【美股101】中美脫勾，投資印度或成最大贏家？( ETF: INDY)

香港人對投資印度一向無咩好感，迅狐都係。除左咖哩、Bollywood、人口極多、種姓制度、風化案同「朋友，你都係返印度食蕉」之外，我對印度基本上冇乜認識。但，一班大孖沙改變咗我嘅諗法，變成印度大好友。

投資港股／美股學到最有用嘅嘢，就係睇HKEX「披露易」／SEC 13F-filings，去搵大股東／董事／著名基金經理「抄功課」，跟insider／高手落注買賣。

因為投資美股嘅關係，留意到美國科技公司喺中美脫勾嘅同時開始大舉投資印度。Google（GOOGL）宣布在未來5至7年內，向印度市場投資100億美元，係Google喺美國以外史上最大一筆投資；Facebook（FB）、Intel（INTC）、高通（QCOM）均宣布投資印度大型綜合企業信實工業（Reliance Industries）旗下的電商業務；亞馬遜（AMZN）、Walmart （WMT）亦大舉投資印度。即係，當美國（甚至全球）最搵錢個堆公司都走去投資同一個市場嘅時候，我諗唔到理由唔跟。

之前好多人都覺得：中美貿易戰，越南或成最大嬴家。因為越南有8000萬人口，越南人受過共產主義洗禮聽話D，冇其他東南亞國家咁懶散，可以接晒中國D工廠訂單做嘛，香港人係時候去炒越南樓啦。當時小弟都寫左文分析點樣投資越南。

但，以上一連串大孖沙點解唔係大舉投資越南或者馬拉，而係印度？唔通中美脫勾，印度先係最大嬴家？因為，歐美要搵一個國家完全取代中國位置（龐大廉價勞動力+龐大市場），0.8億人口嘅越南只做到一小部分，全世界真正有條件取代中國位置嘅，就只有同樣坐擁14億人口嘅印度。禮尚往來，印度亦都表明心志，立場鮮明地企硬中國對面，軍事邊境寸步不讓，亦BAN左好多中國手機APP，順手幫印度/亞洲首富M. Ambani隻Jio守住個手機市場，唔好俾小米班友食晒。

今集介紹幾隻美國上市嘅印度ETF，個股日後再補充（利申：個人暫時主要揸ETF，另外持有少量HCLTECH.NS、TCS.BO、INFY。）

（美股）iShares MSCI India ETF － INDA（下圖藍線）

Blackrock出品。INDA追蹤MSCI 印度指數，持股87隻，持股較分散有代表性D。INDA係美國上市印度ETF入面total asset value最大一隻。

（美股）iShares India 50 ETF － INDY（下圖紫線）

同樣Blackrock出品。追蹤印度NIFTY 50指數，持有印度market cap最大嗰50隻股票。而NFTY（INDY追蹤標的）近5年絕大部分時間都跑贏MSIC India Index（INDA追蹤標的）。同類型有First Trust出嘅NFTY(下圖綠線），但睇下張圖你就明白，點解揀ETF都係揀返大廠出品。而且INDY total asset value亦較大。

（美股）iShares India 50 ETF － SMIN（下圖橙線）

同樣Blackrock出品。追蹤MSCI印度Small Cap指數，專攻市值細嘅公司。市場值by definition比較容易炒起（用好少資金已夠炒起同一幅度／用同一筆資金可以炒高好多），所以當牛市三期雞犬皆升嘅時候，通常升得最急勁，但因為本身質素參差，掉返轉跌市時亦係首當其衝，即係所謂「升市升最後，跌市火車頭」。

就好似大西北樓盤嘉湖山莊咁，大升市時升幅一定好過太古城，因為基數低嘛，兩房單位由2014年300萬升到2018年500萬，就已經升咗67%。但當樓市跌時，業主大劈價上新聞嘅通常第一單就係嘉湖。（題外話：報紙佬為咗吸引眼球，成日寫到業主「標價」減30%成交就叫「大跌三成！」，其實標價嘅嘢任你UP嘅啫，小學生都知應該用新舊成交價相比。）