畢絲扮工日記之老鼠紀事（特別篇）：木偶的心事

小木偶皮諾丘非常渴望成為真正嘅人類，但係藍仙子雖然賦予咗皮諾丘生命，但係仲伴隨住考驗：要成為人類嘅先決條件，就係唔准講大話；要做一個勇敢、誠實和無私嘅木偶。魔法需要仙子去施展、木偶需要由工匠製造，而木偶要化身成為人類，就需要自身嘅努力：正所謂「羅馬非一天建成」，樂園就算係用魔法棒揮出嚟，都要由人去創造、去營運。竹篙灣成日都話自己最重視品質，咁到底魔法係點樣施展嘅呢？

話說竹篙灣除咗係靠一班幻想工程師同埋演藝人員之外，仲有好多 短期兼職及兼職演藝人員[1]、營運承辦商 [2] 、服務供應商同埋外判商[3] 員工 去施展同埋維繫魔法嘅。咁到底點解佢地仲可以繼續維持到啲魔法嘅呢？佢地有啲咩嘢特別嘅地方，可以令到大家唔會覺得佢係原罪呢？除咗因為百份報無招呼到敝公司、無日日壞車阻住人返工之外（err……壞咗都唔阻你返工啦咁講），其實有好多祕技嘅～

DU — — 無論你係邊個，未返工都要洗洗個腦先

你實會話，其實好多大公司都會有培訓、要洗一洗個腦等你熟悉公司嘅一啲背景，或者係嗰啲可能冇人理嘅 Vision Mission and Value。我問你一樣嘢先：如果你去見份寫字樓工，甚至係你直接 in CEO，其他本地公司都未必要你去洗洗個腦先返工，梗係即刻落位啦！

竹篙灣或者佢成間公司嘅特色，就係洗腦無分貴賤：無論你入嚟做CEO定係做Seasonal Host，全部都要一齊洗腦，仲要唔單止係一齊上DU [4]，仲要洗足兩日腦，務求個個都明白何謂「Magic」、記得「We Create Happiness [5]」、知道「4條key [6]」。你可能會話，好多人上完DU都係無記過嘢㗎啦，咁但係現實係除咗啲師奶阿叔之外（好老實講有啲師奶阿叔都會聽書㗎！），大部分都係會唔小心俾佢洗咗腦。所以再次奉勸各位：珍惜智商，遠離竹篙灣。

咁呢個一視同仁嘅制度，除咗可以令公司上上下下都清楚知道呢間公司嘅價值同埋品質標準之外，更加重要係製造出一種企業文化，而且呢啲文化唔似得隔離某公司嗰啲整下皮套搞下比賽就當自己整咗結果下面wfc之餘啲細嘅又搞到公司日日上報紙喇。

Cast App— — 無論你係邊個，我都會知你係邊個

如果你係隔離某公司員工，有一日你搭搭吓車，見到有個同事態度幾好，你想嘉許佢；或者見到有個同事做嘢唔多好，你想提醒吓佢，你會點做？答案：你不如都係唔好出聲啦。

不過呢度就唔係喇，除咗有個大大隻字寫住你個名嘅Nametag之外，仲有Rostr呢個網站，只要有你嘅Nametag名同Location就可以知道搵邊個Manager嚟關照你；或者直接寫張Four Key Card嚟讚賞吓你。但係呢個唔係重點，重點係佢地個內聯網係所有演藝人員（包括全職兼職）都可以用得到，你想調更[7]、報Extra Shift[8]、Check 糧單、年假餘額、睇公司政策、知點claim工傷、甚至有咩演藝人員優惠，仲有Resort Today[9]、Cast News Flash[10]、以及其他DPECP[11]嘅資訊，通通都可以一個內聯網睇晒，仲要兼職小薯仔都有份。

俾著隔離公司？哈哈哈，問站長啦；不過站長好忙，無特別就唔好打搞人喇。反正兼職嗰啲Minions都係廢㗎啦，俾咁多資料出嚟都無用，反正大家都唔係專業人士，唔通所有問題都要同啲兼職報告咩？我地話俾你聽OK就得㗎喇。

Resort Watch— — 無論你係邊個，你老細都應該要聽你講

嗱你話僱員權益呢啲嘢呢，就係僱主都唔多聽嫁啦。我係講緊啲有鑊氣嘅嘢，即係好似話咩工程有問題，唔會個個上報晒點知個工程總監唔報上管理層結果不了了之，直至爆大鑊先至知道不得了。

喺竹篙灣，DU教落：見到唔對路，你有責任出聲 — — See Something, Say Something；就算你係 ND[12] 無Account，一樣可以打電話去保密留言信箱舉報，即使係外判商嘅工人仔都可以。至於各位演藝人員，就可以填寫「危險及倖免事故報告書」。都知落到Location直接同經理講，都可能會有千百萬種原因唔處理你嘅報告；但安全部一關照，只要同安全有關，保證即時修理好。

如果發現安全隱患或者發生任何倖免事故，隔離公司都有渠道舉報嘅。但係兼職？Sorry呀，你無Account係無得報㗎，同站長講啦。站長唔幫你報的話呢，個report就會不了了之㗎喇。根本成個企業文化都係「山高皇帝遠、你睇我唔到」，自欺欺人。 當下面乜都Alert嘅時候，班膠層唔Action，最後都係爆大鑊，咁你個AAA（Anomaly • Alert • Action）死㗎？

兼職化 — — 無論你係邊個，都係竹篙灣嘅一份子

隔離公司嘅特色，就係請埋班Minions返嚟係廢嘅。喺竹篙灣，喺前線做緊嘢嘅人，你係分唔到佢地係全職定係兼職，因為佢地做緊完全一樣嘅嘢 — — 係㗎，兼職都會控制機動遊戲、全職都會做人流管理，不用分那麼細。所以佢地嘅權限係接近嘅，大家都有內聯網Account、有EACS[13] Full Access、員工優惠一樣，而且知情權都一樣。待遇雖然少不免會有唔同，福利亦都唔會完全一致，但至少兼職都係演藝人員，大家埋位做嘢唔會有分別。

相反隔離公司啲波板糖人？除咗叫你行入車廂中間之外，仲有啲咩做？結果逗緊二萬蚊一個月、真係做鐵路嘅人，就要負責啲Part-time都可以輕鬆應付嘅手板眼見功夫，浪費人力資源。

係冇錯，竹篙灣都係因為慳錢同埋請唔到人先至要兼職化，而且人手不足亦都係一個永無止境嘅問題，同工不同酬亦都導致有啲部門請唔到人，咁但係隔離公司專請垃圾又係好事咩？

仲有喎，隔離公司搵外判員工企前線做嘢，啲外判嘅員工就更加低質素；你又將培訓同管理嘅責任完全外判，做唔到質素保證，最後啲人返嚟就只會俾乘客壞印象，又幫唔到乘客，衰過你唔請。望下竹篙灣，啲 Operating Participant 同親生仔有同等嘅要求，要俾到大家一致嘅體驗，令到你唔會覺得嗰個人唔係竹篙灣嘅一份子，亦都無需刻意分辨。

Branding & PR — — 無論你係咩公司，好嘅Brand Mgt 同好嘅公關係必不可少

品牌呢個概念，唔係淨係一個logo、一個名；而係一個象徵。即係話，你成間公司俾人啲乜嘢感覺、印象，都係品牌嘅一部分。所以，品牌管理其實唔係淨係個名，而係由上而下嘅整體管理，去控制你間公司或者你個Brand嘅符號。咁樣講可能你會覺得好抽象，咁或者借一借因航嘅Brand Guideline嚟參考吓，你會明多啲：

冇錯，品牌管理唔單止淨係關係到你個Logo嘅設計要求、用啲咩顏色呢啲基本嘅設計要求，亦都包括咗你間公司想俾人啲乜嘢印象，所以因航連用字、設計元素都有規定。作為行業領先嘅因航，佢地要俾到一種統一嘅形象俾人，所以連相片都有規定，務求令到風格一致：溫暖、簡約，具亞洲風情嘅感覺。

其實竹篙灣都一樣，例如話啲公仔佢地真係嗰隻公仔，唔係人「扮」出嚟。我地叫佢做「Magic」，其實都係品牌塑造嘅一部分。再延伸多少少，即使係公關都一樣要有統一嘅語言，務求要令到個感覺係一致，無論係內部定係外部，對品牌嘅理解要相近，咁大家先有共鳴，同埋培養到個品牌忠誠度。

事關公司形象嘅嘢，無論對內嘅飛機片或者內部通訊都唔可以馬虎，因為你影響緊內部啲人對你公司嘅形象，同埋你唔知啲飛機片或者內部通訊會唔會見到街。所以你打開份《米通》[14]，你唔會覺得見街係有問題嘅。但係隔離公司呢？拍吓飛機片、逼啲同事跳下老舞咁樣囉。即係你搵人返嚟跳老舞呢啲咁老土嘅嘢，同你公司嘅形象夾唔夾呢？仲有內部飛機片啲logo無margin咁都出得嚟，冇嘢好講囉。

所以你話，呢間公司點解形象咁差？因為管理層垃圾囉，無公關囉、Branding 過時囉。

木偶要變成人類係需要努力，唔可以固步自封。華氏影業經歷過唔少起跌，但係全賴佢與時並進，同埋嚴謹嘅品牌管理，先至可以維持到良好工作環境以及形象。至於隔離公司？

如果一間公司已經無辦法為員工帶嚟動力，就會好似小木偶皮諾丘嘅朋友Lampwick咁樣，懶惰咁匿埋喺「歡樂島」、墮落於酒肉之中不思進取，直至變成一隻驢，無辦法再彰顯佢嘅獨當一面，然後死去為止。

[1] 短期兼職 Seasonal Part-time (SPT) 係按季度聘用，合約為時不多於四個月嘅兼職員工，佔兼職員工嘅大多數；合約完結日通常為每年2月、6月及10月。兼職 Regular Part-time (RPT) 則係按年度聘用，合約為時大約一年，會按年續約，而薪酬亦會按累積工作時數而調整。園方會考慮演藝人員嘅工作日數、工作表現以及公司嘅營運需要去決定續約與否。

[2] Operating Participant 營運承辦商，指參與樂園營運嘅承辦商，例如 Plaza Inn/Starbucks/西餅店以及各演藝人員餐廳嘅承辦商美心集團、Photopass 服務承辦商 Pictureworks、以及迪欣湖嘅雜貨店營運商七 ‧ 十一。佢地嘅員工會擁有營運承辦商演藝人員工作證，工作時亦都需要穿著樂園提供嘅戲服同埋佩戴Nametag。

[3] Service Provider / Contractor 服務供應商／外判商，指為樂園提供服務或者承辦外判合約嘅供應商，例如提供穿梭巴士營運服務嘅冠忠*、提供洗衣及後勤地帶清潔服務嘅豐盛創建旗下公司、於迪士尼行政大樓內七 ‧ 十一、仲有一眾建築及工程承辦商等等。佢地嘅員工工作時唔會穿着樂園提供嘅戲服，亦都唔需要佩戴樂園嘅Nametag，只會擁有服務供應商／外判商嘅工作證，或者係訪客證或長期訪客證。

[4] Disney University 迪士尼大學，簡單啲講就係培訓中心啦。

[5] We Create Happiness 我們創造歡樂，係迪士尼樂園嘅 Mission。佢全句係「We create happiness by providing the best in entertainment for people of all ages everywhere.」

[6] Disney’s Four Keys of Quality Standards 迪士尼的四個品質標準，包括：Safety 安全至上、Courtesy 殷勤有禮、Show 完美演出、 Efficiency 快捷有效 喺東京迪士尼有時會叫「SCSE」，不過香港一般都係叫返「四條Key」，或者英文「Four Key Basic」。

[7] 目前竹篙灣嘅前線編更安排，係透過Kronos呢個令人又愛又恨嘅系統去完成嘅。下次再介紹呢一套系統。

[8] 額外工時計劃 Extra Shift，係樂園度假區員工都可以參與嘅計劃，可以報名去其他部門或者崗位返工。

[9] Resort Today 俾樂園同事睇、用嚟知道樂園當日特別事宜嘅通告。

[10] 演藝人員定期通訊 Cast News Flash

[11] Disney Parks, Experiences and Products (DPECP)，由 Walt Disney Parks and Resorts Worldwide (WDPR) 及 Disney Consumer Products and Interactive Media (DCPI) 合併而成嘅分公司。兩間公司喺上年3月合併。

[12] 非迪士尼員工 Non-Disney (ND)

[13] 電子門禁系統 Electronic Access Control System

[14] 米通 Magic Post，內部刊物。

* 穿梭巴士營運服務嘅前承辦商（載通國際旗下陽光巴士）係屬於 Operating Participant ，但換咗公司之後，因應服務模式嘅更改，就變咗做 Service Provider。如果唔計迪欣湖的話，佢地亦都係目前度假區內首個、以及唯一需要員工直接面向賓客但又無需穿著戲服嘅服務供應商。