用eTaxi硬撼Uber?

我唔知大家見到呢單新聞有咩感覺，見到細的士行諗住同Uber合作搞UberFlash，然後商會就直接打壓細行，再自己集資搞apps，真係一個純利益為先的政治行動。

同Uber合作真係有優勢咩？

我就唔覺有咩優勢，價錢同UberX一樣，唔跟的士旗收錢，簡單黎講即係接受的士做Uber，而且引伸法律問題，如誇區做生意、載客唔落旗⋯⋯。既然的士業界咁尊重法律（平時新聞見開的，日日遇到的濫收車資、黑的、拒載我地唔理住），的確無理由接受Uber的。

乜網約的士apps少咩？

的士商會又係白痴的，市面上網約apps一尐都唔少，FlyTaxi、HKTaxi、85的神、85截的⋯⋯，你見尐的士大佬幾十部手機係前面，再加埋的士台叫車，要約的士一尐都唔難。

你估搭車好鐘意評分咩？

搞個apps做政治show根本唔係解決問題，家陣好鐘意評分咩？評咗分有用咩？人地Uber評分低，個司機隨時無得再做；的士評分低唔通你班車主唔租車俾人？

市民選搭Uber唔係因為網約、評分、方便，係因為唔想上咗的士都要拒載，唔行西隧就唔開車，見住你班的士佬由黃巴站過落馬洲收水貨佬$200就知你地根本唔稀罕做小市民生意，仲要全港跟你地的士交更時間無車坐。講的士問題絕對可以一人一故事，人人都受害過。

政府行政議會有你地的人（譚惠珠），政府唔肯再發牌，的士牌居高不下根本就係利益輸送，當的士唔能夠支援香港交通運輸。咁唔搭Uber可以點？