西式時光倒流二十年

世界盃次圈喺香港時間晚上十點同深夜兩點舉行，對於球迷嚟講，十點場絕對係黃金時間。第一晚嘅法國對阿根廷上演入球騷，雖然法國一度不思進取，畀阿根廷胡裡胡塗反先二比一，但係阿根廷嘅豆腐防線始終係美斯緣盡世界盃嘅關鍵。

如果第一晚球迷食咗精緻嘅頭盤，咁第二晚嘅主菜就恐怕唔太見得人。主辦國俄羅斯對西班牙，因為一個角球攻勢，由 38 歲嘅中堅伊拿舒維治擺咗史上最年老嘅烏龍球；又因為一個角球攻勢，西班牙中堅碧基犯下手球，俄羅斯中鋒蘇巴射入十二碼扳平。

然後，就到加時下半場喇。

我唔係話懶惰偷工減料，但係打從西班牙打開紀錄之後，除咗球十二碼，場波真係幾乎無事可記，衰撚過萬曆十五年。如果日本喺最後一場分組賽最後十分鐘喺後場搓波值得鞭撻，咁西班牙呢場波超過一千次嘅傳送但係顆粒無收，直情係干犯戰行，要送去海牙受審。

西班牙用喺橫傳嘅時間遠多於思考進攻方法嘅時間，中前場球員走位釋放空間嘅畫面少之又少，於是俄羅斯只需要將九個中後場球員佈置喺禁區，有高空波就解圍有遠射就血肉長城瓦解，瓦解唔到就由門將艾堅費夫撲救，反正角度都唔係特別刁鑽。

因為場波悶到咁，我嘅注意力去咗 Fox Movies 重播嘅愛情小品 〝the Big Sick〞。以一個熱愛睇波、喺屋企唔太鍾意睇戲嘅我嚟講，呢個注意力轉移絕對係一個訊號。

直到加時下半場，西班牙先好似放開懷抱，唔再畏首畏尾，驚畀俄羅斯打反擊。終於叫有啲交叉走位，或者有建設性嘅盤扭。雖然呢隊西班牙同喺 2012 年四比零痛宰意大利嗰隊仍然有好大段距離，但係球迷總算可以暫時唔使叫苦連天。

不過一切都來得太遲，俄羅斯守得到完場，就由互射十二碼分勝負。幸運之神眷顧嘅係主隊，西班牙有高基同艾斯柏斯射失，俄羅斯昂然晉身八強，對手將會係克羅地亞同丹麥嘅勝方。

原諒我冇辦法評論西班牙射失嘅過程，因為我奉公守法幫襯收費台個網上平台睇波，但係互射十二碼第二輪開始彈 app 睇唔到。真金白銀畀幾舊水事少，到戲肉嗰下先要斷線掃興事大丫嘛。

講返西班牙，繼德國之後，又一隊近代世界盃盟主作別世界盃戰場。 (阿根廷成 32 年前就唔好攞嚟yrtt,馬勒當拿而家都跑唔郁啦) 如果德國嘅死因係傲慢、不思進取、冇鬥心，咁西班牙就係倒退返去 1994 年嗰陣，其時球評家對於西班牙嘅睇法係踢法迂迴曲折，效率低。

喺經歷過 2008 年至 2012 年嘅盛世，Tiki-Taka 隨住沙維老退而走向衰老，雖然哥迪奧拿喺曼城繼續將華麗悅目嘅進攻足球承傳落去，但係大衛施華喺西班牙陣中亦不過十一分之一，伊斯高鍾意上腳，阿辛斯奧鍾意玩失蹤，高基同巴斯基斯做唔到後上支援，右閘拿祖費南迪斯更加自廢一邊， 4–2–3–1 嘅陣式喺法國嗰邊應用得都仲叫比較好，因為兩閘肯上、兩個防中輪流助攻，加上兩翼靈活走位，令敵衛冇得企住喺度踢。

Anyway, it is what it is. 恩尼斯達後備入替的確為球隊帶來多少生氣，但誠如網上一句評論所講：小白之所以做後備，係因為教練希亞路怕其他隊友跟唔上佢嘅速度。西班牙青訓人才依然源源不絕，之不過戰術上點樣與時並進，就係往後要面對嘅問題。不過都唔關恩尼斯達甚至沙治奧拉莫斯事咯。

最後想講，當今三大門將迪基亞，今屆失咗六球，成功撲救只得一次。呢個，怕且亦都唔係一個太光采嘅紀錄？