第二十五回：好多野要扣的糧單
80後出走德國去讀書系列
上回講到，因為武漢肺炎疫情持續，歐洲各地移民局只能維持有限度服務。我唯有留係德國分公司「做住先」。話咁快，係呢度返左兩個月全職喇。
細細個聽D長輩講，去英美打工，人工高不特止，賺既又係美金/英磅，銀紙特別好使（i.e.襟使）。六七十年代，果D金山阿伯返黎香港娶老婆，衣錦還鄉唔在講，仲有本事買層洋樓畀外母揸手，等佢無左個女都唔使驚，可以做包租婆，印印腳收租養老。實情係咪真係傳說中咁好搵呢？拿，有圖有真相。今次就show張德國既糧單畀大家睇下（數字就改左少少咁啦）：
大家見到上面張糧單有咁多行，唔好開心住先。呢度唔係新中國既國企，人地呢，除左基本薪金之外，有幾十樣補貼（例如：豬肉補貼、食油補貼）畀員工。
上面張圖，除左頭兩項，其他全部都係扣同減。我每次見到份糧未到手就唔見一截，個心難免有少少赤赤痛。就當係還番過去兩年係德國免費讀書啦。
公司請人果陣出既offer，係仲未扣除任何開支既人工，稱為brutto（英文gross）；扣晒所有野之後，入落你銀行戶口果個金額叫netto（英文net）。同香港人交稅一樣，德國人扣幾多錢係因人而異。所以，係要按自己情況，去計下最終到手會有幾多。
講解返上面張糧單先，頭兩項係開心野黎既：
第一行係今個月的brutto；
第二行係Gesamtbrutto EBV。EBV係Entgeltbescheinigungsverordnung既縮寫，你當係「糧單條例」咁上下啦。呢個item包含公司畀你既其他收入、補貼（例如住屋津貼）等等。
開心完之後，就黎料喇：
第三行Lohnsteuer，即係所得稅。稅率主要睇你單身定已婚，有無小朋友等等。唔同情況有唔同百份比，乘收入就係你要交既稅。我咩都無，屬於最簡單Category 1，咁就無左人工既19%（欲哭無淚中 =( ）；
第四行Solidarzuschlag，用途係援助統一後既東德。字典解釋係 “It is designed to help cover the huge costs associated with re-unification and the economic development of the former East Germany”（註一），為5.5%人工；
下一個Krankenversicherng，醫療保險（krank解做「生病」）。比率有高有低，睇你買咩保險，有公立定私立，又睇你居住係邊個州而定。我要畀人工既7.3%；
然後到Rentenversicherung，即係pension，同香港既MPF一樣，僱主同僱員都要供，我地各畀9.3%人工。將來我離開德國，過幾年之可以claim番呢個item（好似係）；
Arbeitslosenversrg — die Arbeit係「工作」、losen係「無左」 —拼埋就係失業救濟金，僱主僱員各畀1.2%；
Pflegeversicherung，護理保險，佔人工的1.775%。外國醫療福利好過香港有其原因，大家個個月都有夾錢架嘛！
講左咁耐，你地估下我份糧剩番幾多？碌落去文末開估。
註：
(2020–6–29)
傳送門：〈80後出走德國去讀書〉系列
傳送門： 西米Go短評 #001–100，#101–200，#201–300
傳送門：香港人，朝思暮想印印腳，唔使做，個個月收租，今年終於得嘗所望啦！
:
:
:
:
:
:
:
:
答案：得返六成咋陰公。