畢絲扮工日記之老鼠紀事：小熊維尼倒瀉蜜糖

話耐就一定唔係耐，但係喺竹篙灣呢啲咁夢幻嘅地方度返咗一段時間，夢幻嘅人與事一定唔少得。嚟緊一連幾集，就會講吓呢個充滿奇妙嘅世界入面嘅一啲有趣事。

通常啲新人啱啱DU [1] 出嚟，或者係啲迪士尼迷，就會好緊張所謂嘅 「Good Show 完美演出」，因為如果唔係就會「Break Magic」，簡單講就係穿崩。街外人或者都唔知咩為之 Break Magic ，不過上吓HKDL Secret都會見到唔少CM [2] 會吐嘈啲人點樣唔Magic法。我呢度就有幾個例子，示範點樣為之Magic，同啲客點樣Break你Magic喇：

話說作為一個賣雪條嘅小薯仔，啲 Guest [3] 就會指住塊牌，指住「這個」「這個」咁樣。大佬呀，塊牌唔係透明㗎，你唔講咩名我係唔知你指住邊個嘅。就算你講話咩顏色都好，勞蘇同米妮都係粉紅色㗎，一樣唔知你講邊個。所以有時我地會請啲Guest講返名，咁就可以知道你要米奇定米妮定史迪仔定勞蘇喇。

但係如果就咁話講名，個客都係「這個這個」，咁我就會施展魔法：「要說他們的名字喔，不然他們以為你不記得他們的名字會傷心，會哭，就會溶掉喔！」通常啲客就會笑咗，然後乖乖地話俾你知佢要邊隻樣嘅雪條。但係如果係香港人，我就試過俾人話：「你白痴㗎？唔講名啲雪條會溶你都講得出？呃細路都唔好咁過份喎！」err…呢個樂園周圍都係你口中「呃細路」嘅嘢啦，你又俾錢做MA [4]？

有一日，小熊維尼歷險之旅就停咗啦。咁呢，唔知點解啲Guest唔直接問門口啲人，就嚟問對面小食亭嘅小薯仔（即係小妹）：「點解會壞㗎？幾時會開返㗎？」於是乎，我就答「唔好意思呀，因為小熊維尼啱啱倒瀉咗蜜糖，所以為咗安全而要暫停開放清理同檢查，詳情你可以問返對面嘅朋友，佢地會清楚啲。」

呢個時候，有個麻煩香港人嚟到，話我「你唔好講咁多無謂嘢，壞咗就係壞咗，咁你想點賠先？」咁啱有個lead [5] 到咗，仲喺遠處高叫「係倒瀉蜜糖呀！」well，個客當然就嬲到震，最後都係去咗對面 R 咗張 NSA [6]。雖然係咁，但係我地都會繼續講返「小熊維尼倒瀉蜜糖」嘅，唔係嘅話咪唔Magic囉！LOL

仲有呀，入到嚟樂園見到啲 Characters [7]，有啲Guest就會話入面有人喺度。其實唔駛你講出口，總之佢地係Characters就係Characters；入面條友係男係女，我唔知，知都唔會話你知。我唔爭在同你講，即使係Backstage [8]，佢地對住其他CM都會好似Onstage [9] 咁，因為佢地係Characters就係Characters，就係咁。

其實大家都知道，香港人比較冷淡同埋要求高㗎喇。所以要佢地擠出笑容可以話係一件非常艱巨嘅任務。

今次時間差唔多，下次再同大家講下老鼠紀事 :)

[1] Disney University 迪士尼大學，簡單啲講就係培訓中心啦。

[2] Cast Member 演藝人員，即係大部份所謂嘅職員。

[3] Guest 賓客，即係各位嚟樂園玩嘅客。

[4] Magic Access 奇妙處處通。喺呢度指奇妙處處通會員。

[5] Lead 組長。簡單講就係 Host（款待專員，即係好似小妹呢啲小薯仔）嘅Supervisor。

[6] No String Attached，屬於「轉愁為樂」（唔magic嘅話就叫做「服務補救」）嘅其中一種，簡單啲講就係俾個客去憑券換領啲小心意，等個客唔好嬲，「無牽無掛」咁開心玩，所以就叫 No String Attached 喇。

[7] Characters 迪士尼朋友，泛指所有樂園內嘅迪士尼人物。米奇老鼠、Duffy、白雪公主、Frozen甚至係 PUSH 小推（即係嗰隻識講嘢嘅垃圾桶）都係迪士尼朋友嚟。

[8] Backstage 後台，泛指整個Guest唔應該進入嘅後勤地區。當中涉及樂園運作嘅地方例如Office、倉庫、廚房，就係屬於BOH [Back of House後勤地帶]，都係後台嘅一部分。

[9] Onstage 前台，與 Backstage 相對，泛指開放俾Guest嘅樂園部分。