持喇。
2021 年開始 Medium 只會發佈部份文章，想知最新銀行 insider insight，就要訂閱我 Patreon(patreon.com/watin) 喇！2021 年 8 月 Medium 再次改制，讀者可以選擇將一半既 Medium 會費撥繳至你喜歡既作者。如果你想喺 Medium 上面支持我，可以去以下呢條 link (watin.medium.com/membership)登記做會員哦！華田銀行 FB: facebook.com/WatinResearch
華田銀行 IG: https://www.instagram.com/bank_of_watin/
華田銀行 HKET 專欄： https://wealth.hket.com/sraw116/華田銀行關於華田：
兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。