畢絲扮工日記之老鼠紀事：有懷疑，搵Judy

既然每一日都係奇妙嘅一天，喺竹篙灣嘅日子就自然會有好多奇妙嘅事情發生。但係奇妙時刻嘅背後，必然係一班演藝人員嘅努力去施展出嚟。一個咁奇妙嘅世界，點可以俾佢Break Magic嘅呢？以下落嚟，同大家介紹下到底呢個地方奇妙嘅秘笈。

'See something, say something.' 呢句說話，放諸四海皆適用。雖然呢個系列應該係啲輕鬆嘢，但係作為一個專業嘅演藝人員，扮工當然要扮得徹底，所以容許我喺度講啲驚嚇啲嘅話題。

講笑咋！唔嚇吓你，邊得嚟Magical Moment吖？萬聖節就嚟到，唔嚇邊得嚟開心至係㗎。不過咁，一陣搞到隔離黃竹坑公園咁搞到生葬咁就唔好喇。所以呢，雖然要完美演出，但係安全至上都好重要㗎！或者應該話，呢兩句嘢係孖公仔嚟，經常一齊出現，因為安全就係通往完美演出嘅鎖匙[1]喇！

講返 ’See something, say something’ 先。簡單啲講，就係有懷疑就要出聲，千祈唔好唔出聲扮冇嘢，因為一班壞蛋正喺度蠢蠢欲動㗎！話說有次喺GLA[2]賣緊雪條，咁個後台呢就唔同喺Park入面：隔咗度門就可以由GLA入去，仲有秘密通道可以直達Team D，全程毋須經過保安隻眼。呢樣嘢輕則Break Magic，重則有人唔駛買飛就可以繞過Main Gate入閘，仲可以直達後台行政區域，係嚴重嘅保安隱患嚟。當然，你可能會覺得小小事你阿頭實知啦；但係呢度係迪士尼，我亦都唔似得斜對面嗰躉嘢嘅公司咁[3]，鍾意瞞得就瞞，唔大爆炸唔安樂咁款。所以呢，我就打咗去搵Judy喇。

所謂樂園入面嘅Judy，其實係隸屬 SSFH 保安及安全事務部。佢地啲石Q哥哥基本上就係樂園內嘅Judy，有咩事都係搵佢。打去搵Judy report返呢個安全隱患之後冇耐，佢地就叫人落嚟加強返啲保安措施，咁當然Judy嘅魔法我係唔Break得啦，不過相信你都冇可能再如入無人之境咁免費入場喇。

有時有啲嘢，你選擇唔出聲，到有事嘅時候，你良心真係過意得去？今次可能只係有人借漏洞免費入場，下次如果係放炸彈？或者係搞到有人意外受傷？甚至威脅緊同事嘅安全？抑或係引爆關公炸彈？

見到唔對路，你有責任出聲 — — See Something, Say Something，就係咁意思。否則，就算你場Show本身幾精彩，只要出咗事，都唔係Good Show。以上，我地稱之為「樂園守護行動」：守護樂園，唔係石Q哥哥嘅專利，所有人都有份。

[1] Disney’s Four Keys of Quality Standards 迪士尼的四個品質標準，包括：Safety 安全至上、Courtesy 殷勤有禮、Show 完美演出、 Efficiency 快捷有效 喺東京迪士尼有時會叫「SCSE」，不過香港一般都係叫返「四條Key」，或者英文「Four Key Basic」。

[2] Government Landscape Area 政府園景美化區，係竹篙灣外圍由政府擁有嘅綠化帶及公眾區域，當中部分地段交由香港國際主題樂園有限公司管理。按照政府同華特迪士尼公司簽訂嘅協議以及地契嘅規定，迪士尼要管理埋由政府擁有嘅 GLA，而每日就要開放至少 20小時；喺朝6晚10期間亦都要開放一條公共海濱長廊（喺迪士尼碼頭旁邊）。由迪士尼站去到樂園門口之間同埋迪士尼碼頭嘅行人路（Park Promenade 迎樂路）就係屬於 GLA 嘅其中一部份喇。

[3]呢間嘢佢地都有啲類似嘅嘢，叫做AAA，stand for Anomaly • Alert • Action。不過好可惜，當我地乜都Alert嘅時候，班膠層唔Action，最後都係爆大鑊。可能因為呢個正正係美資同港資喺企業管治上面嘅分別？唔知道喇。