當奴心態

做記者，真係台上一分鐘，台下十年功嘅。我講緊嘅，係喺台下苦等嘅時間，遠比台上 on-air 、提問、應對嘅時間長。

例如話。有大人物來港或者開記招，記者收到採訪邀請，固之然要提早到場擺陣 set 架生，大人物又通常都會遲到擺款，自說自話一大輪。其實呀，咪又係跟新聞稿讀？公關派埋啦。所以好多新聞都可以搬字過紙光速出稿，唔似得我以前寫波，真係一字一句都有血有汗。

講完，有機會 Q&A ，都唔一定有機會輪到你發問。有機會問，咪就係 show-time ，好似利君雅咁。叫林鄭講人話囉。但都可以徒勞無功嘅。

上一個豬年，我已經冇出去跑，喺時任國家主席訪港期間，隔住電視機睇行家通宵守候 (差啲打錯「守夜」) ，都真係心有千千結。

我也不是傳媒高層，不會知道他們部署人手的策略與安排。但如果有記者獲派在紅磡某誠哥旗下的五星酒店打躉守夜，我都會笑。還要多問一句：「你係咪覺得胡總會賣甩你地，夜探中環名店Dragon-I？」其實如果各位大哥大姐有種，或者真的想交些甚麼貨色出來的話，請逕自操上胡總下遢的樓層，像窺探王菲在北京接載女兒那樣，了解一下胡總的起居習慣，例如睡覺會否打鼻鼾，節奏會否與《義勇軍進行曲》相近。

如果守候只為應酬，不如大家早點就寢，第二日努力再戰。既要服從公關的安排，又不願意承擔「人有我無」的風險，處境何其尷尬、何其難堪？至於《星》字頭的免費報章以「清明上河圖 限看一小時」為星期五 (好像是) 的頭版，就更加無謂多講。不如開創先河，用「是日無新聞」為頭版算數。

或者大家都受回歸十周年的熱潮感染，患上了感冒。從傳媒到大眾到高官，這陣子都呆呆滯滯，自信奇低。某位本地跳傘會主席，日前與解放軍跳傘隊聯合演練後表示，「感到非常榮幸」。在烈日當空下，主席瞇著眼，頭略略下垂，卑躬屈膝到不得了。是主席從未受過應得的關注，於是今次受寵若驚，還是解放軍士兵有三頭六臂，跳傘造詣令人折服到不行？

我從來覺得，香港回歸後，從一個國際金融中心，淪為中國沿海一個城市，是合情合理亦無可厚非的事情，也很反對「大香港心態」地，事事要中央以香港為先，即使犧牲其他城市的利益亦在所不計。問題是，大家繼續心裡暗地瞧不起從內地南下的新移民或自由行時，面對「祖國」施予的好處或國寶，應付態度是否恰如其份？

當奴鴨出席北京的「香港回歸十周年成就展」時，唯唯諾諾的跟胡主席對答，其實不比老董當年受老江指點好看幾多。為甚麼現在沒有人提出異議？是感冒到頭昏腦脹，還是自覺的免疫系統已經麻痺淪陷？

(2007 年 6 月 30 日)

新聞工作者跟隨國家領導人起舞，香港嘅政工作者何嘗唔係？官府中人固然要視之如大老闆咁必恭必敬，親政府嘅保皇黨亦擺出一如既往嘅奴才嘴臉。至於泛民呢，背後嘅計算就係如何透過行動或 sound-bite 突出自己，但又不至於破壞同中國官府溝通嘅橋樑囉。

呢啲包袱， somehow 係而家走上街頭嘅年輕人毋須背負嘅。亦因為動機純正，無大台嘅社會運動，可免於被分化、被統戰、被搞散。要有免被操控、被制肘嘅自由，首先，要有當家作主嘅覺悟，戒掉做奴才嘅心態。好似係。