津巴布韋又有高通脹啦

三年前我寫咗篇《仲講津巴布韋高通脹？ 人地通縮緊啦！》，內文講津巴布韋改用美元及Rand為法幣後，再無控制貨幣供應嘅能力，無法控制銀根。由於津國有貿易赤字，美元外流令國內嘅流通貨幣愈黎愈少，貨幣嘅價值上升平均物價下跌，即係通縮。

但你睇下圖津巴布韋通脹率，你可以見到2014年底至2016年底出現低通縮，但去到2018年底津巴布韋通脹又突然抽升，最新數字係56.9%。

其實係2016年底，津國就推出所謂嘅Bond Notes供市民作日常交易之用。

• 因為市面上太少美元，津國政府希望用Bond Notes作為替代交易工具
• 央行指每一元Bond Note等同一美元
• 但因為Bond Note並無足夠美元支持，津國人並唔信任嘅個「代幣」，其作為交易工具嘅作用並唔理想
• 黑市匯價，每一美元長期可以兌多於一元Bond Notes，即係Bond Notes相對唔值錢。而創造新幣亦令貨幣供應上升。

津國央行之後鼓勵市民以電子轉帳作為交易工具，推廣所謂嘅「RTGS餘額」（RTGS Balances）

• RTGS其實係銀行業常用嘅Real Time Gross Settlement簡稱，即係即時銀行轉帳。
• 換言之，津國央行希望以電子過數作為交易工具，希望解決實體美元不足嘅問題。
• 但津國政府係創造新RTGS餘額，亦令有擔心大量增加貨幣供應
• 有報道指，政府推行一系列提升競爭力嘅福利政策時，係以新發RTGS餘額支付呢筆財政開支。即係如同直升機派錢，央行直接印新錢支付財政開支。

另外，近年津巴布韋推外匯管制政策，礦物、旅遊、煙草等出口賺取外匯後，要即時向央行提交大部份嘅外匯，央行以RTGS餘額「兌換」外匯，每一美元兌一RTGS餘額

• 問題係，黑市匯價每一美元兌超過一元RTGS餘額，即係政策令出口商利益受損

央行係2月20日嘅新貨幣政策發佈中指出，更大嘅問題係津國同時有最少三種貨幣並行 — 美元、Bond Notes及RTGS餘額

• 三軌制下，每件貨幣有三個價格，而不同貨幣之間嘅匯率有時有更變，令營商及日常交易愈來愈難，對實體經濟帶來打擊。
• 特別係近月通脹急速抽高，令匯價更為波動，三軌制嘅問題愈見嚴重

因此，2月20日央行公佈貨幣制度改革:

• 重點係為廢除三軌制，央行決定將所有計價單位（美元、Bond Notes及RTGS餘額 ）統一為RTGS Dollar
• 美元唔再係首要嘅貨幣單位，新立嘅RTGS Dollar取而代之
• 央行亦強調將採用貨幣總額作為貨幣政策目標，即以維持貨幣供應穩定為目標
• 央行亦會正式放棄一元Bond Notes等如一美元嘅政策，改為由市場為RTGS Dollar兌美元匯價定價

到底，呢一系列政策可唔可以控制已經抽升到50%以上嘅通脹？值得留意。

Originally published at econreporter.com on February 23, 2019.