神明嘅政治參與：「新時代」嘅「人神一理」

「宗教係人民嘅精神鴉片」，呢句話冇咩唔妥。馬克思本人本意亦只係想指出宗教嘅社會角色，唔係有意批評宗教荼毒人民思想，扯到去咩「封建迷信」嘅「精神污染」，要破啲乜舊物舊，要用「反自由化」嘅力度反到黐膠花。水能覆舟，亦能載舟。偉大、光明、正確嘅中國共產黨深明此道，一手「嚴打」，一手造神。

點管法？管得掂嘅收編，安插自己嘅代表。管唔掂先拆教堂冚檔，或者抆水泥冚石佛，恢復自然景觀。嫌冚得太粗暴？感化你囉。寬宏大量到感動上蒼，使到漢傳佛教當代再在地化之下，觀音都多咗孔子法相，孔子學院升級做孔子寺院，一如關帝之於伽藍菩薩。吖唔係，儒釋道三教合一、三教同源，唔使分得咁細嘅。

有利用價值，就為之所用，既係實事求是，靈活務實，更加冇違背中共教旨。梗係啦，中共信奉嘅係「毛神論」（喂阿哥，唔係「喂阿哥」個節目啊），高舉嘅係「毛澤東思想」，只有當世「習近平新時代中國特色社會主義思想」能夠與之匹配、並駕齊驅 — — 不過我諗都會好快扒埋「毛聖伏魔尊王帝君始祖」（簡稱「毛魔」）頭㗎喇。家家戶戶整張畫像看門口不在話下，有地方仲起廟供奉「人定勝天」嘅毛魔添啊。聽講阿毛魔好邪㗎，八九年天安門三君子整污糟咗毛像之後，風雲色變喎，哈。（我搵唔返條片，不過我本來就唔想擺呢啲無䅲之談。）

由人而神，並唔陌生；聖賢神化，並唔神化。孔丘如是，李耳如是，關羽如是，關德興亦如是。由邊個神化唔重要，由邊個承認先緊要，此之為「祀無前後，認者為先」。畀王朝標準化，進入國家祀典，國家認可，地位尊崇。

中共好識呢啲傳統嘢㗎。都係嗰句啦，用得就用。譬如講到統戰台灣，喺「三通」之前，早就歡迎台灣分靈廟去湄州媽祖（天后）祖廟朝聖。而且更進一步，塑造國家正統，加封「海峽和平女神」，作為歷代王朝第三十七個「封號」。一波未平，一波又起。海不揚波，談何容易？呢，所以話，郭台銘一句媽祖託夢叫佢參選，足證親愛精誠嘅同志心跡，暗通統戰款曲。大選在即，台灣人真係要睇路喇。

反觀香港嗰啲仲未蒙主寵召嘅，淨係識得爭住講蒙主感召，通通都係吳下阿蒙，囿於地方格局，不識依循正統大體、審視國家大局，難怪上位上到極都係全國政協副主席，未夠班做貨真價實嘅黨同國家領導人啦。區區特區，化外南蠻，民智未開，根器愚鈍，爛泥又點扶得上壁（bek3）吖。唉，中國國情只應中國有，皇皇聖恩，港燦無福消受。

民教宗教有「人神一理」嘅概念：廟宇有如衙門，前有擋中，後有配祀神如下級侍從，主神坐像居中，有如青天大老爺坐鎮；請神遊街，高舉「肅靜」、「迴避」嘅頭牌開路，係達官貴人出巡嘅場面；信眾覺得神同人一樣鍾意睇戲，安排神功戲娛人娛神、人神共樂；神都要瞓覺、洗面、梳妝，有龍床、水盤、鏡枱。喺習總新時代，「人神一理」就應該玩得更加高深，直指人心嘞。至於神明點諗，我知條鐵咩？