重要但往往被忽略嘅離職理由
前言：職場心經喺 JobsDB Hong Kong 嘅專欄，喺 2019 年第二季開始有革新。除咗原有嘅自由稿題之外，仲有「讀者問，職場心經答」嘅環節，結集於 Banking & Finance 嘅欄目入面。文章特點係，用書面語寫， (懶係) 正經啲。
嚟緊幾個星期一，我都會轉載返呢啲文章畀 Medium 嘅朋友睇，希望大家都有所得著。原文連結如下：
打工仔，好少話一世人只係打一份工嘅。要轉工，除咗求職、搵工、見工等繁複又重複嘅動作之外，最後必不可少嘅係「離職」呢一個動作。
係架，只要你有返過工，有 report 過 duty ，就會有離職嘅一日。點樣離職，乜嘢姿態，當下未必有好明顯嘅影響，但其實日後你自然會領受到，乜嘢叫「種善因，得善果」。
喺深入解釋之前，大家回想返 2019 年 7 月，有位資深傳媒人，因為喺一個場合，發表過一啲不恰當嘅言論，而被網民群起而攻之，連帶佢所屬嘅傳媒集團嘅員工都發起聯署聲討。當事人最初諗住撤回言論並道歉了事，但眾怒難息，佢最終要辭去集團所有職務，僅保留專欄作家身份。
大家有冇留意，當事人喺上市公司公告內呈辭嘅原因？係「因有意從事其他個人興趣」，而向董事會提出辭任呀。雖然大家問心嗰句，當事人從事報業多年，雖身處高位但仍然不時活躍於媒體及公眾場合，無啦啦做乜嘢要「從事其他個人興趣」？人生七十古來稀，到古稀之年先至搵第二啲嘢玩？你肯定？
你信又好，唔信又好，呢啲理由都只係為咗 on record 好好睇睇。換句話講，一切都係面子問題。即使大家心知肚明另有原因都好，過兩年、十年甚至二十年之後，「考古」嘅朋友若然翻查文件或史料，都只會見到當事人急流湧退，「與董事會並無分歧」。當年當事人講過啲乜，同辭職呢件事有冇關係，都已經變成 hearsay 。
同樣地，大家要離職、劈炮、炒老細魷魚，首先要確保公司人事紀錄上寫明離職理由係 resigned ，而唔係其他情況── dismissed / terminated 之類就好容易觸動其他人嘅神經 (redundancy 因為削減職位而冇咗份工都叫情有可原； expiry of contract 大部份都合理，雖然如果要雞蛋裡挑骨頭，都可以問你為何不獲續約) 。
點解 resigned 咁重要？因為每個人離職嘅時候，都會收返一封 Letter of Reference ，上面載明呢位員工喺公司任職嘅年期，最後從事嘅崗位，以及佢離職嘅理由。日後當呢個人搵工跳槽或者返新工，新公司可以索取呢封證明信，佐證呢個人嘅工作經驗同品格。除咗要求求職者提供，新公司亦可以直接向舊公司嘅 HR 查詢，一般大機構都係官樣文章咁答覆。
喺呢啲位，例湯例水嘅回應就係最好嘅回應。你唔會要求舊公司仲盛讚你返工準時或者表現卓越，甚至流露出依依不捨之情嘅，係咪？當離職理由係 resigned 嘅時候，大家就當係你自願離去，背後真正原因係有份好工、重返校園、 take 個 break 抑或權鬥敗陣，都唔係咁重要 (有好事之徒周圍講你壞話又另計) 。
順帶一提：離職，除咗 on record 嘅官方說法要好好睇睇，最好亦要留一手， don’t burn the bridge 。即係，走嗰日記得派散水餅就梗架啦，同公司啲老細保持良好關係，握握手作別，日後都會好相見。畢竟，山水有相逢。你永遠唔知道，你個名幾時喺其他人嘅對話之中出現，而人哋對你嘅描述，更加唔到你控制。
