畢絲扮工日記之老鼠紀事：Mr. Knowsmore 的自白

話說呢個世界奇妙起上嚟，真係無奇不有，足夠令你反眼反到上月球。有一日，我去咗遙遠嘅港珠澳大橋香港口岸嘅「奇妙直通」客務中心返Extra Shift[1]，就體會到知多啲先生其實好慘。其實隔離就係旅發局Counter，點解個個都走埋嚟問啲無聊問題嘅呢？我唔知。我只係知道，佢地啲問題真係會嚇你一跳。

跟住落嚟，睇下啱啱離開珠海落嚟香港嘅遊客，出咗禁區之後，今期流行嘅問題係乜嘢：

第10位：附近有啲咩地方可以行下？

其實你唔睇攻略，唔做research就落嚟，諗住淨係行吓附近就算的話，只係以下三個選擇：1. 東涌、2. 機場、3. 竹篙灣。咁你埋嚟我地counter，我地唔答你竹篙灣，仲可以答咩呢？不過珠西嘅朋友係無錢嘅，入場費成六舊水真係唔啱佢地㗎喇，迪欣湖啦。

萬人塞爆迪欣湖，諗起都興奮。

第9位：怎樣去海洋公園？

我諗你班人唔識字都唔係問題，但係咁大隻老闆同老闆娘喺度，都仲問我海洋公園點去，我幫唔到你。

（ok，基於 4條key之一 — — 「Courtesy 殷勤有禮」，我地都會照答嘅。遊客未必知道我地係競爭對手㗎嘛～）

第8位：地鐵站怎麼走？

嗱其實你唔知呢度冇地鐵站都唔係問題，但係你班友十個問得呢條問題有十個都唔會答佢「搭B5去欣澳站」就算嘅。佢地之後嘅Follow-up Question係：

「那麼最近的地鐵站在哪裡？」 「所以我要怎麼走過去？」 「不是有機場快綫嗎？怎麼會沒有？」

屌你，都話無囉。成座旅檢大樓又唔係我起嘅，你怪我都無用，唔信我你可以唔好問。

第7位：這裡是澳門嗎？／新葡京怎麼去？

……點解你會過咗嚟嘅？呢度香港嚟㗎喎。

（喺門口過嚟都算，喺禁區行出嚟問呢條問題真係CLS）

第6位：你們是官方嗎？

……不然呢？

（我明你地好驚假嘢，但係如果係假嘢，你問佢呢條問題，唔通佢會答你「唔係」咩？）

第5位：往香港怎麼去？／這裡是香港嗎？

你已經喺香港喇親。

第4位：下面怎麼走？

呢層係地下，再下面已經係地府……如果要搭車，出面就係㗎喇。

第3位：怎麼出去？

走出去。（明明門口就喺隔離都可以問呢個問題嘅🙄）

第2位：這裡是哪裡？

…….香港。

第1位：這裡是甚麼狀況？／我為甚麼會在這裡？／我現在要怎麼做？

……

「奇妙直通」客務中心嘅作用，係俾啲book咗酒店嘅客可以喺度check in，我地就可以將行李直送酒店房，個guest就可以拎埋房卡去咗玩先，返酒店嗰陣直接上酒店房就得；另外亦都可以賣埋飛，咁入park玩都方便啲。不過喺港珠澳大橋香港口岸要去到竹篙灣的話，B5巴士朝早先會直接去到，其餘時間就要經欣澳再轉返地鐵 [2]。最神奇嘅係，唔知邊個坐住咗個腦，夠膽話10分鐘直達竹篙灣……吓？搭的士都未必得喎。

以農曆新年期間嘅客量同埋酒店入住率睇，呢啲counter都算有啲用嘅。但係對於肥雞餐記憶猶新嘅老屎忽嚟講，都深明呢啲outport仲要係direct revenue唔高嘅counter [3]，將來絕對會係首當其衝嘅開刀對象。

到底仲玩到幾耐，真係唔知；只係知道做咗日KnowsMore，口水都乾埋。啲珠西朋友嘅智商，真係會嚇你一跳。

話說我開咗個Publication去裝呢個系列嘅文；大家如果對呢個系列有興趣的話，記得follow埋：

[1] Extra Shift 額外工時計劃：俾你報名返吓啲其他部門嘅工作崗位幫吓手咁樣。

[2] 據說城巴開初話「通車初期」只會部分時間途徑竹篙灣，但係係咪會改全日途徑呢？好難講。

[3] 呢個counter嘅direct revenue主要來自門票收入（包括年票）以及酒店walk-in客。咁但係絕大多數人係會網上預先book嘅，尤其係來自珠西嘅朋友更加唔會walk-in咁奢侈（佢地都唔係好捨得book竹篙灣啲酒店，因為都貴嘅）。所以呢個counter喺港珠澳可以賺到嘅錢係好少；不過西九嗰個就會好啲嘅，可能搭得高鐵落嚟嘅都唔算太窮啦。