港航唔只平機票？ 一文睇盡上市大計背後操作

各位好！

我喺呢度會集中寫下財經既趣聞同評論，希望大家喜歡，最緊要係畀多D clap同share出去，多謝大家！

第一篇文章想講既，就係港航。

拿，如果大家搭過港航都知港航同佢系內既HK Express有幾劣，上次貪平搭左港航，本來夜晚8點既飛機，變左第二朝6點，痴線到一個點。

今日睇新聞講，路透社引述消息人士，話港航又會再試過上市，公司最新估值126億港紙。

其實港航上市，真係唔係第一日既新聞。喺2011年個陣，港航就已經話要2012年上市，打算集資5億美元，不過話因為市況差，所以就擱置上市。

到2014年初，香港航空又再準備上市，仲要係「雙幣雙股」既方式上，集資6億至8億美元。港航喺同年8月正式喺港交所交IPO申請，本來目標係2015年3月上市，但因為「市況問題」又再押後，而最後上市申請失效。

2015年9月既時候，又傳出本來希望當年第四季上市既港航，又因為「市況疲弱」又再押後5億美元既IPO計劃。

4年之內，押後3次上市大計，真係唔夠佢玩。

去到今日，港航又話要上市啦，準備集資3.5億美元。大家睇真D條數，就會發覺當中都幾有問題，個集資額愈玩愈縮，同埋對一間航空公司來講，3.5億美元集資額，到底又搞到咩大野呢？

我一直有個感覺，就係呢間公司一直都係扮上市。

有日發開口夢（你就當我發夢啦），就聽到個故仔。

夢入面既我，就同左個港航既高層食飯，當時佢畀左兩張咭片我，一張係港航既咭片，正正常常咁，另一張卡片就係左報既職位咭片（唔記得係大公定文匯）。中間傾計，聽到既係港航最賺錢既部分，唔係做機票個部分，而係賣飛機既部分，因為香港航空係香港基地既航空企業，所以比較容易買到新既客機，再轉售返大陸。

所以，港航係一間航空公司，定係有其他任務喺身，就要交畀大家判斷了。

而今次上市係咪上到呢？我都仲係覺得流流地囉。