純粹的愛── “Williams”

香港打工仔普遍全面復工，喺屋企睇 Netflix 嘅時間難免少咗。有時唔係淨係交通時間嘅問題咁簡單，而係工作恢復正常之後，根本冇咁多精力喺奔波勞碌一日之後，仲坐低慢慢睇戲或者煲劇。

所以 Happy Friday 顯得更加珍貴。

上次介紹過 “Senna” 呢套紀錄今年 60 歲冥壽嘅傳奇戰神冼拿嘅 docu 。冼拿殞斷於聖馬力諾嘅 Imola 賽道，發生意外時置身於威廉士車隊 (Williams) 嘅賽車。

威廉士車隊嘅大名，賴叔細細個已經聽過。年輕嘅車迷或者會因為車隊近年不振，長期包艇而誤以為佢哋係傳統弱旅。但其實，威廉士始創於 1969 年，至今超過半世紀，係 F1 車壇碩果僅存嘅家族車隊。

又，咁法拉利 (Ferrari) 算唔算？ Enzo Ferrari 創辦法拉利啫，但大股東早已變成快意佳士拿 (Fiat Chrysler) 。而 Williams Racing Engineering雖然都有喺德國嘅法蘭克福交易所上市，但 Frank Williams 仍然持有過半股權，情況同法拉利好唔同啦。

“Williams” 呢套紀錄片由 BBC 拍攝。與其話套戲係介紹車隊本身，倒不如話係陳述創辦人 Sir Frank Williams CBE 一生嘅傳奇，又倒不如話，係述說 Frank Williams 一家人，包括埋太太 Ginny Williams (本名 Viriginia) 及女兒 Claire Williams 各自地純粹嘅愛。

Frank Williams 出身破碎家庭，單親媽媽將佢送去寄宿學校，但相比起讀書入大學， Frank 對於汽車、維修汽車以至賽車更為熱愛。 Frank 酷愛速度感，駕駛風格同樣著重「快」多於「穩定」或「安全」。炒車對於 Frank 嚟講，係家常便飯。

1969 年， Frank Williams 將車隊帶入一級方程式世界。根據紀錄片訪問 Frank 嘅好友及拍檔，車隊財政狀況其實麻麻地，資源唔夠自然成績唔好，成績唔好又自然缺乏財路。

七十年代曾經有一段時期，威廉士車隊被外人買起並易名為 The Wolf ，令 Frank 抑鬱咗六個星期。好在後來有贊助，令 Frank Williama 可以東山再起。

不過， Frank 嘅車隊生涯，除咗莫財，仲有一件 令佢更加難以釋懷嘅事。講緊嘅，係有車手喺佢車隊嘅座駕中喪命。

一開始有提及過冼拿 (Ayrton Senna) ，而早喺 1970 年，車手 Piers Courage 就喺荷蘭站失事身亡。由於 Frank 同 Piers 份屬老友，而 Piers 亦遺下太太及兩名年幼兒子，事件令 Frank 十分傷痛，日後亦少有提起。

Frank 喺 F1 際遇一波多折，好在背後 (或身邊) 有個最強後盾時刻支持住佢。呢個人，就係 Frank 嘅太太 Ginny 。

Ginny 未嫁時對 Frank 一見鍾情，即使如約嫁人，亦對 Frank 念念不忘。二人終於喺 1974 年成親。

好坦白講，除咗仙都唔仙之外，當年 Frank 其貌不揚，老早已經髮線上移。更加大鑊嘅係， Frank 呢位「車癡」將賽車放喺生命第一位，就連結婚當日，都只係註個冊就返廠做嘢。換轉係其他人，可能已經反枱或者一哭二鬧三上吊？

但係 Ginny 了解 Frank 就係一個咁嘅人。佢可以為咗 Frank 而離開第一任丈夫，日後亦為威廉士車隊出錢出力。

1980 年代係威廉士車隊嘅第一個高峰， 1980 年及 1982 年分別有車手 Alan Jones 同 Keke Rosberg (2016 年 F1 總冠軍 Nico Rosberg 個老豆) 榮登總冠軍，車隊亦喺 1980 年及 1981 年獲得車隊總冠軍。

正當一切看來上咗軌道嘅時候，命運再一次同 Frank Williams 開玩笑。 1986 年，車隊季前喺法國試車， Frank 喺揸車返去機場嘅路上失事，傷勢嚴重到幾乎命都冇。雖然憑住 Frank 堅強嘅意志，以及 Ginny 不分晝夜咁照顧， Frank 留院六星期後可以回家休養，但係脊椎嘅傷勢就令到 Frank 半身不遂，下半世要坐輪椅出入。

對於熱愛長跑嘅 Frank 嚟講，飛來橫禍固然難以接受。而枕邊人 Ginny 自此冇得同 Frank 同床共枕，其實亦承受好大嘅衝擊。此前 Frank 車壇事業平步青雲，自不然有後生女投懷送抱獻慇懃，而 Ginny 都一一默默忍耐。但結果令 Frank 「修心養性」嘅，竟然係身體上嘅殘障。

F1 賽季開始之際， Frank 仍然休養緊。缺少咗領隊嘅威廉士車隊，仍然有畢奇 (Nelson Piquet) 摘下巴西分站冠軍。賽後頒獎禮上， Ginny 代表車隊領取車隊分站冠軍嘅獎盃，當下嘅表情，帶著堅忍、不屈，成為一時佳話。

如果話 Frank Williams 對於賽車付出純粹嘅愛，咁 Ginny Williams 付出嘅對象，無疑就係 Frank 。佢 1991 年出版著作 “A different kind of life” ，講述佢同 Frank 喺嗰場交通意外前後嘅經歷，有興趣嘅可以自己搵嚟睇。

Frank 同 Ginny 合共有三名兒女。喺 Ginny 2013 年因為癌症而過身之後， Claire 獲委任為車隊副領隊，而長子 Jonathan 就只能夠負責管理車隊嘅 archive ，同守水塘差唔多。兩兄妹嘅關係亦因此而決裂。

“Williams” 紀錄片冇好特別交代點解 Frank 作出咁嘅安排，但有傳媒就話， Claire 喺 Ginny 過身之前得到媽媽嘅祝福。 Claire 女強人嘅形象，多少都遺傳自幹練嘅 Ginny 。

可惜車隊喺佢接手之後一個分站冠軍都冇贏過，到 2018 年及 2019 年賽季更加敬排末席，車隊資金不足以同列強比拼，研發嘅落後，自然導致戰車喺賽事中被比下去。

Claire 對父母、對車隊都有濃厚嘅愛。紀錄片中有一幕， Claire 對 Frank 讀返 Ginny 著作嘅內容，講緊 Ginny 話如果可以換來 Frank 安然無恙會行會走咁同佢過一晚，放棄一切名利浮華又何妨。 Claire 讀到喊出嚟，而輪椅上嘅 Frank ，只可以茫然以對，彷彿千言萬語但不知從何說起。

又咁講， Frank 同樣有不屈不撓嘅意志，之不過，佢最大最重嘅愛已經奉獻咗畀賽車。關於 Ginny ，情感內斂嘅 Frank 不能說，亦不想說。