睇完Jeff Bezos篇霸氣Medium 之後

記者如我應該做咩？

如果我仲喺任何機新聞機構工作，身邊總有啲平日對Amazon嘅營運或者Bezos嘅個人歴史無甚了解嘅同工，突然間紅左眼成隻吸血鬼咁走出黎大聲念念有詞：

「Amazon個創辦人有祼照啊」。

注意，呢個係極精準嘅描述，容我解釋一下。

首先，條蛋散係有八成機會講唔出Bezos個名嘅，「總之就係Amazon個老闆啦」；二，佢係唔會睇Bezos篇英文Medium原文架，甚至任何英文版嘅報道都唔會睇，好大機會佢係睇完01嘅push就大叫；三，係啊，佢真心確信張祼照已經係網上，但就算佢明知Bezos嘅祼照係偏近恐怖片多過愛情動作片，但「祼照喎！祼！照！啊！」。

上述徵狀有個學名，叫「新聞觸角」（無寫錯字）。呢啲係人材，往往升職上位就係靠「新聞觸角」。

無錯，下一步就有高層走出黎：「喂啊邊個，快啲寫個Bezos情史，同Amazon股價表現出黎。做表做圖！」

容我再註解一下。

呢個時候被召喚嘅「阿邊個」，通常都係中高層眼中最廢嘅記者（事實上佢能力可能唔錯，但就係無左啲「新聞觸角」，咁囉）；你無睇錯，位高層係真心相信Bezos嘅情史可以寫到一條Timeline，「首富喎，佢依家偷情喎，一定大把女啦」，呢個係高層對世界新聞正常嘅認知水平，熟精確描述；三，咩都無所謂，總之一定要有表同圖。

睇到呢度，你知「阿邊個」點解一世無得升職啦。佢日常工作就係拍緊Tom Cruise 嘅Mission Impossible，但做唔到好明顯係佢嘅能力有問題，唔通係高層唔識野咩？ 你有邏輯少少好無，唔識野嘅人係無可能知道自己唔識野架喎。

故事嘅最後，其實個成品都只係抄左Buzzfeed或者Business Insider嘅報道一次，最重要只係要個Facebook Preview上，有Bezos個樣、Amazon 個Logo，同埋一嘅大大隻字標示「Amazon 創辦人」同「祼照」，咁就得啦。

咪住，篇文唔係講你呢個記者會用呢條報道做啲咩？

其實真係唔知可以寫咩⋯⋯所以寫左一篇潮文咁嘅野出黎。記者，唔識寫個題目咪寫潮文囉，反正都只係要click，是旦啦。

BTW，我無做記者好耐。