語言雜談：IKPA

最近成日寫香港嘅嘢，寫返啲輕鬆小品先。

唔知大家有冇試過寫字、jot notes 時，習慣下寫咗啲自己先明嘅略字？

以上係我喺幾本 notebook 度搵到而比較 consistent 嘅寫/潦法。缺筆主要係因為啲字要寫得細隻，但枝鋼筆筆尖太肥，為保輪廓唯有犧牲部分筆劃。

而將「保輪廓棄筆劃」呢招運用到底嘅，有日本嘅舊式公路字體。為確保駕駛者可以從遠距離快速辨認文字，呢隻字體省略咗漢字部分筆劃，喺減少筆劃同時維持文字輪廓，方便駕駛者將每隻字當成整體嚟辨別。不幸嘅係後來有學說認為，呢啲「同平日有啲唔同」嘅漢字，會令駕駛者過分留意唔同咗嘅筆劃，而忽略咗資訊本身，因而提升交通意外風險。所以呢隻字體喺近年為較普遍嘅 Hiragino 字體取締。

而有時遇到本無其字或非漢字詞嘅字，就會用其他方式 mark 返個音。例如好似韓文咁「킥릭칵락＝kik1 lik1 kaak1 laak1」。我唔識亦冇學過韓文，亦好討厭 02 年世界盃南韓打茅波，但唔知點解我覺得用諺文字母嚟拼呢啲字詞，有種一拍即合嘅感覺。

講返正題，最近睇咗篇世界語嘅 post (咩係世界語？)，話有位韓國人嘗試為每個國際音標整個對應嘅諺文字母，再用啲字母表達本身用 IPA 拼寫嘅發音。即係將上一段嘅諗法擴展至所有人類發到嘅音同所有語言。

嗰位人兄寫咗篇論文解釋佢嘅構想，並將呢套符號稱作 IKPA (International Korean Phonetic Alphabet)。閱讀前以為佢會好似韓文咁，將每個音節用字母砌成一個 block 嚟表達，但睇完篇文先知佢想將每個字母當成獨立個體，唔會拼埋一齊。

正如大部分吹奏諺文嘅文章，論文開首都吹奏返諺文本身幾科學、點對應口部動作、蘊含天地人三才咁 (有種寫上款、問候語嘅感覺)。然後作者就講下佢有咩加筆嘅方式，去將現有嘅諺文字母擴展去更多唔同嘅音。

撇開韓國人對自家品牌嘅吹奏咁睇，其實呢個諗法幾得意。不過作者嘅呢個構想，最大問題在於拼寫時需要放棄諺文本身可以幾嚿部件砌埋一個 block 慳位、易睇 (雖然我睇得好慢) 嘅優勢，變成只係將每個音標 map 個諺文字母版咁。

話雖如此，如果香港粵語都有類似呢種字母嘅發明，去幫一啲本無漢字、本非漢字詞嘅字詞，砌個一目了然嘅寫法去表示佢哋嘅音，咁樣都唔錯。只要解決到點樣表達聲調嘅問題，同埋克服到部分字母同漢字唔夾嘅缺點 (聽講多數人覺得 un 眼都係因為個ㅇ)，長遠嚟講對於標準化呢啲詞語嘅寫法，都好有幫助吧？

至少唔會再有咁多人，俾嗰啲「你所不知的 X 個粵語正字」呃到呀。