【表揚公職人員愛國愛黨，何罪之有？】
「對法官作出人身攻擊及辱罵，會嚴重損害法院的權威及打擊公眾對司法制度的信心。」 — 律政司，2020年1月1日（註一）
一月一日港島大遊行，有人係金鐘高等法院外牆，噴上某某法官係「紅底官」字句。特區政府一如以往，即刻跳出黎譴責、譴責、再譴責。（註二）
Well，「紅底」者：一、要愛國愛黨；二，要堅定不移支持習近平領導班子；三、要緊隨黨中央路線。有呢三樣，都只係維園阿伯level，最多畀你做個保皇黨議員助理，即係一個普通「藍絲」。你仲要有才幹、有能力，係業界翹楚，先會得到黨既器重。「紅底」呢個稱號，並唔係阿豬阿狗都有。
當某某公職人員被市民點名話係「紅底官」，證明佢完成國家任務，廣為人知了。肩負國家重任是何等光榮！十四億群眾「高度表揚」、「充分肯定」、「全力支持」都黎唔切，又何詆毀之有？又何辱罵之有？
就係對上一個聖誕節前之嘛，咪有另一個公職人員公開係電視節目度，叫大家諗野正面D，唔好過份演繹囉！（註三）佢話警員鬧市民係「曱甴」，代表市民好有生命力，能夠係逆境中生存；而警員被人叫做「狗」，代表忠誠同服從。我覺得高等法院單case亦應如是觀，「紅底官」即係愛國愛黨既法官。愛國愛黨又唔係姦淫擄掠、殺人放火，我唔明點解佢地會諗到去「詆毀」、「辱罵」同「人身攻擊」囉。除非有人作賊心虛，崩口人忌崩口碗既啫。
我唔知啦， 我睇新聞畫面既。總之「染紅」係大勢所趨，我睇唔到稱讚公職人員「紅底」，會打擊公眾對乜乜物物制度既信心囉！
#做得出就唔怕認
註：
- 〈律政司回應針對法官的批評〉，政府網頁，2020–1–1
- 〈律政司回應塗污法院 稱詆毀法官有損法治〉，香港電台，2020–1–1
- 〈有警員形容「曱甴」很有生命力 指外界毋須過份演繹〉，香港電台，2019–12–23
(2020–1–2)
傳送門：西米Go短評 #001–100，#101–200，#201–300
傳送門：假期無聊，最好就係思考人生
傳送門：做得久既官，叫狗官！