街機十大都市傳說
日前重貼打機舊文，晚上和一班老友打邊爐，大家當然重溫昔日的「主場」，以及街機種種。打機歲月，早成過去，但留下來的不少都市傳說，大家仍津津樂道，正如在未有網上，未有色情VCD之時，「咸帶」的重要部位都以格仔遮蓋，然後不知何時，在深水埗鴨寮街出現一部「解碼器」，據報何以解開馬賽克，一時令眾咸濕仔趨之若鶩，但是真是假，無人知曉，這也是都市傳說。
講到打機，都有都市傳說，以下十項，係殘存腦海的回憶，也有不少係同道中人告之，不知真假，如有高明，不妨留言分享；沒有互聯網的時代，真係幾假都有人信。但1943秘技，我則肯定是真，因為見過手抄貓紙，試過實戰應用。
打到去非洲 所有人都聽過，但我從來冇見人去過，就係街霸一可以打到去非洲。據講係對拳王版面，對總統山度不斷出昇，昇中第二個總統華盛頓隻耳仔，就會跌條鎖匙落嚟，之後執起就可以去非洲，阿Ryu到時仲會出一陽指。你身邊總會有個朋友話見過，或者堅持試過，但我就從未見過！之於街霸2就梗係話會有「昇龍」出來啦，其實咪又係吹水！其他仲有同司令draw 10 round就會有豪鬼等等，不一而足。街霸都可算是最多傳說的街機，因為太受歡迎了，加上漫畫和小說的渲染，大家越講越興奮，才有一頁又一頁的傳說。
1943貓紙 經典飛機射擊game，好多人識背日本二戰時的戰艦同戰機都係因為佢，最少你一定會記得利根、赤城、飛龍、亞也虎同大和，到而家我都仲有首主題曲鈴聲在電話。1943經典在於，你總會見到有神人在成個畫面都係子彈下，仍然絲毫無損，逢關過關。呢隻game有好多方式chok武器，當時不少人會寫低貓紙落去打機，打完再小心袋好。我自己當時亦有一張，今日當然早已散失，但肯定試過。
麻雀機食天胡 二十年前有麻雀機，二十年後一樣大把人玩麻雀機。有上海呢隻唔係打麻雀既，亦有真係打牌既，好多人話一開牌有食天胡秘技，我自己未試過，但作為麻甩仔，最關心既其實係打麻雀學園，點先可以爆機睇人除衫！之後仲有野球拳同其他形形式式既咸濕game，例如「劃線」等等，但充其量都係少少咸，多多趣，同而家垂手可得的thisAV同Pornhub爭幾十條街。
撞過王晶 好多朋友都話，係佐敦老尖附近的機鋪撞過王晶，每次都係一條友踢足球機。當時的王晶仲算正常，拍既港產片都會諷刺吓時弊，亦係票房保證；九十年代拍戲幾乎等同大賺，所以王晶可能好得閒，好多朋友都同佢玩Virtul Striker時挑機。我當時係果頭兼職，日日都打機，但冇見過佢，有人話佢好鍾意用荷蘭，唔知係咪因為同荷蘭叻好熟呢？
用線穿銀仔、電撻出術 兩蚊打鋪機，而家睇番覺得好平，當時讀緊書就覺得好多，唔少人都會諗「縮數」，有人發明在一蚊銀中鑽孔，入完後再扯番出來，無本打機。更有人會帶架生，打開入銀個位自己按掣，細機鋪就好難，因為唱錢阿姐會睇實。亦有人話用粒電撻，辣一辣入銀個位，自然可以多一鋪。不過為一、兩蚊搞咁多嘢，有咩謂呢？
旺角草薙京 街霸之後，拳皇興起，甚至有全國的KOF大賽，用投射來玩簡直經典。草薙京同八神庵兩大最紅角色，更加係唔少MK朋友的至愛。當時走在旺角街頭，你一定會見到成街八神髮型，草薙打扮；到再過幾年cosplay興起，以上兩個角色同不知火舞，更加係歷久不衰。其實餓狼都有唔少擁躉，但就去唔到KOF既聲勢。當時打KOF，有唔少高手都話贏過大賽，真假難分，但有機鋪就真係放左隻盃係唱錢個位，吸引唔少高手專程來跟機。
Cyber City 廁所有人搞野 如果要選記憶中最臭廁所，Cyber（即係靈機）一定有份，基本上唔係就瀨的話，一定唔會入去。不過最神奇係唔少人都會聽到有人係廁所搞野，講到繪聲繪影；我未聽過，但機鋪深處就有唔少男女打情罵俏就真，但你唔會敢望。另一個傳說當然係最埋最入個度打死過人，亦都有人話收埋好多「架生」，方便隨時劈友開拖。
滑板、打鼓、跳舞機 成日打機，今時今日會被人話係廢青，其實當年街機有極多體感game，Cyber有滑板機，真係有唔少板仔落去，至於打鼓同結他都紅極一時，個個band友都長期打躉。至於跳舞機更加係傳說，當年幾多人打完街機，仲買埋PS1既跳舞毯返屋企玩，Butterfly更加係個個都識唱！當年旺角新之城近收工時間，例有舞王出沒，個個都睇到嘩嘩聲。
Photo hunt 集體爆機 去到後期，唔少街機都老幼咸宣，Photo Hunt就係其中之一，而呢部機亦都特別多人圍觀，因為見你就夠鐘，就會出手幫忙，大家齊齊篤，但就從來冇見過有人打爆機！另一個圍觀game係紅過一排的問答機，入面加左唔少本土情懷，香港元素，「你在街頭，忽然看見，宇宙飛碟」，一講完，個腦勁loop！「解說！」
全港最勁機鋪 一定係長江。當年細細個入去睇人打，有位都唔敢坐低，事關有無限咁多高手等睇你出醜，一鋪機，打三、四個鐘等閒事，因為百幾人跟機。據講有個高手叫軍佬神，未嘗一敗，又有個叫天下第四，唔知排名點嚟。而當年係呢間機鋪確係高手如雲，少過海唔敢講，至少九龍區坐二望一。其他入圍的當然有靈機、天星、靈精，同沙田第一城入面的機鋪，不過唔記得左名。呢幾間機鋪的另一特色係打「國際例」，好多時不設讓round；至於點解叫國際例？冇人知！
