神又係你鬼又係你

聽林鄭記者會，我諗我冇聽錯，佢竟然仲好意思講咩之前幾個月宗數低證明政府政策有效云云，但又唔提點解依家宗數急升。真係禮義廉到一個極點，可以厚面皮到咁都得。宗數低變宗數高，咪因為你解封關，比廿萬人免檢疫囉。

因為疫情嚴峻而要取消立法會選舉 (which is 假理由，真理由大家都知係驚輸)，搞到疫情嚴峻咪就係你囉。咩選舉幾難做依樣果樣，你無能就認無能啦，跟住平日好鐘意認叻，提自己年年考第一果個又係你。

諗落香港真係一切事都係神又係你鬼又係你。

一時唔比堂食，全民踎街，一時又比返堂食，咪又係因為你囉。

因為港獨多要國安法，港獨出現咪又因為你「港獨之母」搞咩逃犯條例又縱容警暴搞到全城憤怒，眾叛親離囉。因為外國勢力要國安法，外國介入咪又你搞到咁大件事，為國家添煩添亂，正好成為外國介入的藉口囉。

仲有如果你同成班親中派真係被外國制裁 (當然我咁愛國愛港係堅決反對的)，都係只有你哋自己賴㗎咋，唔好賴咩國際線呀，最好咁多外國政府係咁容易被幾個𡃁仔老點啦。不過，真係被制裁都唔洗驚嘅，因為香港地位係國家指定，外國制裁係冇影響，反華勢力注定失敗，係咪？