淺談英國超市

曼城唔只百佳同惠康

呢篇文講下英國生活日常重中之中嘅一環 — 超級巿場。

英國同香港唔同，唔係來來去去得百佳同惠康兩間超巿咁，呢度有好多超巿，最初嚟到都仲要記下邊間打邊間，而家住落咗先記得晒啲名，亦漸漸分到佢哋嘅定位。

以下排位由我個人觀感排列，亦有訪問下土生土長嘅 G，結合埋佢點睇英國呢堆超巿嘅檔次定位。

下等之選：Iceland、Farmfood、Home Bargain

我個人比較少去 Iceland 同 Farmfood，但就幾鍾意逛 Home Bargain。

呢三間超巿都好常喺啲 Retail Park 度見到，即係集中一個地方有好多間大店加一個超大停車場嗰種購物中心。

比較少去 Iceland 同 Farmfood 係因為佢哋主力賣急凍食品多，其他一般家居日常嘅貨品無咁齊全。G 嘅意見係呢兩間嘢都賣啲平價而較劣質嘅貨品，對窮人嚟講係好嘅，但如果想要有啲質素嘅食物就未必係首選，始終都係主力賣急凍嘢。

我幾鍾意 Home Bargain 係因為佢嘅定位有啲似「日本城」，店入面有一半係超巿，又有一半係家品店咁，立立雜雜乜都有，逛 Home Bargain 幾有尋寶 feel，不時見到啲意想不到又會心動想買嘅嘢，而且一般價錢唔貴又望落都靚仔。但鍾意還鍾意，我無乜 shopping 癮，所以都好少特登去，平時入貨都係去一般超巿較多。

窮人恩店：Aldi、Lidl

Alid 同 Lidl 都係上世紀 90 年代先出現喺英國，相比起啲老牌英國超巿，佢哋算好「年輕」。

呢兩間超巿都係「窮人恩店」嚟嘅，入到去逛下你都會覺得自己窮咗咁，因為入面啲貨品擺位凌亂，會逛呢兩間超巿嘅人又都有樣俾你睇佢哋無咁光鮮，亦似乎好興摷到啲嘢亂晒。

呢兩間超巿啲嘢一般都比較平，但賣嘅貨品感覺唔太穩定，唔係次次都有嗰啲嘢賣，加上擺到亂糟糟咁，搵又唔易，貨品種類又唔齊，亦令我唔係太鍾意逛，因為真係唔好逛。唯一又最大好處係佢平，而且平得嚟質素唔差。

但呢兩間超巿不時又會俾啲驚喜你，佢哋有一行會賣啲正常超巿未必有嘅嘢，兼且又幾平，又係一個尋寶遊戲，瑜伽蓆、露營櫈、狗仔床、工具箱等等，有時真係估都估唔到，幾有趣。

大路中檔次：Tesco、Asda

Asda 同 Tesco 就「老啲」喇，前者 1949 年開業，後者早於 1919 年已出現喺英國，連超巿都有超過 100 年歷史嘅「百年老店」。

Tesco 係我去得最多嘅超巿，分店多，貨品種類多，乾淨整齊，價錢合理，仲有得儲積分換現金券。

Tesco 仲有分接近便利店形式嘅小型超巿 Tesco Express；中大型嘅超巿規模 Tesco Superstore；超大型賣埋好多其他嘢如衫、家品、電器嘅 Tesco Extra。屋企附近如果揸車 10 分鐘內有間 Tesco Superstore 或 Tesco Extra 都唔使愁入貨問題。

G 話 Asda 同 Tesco 喺佢心目中同等屬於大路中檔次之選。我自己之前比較少去，純粹因為住嘅地方附近無大 Asda 但有大 Tesco，而家新居附近就有好幾間唔同品牌嘅超巿，全部都係約 6–8 分鐘車程，好方便又多選擇，所以都去多咗 Asda。

兩間中檔次之選嘅超巿特別係光猛、整齊，每行有標示你知賣啲乜，容易搵到目標貨品，而且擺位穩定又唔亂，都好逛，我覺得如果要比喻，就似香港嘅大百佳同大惠康咁。

中高檔次：Morrisons、Sainsbury’s

講「老」，Morrisons 仲老！1899 已經喺度！而 Sanisbury's 都同樣係「19 世紀超巿」！1869 年已喺英國出現。

呢兩間我都好鍾意，可能我真係屬於中高檔次。XD

呢兩間嘅價格都明顯貴一啲，質素同樣明顯好一啲，入去逛嘅人亦明顯高質啲，有啲似喺香港逛 Citysuper 咁。

我鍾意行係因為啲嘢質素係睇得出又食得出好啲，價錢係貴多少少，但仍然係合理價格。我估個感覺就似行 Citysuper 同逛百佳嘅分別，係貴啲，但不時見到啲特別啲、精緻啲嘅嘢，就算唔買睇下都心情好啲咁！

上流生活：Waitrose、Mark & Spencer

呢兩間都唔弱，人人都識嘅英國品牌馬莎喺 1884 年已出現，Waitrose 只係遲少少，1904 年。睇到呢度，係咪即刻覺得 Lidl 同 Aldi 兩間「窮人恩店」好 young 呢！

Mark & Spencer 大家都唔陌生，賣嘅嘢同香港差不多，當然種類會多啲，但反而價錢就平過香港馬莎。有別於一般超巿，Mark & Spencer 比較似百貨，有衫同家居精品、日用品賣下，但佢賣日常食品嗰 part 嘅超巿亦好好行，不外乎因為好睇、好味、有精緻，多啲特別嘢買，質素亦好有保證。我個人就唔係好多去馬莎入貨，主要唔係因為佢貴啲，而係我懶，想一站式買晒屋企要用嘅日用品，呢樣嘢馬莎滿足唔到我。

馬莎熟食或食品係推介嘅！高質！要送禮我會逛馬莎，但日常生活我都係揀返 Tesco、Morrisons 呢啲大路超巿。

Waitrose 我極少行，佢嘅定位明顯係高級上流人士，所以唔係度度有，有 Waitrose 嘅區一般都係高尚啲嘅住宅區，我而家搬去嘅地方係唔會有 Waitrose 嘅！因為太少行，無咩可以講。

批發超巿 Costco

Costco 行會員制，唔係你想去行就行，要入會俾年費，或者要有朋友有會員卡帶埋你入去先得，張會員證仲要即場影晒相，唔俾你亂咁借人張證入去。

咩人可以入會？做以下行業﹕銀行、政府工、消防、郵差、航空業、教育、警察、軍人。但凡事無絕對，「都巿傳說」話間間 Costco 嘅入會資格都不同，大家都唔係好知點入到會咁，只有親身去試下。

Costco 係批發形式嘅超巿，特點係樣樣都好大件，或一嚟就 pack 埋好多件一齊要你大量買（bulk purchase），當然佢賣點就係「大件夾抵食」，價錢除返開平啲。

但亦有人好精明眼咁發現 Costco 雖然普遍嚟講係抵買，但亦唔係樣樣嘢都平通街，真正精明的話都依然要同其他超巿格下價，譬如 Lidl、Aldi 呢啲都會有個別產品有機會平過 Costco。

「大件」亦唔一定有好處，因為可能會囤積好多貨，囤到你過期都未食完用完，咁就變相由慳錢變嘥錢。

好多「都巿傳說」話 Costco 入面成日老是常出現嘅品牌 Kirland 其實暗地係好多大牌子嘅 re-brand，高質但廉價，但其實普遍就算唔係呢個牌子都好，貨品都係幾抵、質素 OK、種類繁多。

我都有去 Costco，去得最多係去出面油站入油，因為真係平通街。

至於超巿我都有逛，因為佢都真係包羅萬有，連 80 吋大電視又有、露營用品又有、花園大型擺設又有，底衫褲、書、玩具、食品、飲品⋯⋯有人形容 Costco 為成人版嘅玩具反斗城，都不為過。不過我一個人住，用到嘅有限，所以都未至於好經常去 Costco 入貨，一個月逛一次都有嘅，入嘅亦只會入啲可以放得耐啲或自己經常食、用嘅嘢。

但至於我做 F&B 開鋪做生意嘅朋友就好鍾意喺度大手入貨喇，生意人都嚟得，咁應該真係抵。

曼城中超

「中超」係中式超巿嘅簡稱，曼城大型嘅「中超」主要有 3 間，3 間都係連住一間酒樓：

• 榮業行 ＋金煌酒家 （巿中心）
• 志業行 ＋海寶酒樓 （曼城北）
• 永興隆 ＋ 太湖酒家 （曼城南）

我最常去係「榮業」同「志業」，總要入下啲煮中餐嘅調味料（李錦記嗰啲）、港式飲品（維他奶）、零食（熱浪、山楂餅）、中式食品（粉絲、出前一丁）、中式餐具廚具等。

我成日話移民去曼城唔太怕「食物思鄉症」，因為呢幾間超巿再加酒樓都已滿足到唔少，雖然唔可以話應有盡有，但都算係好齊全了。當然，買中式嘢或港產貨都好，切忌同香港本身嘅價錢比較，記住人在英國，買到香港嘢樣樣都貴係正常，覺得貴就一係唔好買，融入下英國本地人口味。

唐人街都仲有其他無咁大型嘅「中超」㗎！隨住而家嚟咗咁多香港人，每個區亦多咗啲小型港式士多咁。

「韓超」喺巿中心都有間，叫 Oseyo，貴啲，但啲嘢都 OK，不過因為我而家揸車多，巿中心泊車貴又唔方便都好少去。

便利店 Co-op

便利店都有好多，最常見一間係 Co-op，無乜特別，都係便利店一間，但呢間係算最乾淨、企理、整齊，正常便利店有嘅嘢都有咁，個人特別推介係 Co-op 自家品牌嘅 Tiramisu，好味！味道絕對唔輸俾 Mark & Spencer！

印巴士多仔

我都會有時貪方便去下啲印巴士多仔，譬如只係想買樽奶，唔想特登揸車去大超巿，就會去屋企附近啲轉角士多買枝奶咁，雖然價錢唔一定比大超巿平，但因為去消費時嘅心態係「目標為本」，唔似出車去大超巿咁要滿載而歸，所以變相又都慳咗錢。有時仲會發現唔少佢哋獨有嘅麵包、甜品、雜貨、調味料等等，不過嗰啲口味就唔太啱我喇。

埋嚟睇，埋嚟揀！CLAP & LIKE！

如果睇完/鍾意呢篇文，請 Clap Clap 拍拍手話我知！
多謝你睇到最後！「拍拍手」唔使錢，如果喜歡呢篇文，希望你「拍拍手」話我知，如果好鍾意，不妨拍多啲 (可拍1–50下)！

以下目錄係介紹呢期最新文章同推介其他舊文，歡迎嚟慢慢坐、慢慢睇。