《睇錢份上：終於儲到啲錢，點投資好？》

上文提要：

至於我嘅投資目的：透過增加被動收入，改善生活。

呢度有幾個重點，「被動」、「改善」：

(1) 我希望投資係「被動」，唔需要經常主動、活躍咁打理，亦唔會視股票為主要職業或收入來源。因為懶、又深信主動管理都係得個吉，不如被動投資仲好。但「被動」得嚟，要由自己管理，唔想透過基金經理、理財顧問幫我。

(2) 目的係改善生活，提升生活質素，並非一蹴而就、不勞而獲咁靠買賣股票唔使做。靠投資短時間內發達，人人都諗過，少數人做到 — 嗰啲人通常本身係好有錢。

我識人每日買買賣賣股票度日，亦識人透過炒賣股票致富。不過，早年試過透過內幕消息炒股票致窮，我對炒股致富抱有懷疑態度。人各有志，世上總有人想透過股票致富，不過唔係小弟杯茶。

順帶一提，讀大學開始廿幾年嚟，每隔幾年就會有朋友問我「而家買當炒熱股Ｚ公司，好唔好？」Ｚ公司曾經係電訊盈科8、Tom.com 8001、利豐494、思捷330、港交所388、中移動941、騰訊700、快手1024，屢見不鮮，屢試不爽，屢敗屢戰。熱潮過後，以上每隻呢啲熱炒股表現如何？

「執到喊三聲」。

當初定下投資目的，為被動收入相當於每年人工5%（相對保守嘅數字）。喺唔需要乜嘢額外努力同時間付出下，呢個回報已經非常好。假設一年人工三十萬，即無端端每年多咗$15,000，等同每季免費一次Rosewood staycation、一年一部新iPhone、做少兩年嘢提早退休（做四十年嘢多咗六十萬，相當兩年人工）。

由於物慾低，一啲消費、旅行嘅短中期目標，我一樣都冇；終極目標係40歲退休 — 清晰，絕不模糊；40歲係期限，符合我上集講嘅理財目標設定。而我做收支同財務預算時，主要用嚟監測股市表現同總資產升跌。

有呢個投資目的同終極目標，我採取以下策略：

【整體策略】

— 資產只分配喺銀行存款（即現金）同股票之間 — 絕不透過借錢及槓桿去投資（sorry，所以我唔買樓） — 投資目標不會對社會有太大壞處／影響別人（sorry，所以我唔買樓） — 靠自己去管理錢，不假手於人 — 只買股票，不買外幣、基金、債券（ibond除外）、新奇投資、紅酒等作投資 — 當MPF唔存在，歸零

【投資股票策略】

— 股票以中低風險為主，主要買ETF（係人都知我最中意買「盈富基金」，即恒生指數） — 有買個別公司股票，主要買啲自己識嘅公司。識有幾個層次，由最基本嘅「知道個名同知公司做乜」到最深嘅「知道公司營運同財務狀況，前景」 — 接受到投資價值喺短期內有上有落

_______

以上只係我根據自己目的所定嘅策略，並非人啱用，無話啱定錯。呢類投資策略大概可稱作「低中風險」嘅「價值投資」。每個人嘅投資目的不同，策略亦有異：

如果你要買股票致富，當然要非常努力尋找低估值又增長潛力高嘅股票，仲要全副身家押晒落去、甚至可能借錢嚟買

如果你唔接受有機會蝕，對股票市場毫無信心，咁你最好將錢放喺銀行做定期存款

如果你睇好香港樓市，覺得「完全唔會跌」，你收入又穩定、點都供得起，咁咪去買幾層樓

_______

對啲我嚟講，投資嗰陣要作三個決定：

第一，決定只投資現金同股票，忘記其他投資工具

第二，決定資產中現金同股票嘅比例

第三，決定買咩股票

喺度簡介下幾種凡夫俗子接觸到嘅投資工具，同埋講下點解對我嚟講，「只投資現金同股票，忘記其他投資工具」。

【何謂股票？】

股票係公司嘅擁有權，即係你畀咗錢公司拎去做生意。擁有該公司嘅股票，代表你成為公司嘅股東，係公司老闆之一。

公司有錢賺，作為老闆嘅人可分一杯羮；當公司賺到嘅錢越多，你分到嘅錢亦更多，即代表你喺呢間公司嘅權利越值錢 — 即股票價格上升。如果公司營運不佳，蝕錢甚至係資不抵債，你喺公司嘅權利就會唔值錢，睇下近年大陸房地產公司股價歸零。因為無法保證公司利潤，你無可能肯定公司價值及股價長期是升還是跌，呢個係擁有股票要面對嘅風險。

公司利潤多寡，是決定股票價格升跌長期重要因素之一。因為擁有股票時，所得嘅不單是公司「今天」的利潤，還包括「未來」的利潤，所以有「今天」仲蝕緊錢嘅公司，股價仍然不是零、仲可以節節向上 — 只要投資者相信公司「未來」有錢賺（例如 Netflix）。每日開市，世界對宏觀經濟環境、公司未來前景有所改變，對公司能帶畀股東嘅利潤預測會改變，連帶股價亦隨之升跌。呢個就係點解有時候公司業績好（代表過去嘅事），但股價可能依然下跌 — 投資者對公司未來嘅業績並不看好。

以上只係概念上嘅嘢，股票並不是賭價錢上落嘅工具 — 儘管股票同賭場嘅骰盎喺實際上非常相同。

總之，公司要有錢賺—今日或未來，股票先值錢。

_______

【銀行存款】

銀行存款即係你放錢喺銀行。概念上你係借咗舊錢畀銀行，銀行點用你唔使理、亦冇得理，而借錢畀銀行嘅回報就係利息。

呢個利息係保證嘅，不論銀行用你筆錢賺好、蝕好，都要畀呢筆利息你。撇除銀行執笠呢啲咁特殊嘅情況，將錢放喺香港銀行，幾乎係零風險 — 你唔會有任何機會「血本無歸」、亦唔會有機會「大富大貴」，咁穩陣、咁著數嘅嘢，回報亦唔會高。放喺銀行等於拎現金，勝在有彈性，唔怕蝕，但壞處係增值能力超弱，往往跑輸通脹。

_______

【債券】

債券同銀行款存喺本質上類近，同樣係你借錢出去，不過對象並非銀行而係畀政府／公司。政府／公司不論賺蝕，理論上你都有一個固定回報。

相比銀行存款，投資落債券嘅風險高啲，因為借你錢嘅對象有機會唔還錢、而你係冇咩「銀行存款保險」賠錢畀你。風險幾多，視乎你借畀邊個：借畀政府，例如你買iBond，香港政府唔還嘅機會好低；你借畀內地地產股，即買內房債券，佢唔還嘅機會好高。

以前買賣債券入場費好高，動輒幾十萬；加上過去十年低息環境下，投資債券嘅回報甚為可悲。所以我冇買過債券（撇除 iBond）。

_______

【基金】

基金本身並非投資工具，而係有人（所謂「基金經理」）拎咗你啲錢去投資股票、債券、銀行存款、外幣等等。賺蝕都歸你。

「有錢齊齊搵」係基金嘅核心概念 — 基金經理幫你用你舊錢去買賣投資工具。我覺得呢個概念係痴撚線嘅。更痴撚線係，無論賺好蝕好、基金經理依然收你一定百份比作為管理費。你賺我畀你合理，但你蝕（或者差過大市）、即係無做好本份，我做乜要畀「管理費」你？我自己拎住舊錢放喺銀行唔投資，回報最差都只係零，你蝕咗錢仲要我畀管理費？即係樓下看更日日放賊入嚟爆格，點解仲要畀管理費。

除非要買啲你買唔到但又好吸引嘅工具，例如偏遠市場嘅股票、債券、必蝕嘅初創基金等等，否則唔建議你買基金。而家買賣港股美股咁易，基金作為「分散投資」嘅作用已低咗好多。

我不買基金，亦非常反對人哋買基金。錢要自己管先有感覺同動力。

留意，我成日講嘅盈富基金，係股票嚟，不是基金。

_______

【外幣】

對一般人嚟講，正常情況下要買外幣賺錢，只得「用港幣買非美金貨幣，放喺銀行做定期，等佢升值同派息，然後賣咗外幣變返港幣」。

派息就易明。外幣升值呢樣嘢，其實外幣匯率變化好細，亦不會無止境年復年、月復月咁升值／貶值。

外幣匯率，一般取決於該國嘅經濟增長、政府財政狀況，央行貨幣政策及利率、國家發展前景、外資投資需要。

我覺得長期匯率走勢只係上上落落，冇咩趨勢可言。外幣一般變動不大，每年升跌10%已經非常少見。作為長期投資，外幣並非一啲可以長期持有嘅工具。

我完全唔識投資外幣。

_______

【虛擬貨幣】

虛擬貨幣本質同本地貨幣、外幣一樣，喺某程度上係一種「錢」— unit of account, storage of value, medium of exchange。唔同嘅係，外幣係該國法定貨幣，於該國擁有購買力，喺國際銀行體系亦普遍接受。而虛擬貨幣並非法定貨幣，其幣值取決於人類有幾接受佢用嚟儲存價值（好虛無）。簡單啲講，啲人覺得佢值錢、佢就值錢，完全唔需要講咩利潤、營運、業績。多人覺得佢值更多錢，佢幣值就升。

我唔係話虛擬貨幣價值唔會升，但對於佢價值純粹取決於群眾嘅喜好，深抱疑問。你話一幅畫，有觀賞價值，而當文化水平越嚟越高，隨時間更多人肯畀錢去睇畫，仲勉強可以話藝術品升值有原因。但虛擬貨幣……我真係唔理解。從解放金融體系嚟講呢件事可能有價值，然而從投資嚟講，呢件事非常羊群現象，非常割匪菜。

_______

【非典型投資：新興投資、紅酒、威士忌期貨等等】

呢類投資需要極專門學問，外行人投資風險極高。自問冇咁嘅知識。即使我投資，亦唔敢大額投資。大舊錢掉落去，恐怕日日買驚風散；投資少，即使回報甚高，對生活亦冇太大影響。更大問題係呢類投資機會有時間或次數限制，難以持續進行。

回頭睇返咁多投資工具，只有股票有一個比較明顯客觀嘅概念同準則，去解釋同支持佢嘅價值隨時間上升。外幣、虛擬貨幣、非典型投資，又因為種種原因冇興趣／信心投資落去。即使投資工具五花百門，多年嚟我好似啲狗喺721嗰陣咁，對一切「視若無睹」；咁多年嚟，只專注投資現金同股票，股票仲要來來去去淨係買幾隻。

當然有買iBond、去旅行買外幣、細個唔識嘢買過份有投資成份嘅保險，仲有舊錢拎咗去炒股票，但呢啲資產最多只有十幾廿萬，從來唔算資產重要一部份。

剔除債券、外幣、基金、虛擬貨幣、非典型投資，對我嚟講：

「只投資現金同股票，忘記其他投資工具」

（我想講關於投資嘅嘢已經講得七七八八，《睇錢份上》將改為不定期連載）

（有理財問題可留言或去面書私訊史兄。賒借免問。）

Follow me on Medium/Patreon，我嘅文字唔會令你失望（不過寫文嘅速度會）。

Medium : https://medium.com/@relgitsjg
Patreon : https://www.patreon.com/UncleShit