法比終極一戰，只差一個轉身

如果話法國對比利時呢場世界盃準決賽係冠軍前哨戰，我諗都冇咩人會反對。兩隊喺今屆賽事越戰越勇，球星雲集之下衍生多個矚目對碰，就連教練團中都有迪甘斯對亨利，邊一隊贏波，入到決賽對英格蘭或克羅地亞都應該值得睇高一線。

法國今場有中場馬杜迪坐完波監回歸，杜利素可以返去坐板凳，其餘人選維持不變，照舊一個典型嘅 4–2–3–1 陣式。比利時教練馬天尼斯繼八強戰對巴西之後，再次作出多個針對性部署：正印右翼衛梅尼亞停賽，上仗表現優異嘅沙迪利今場移師右路，中場起用丹比利支援兩個爆炸頭，其中費蘭尼專責招呼曼聯隊友普巴，反守為攻時強攻法國右閘、身型較單薄嘅柏華。比利時嘅陣式喺進攻嘅時候係 3–4–3 ，沙迪利好似梅利亞咁頻頻助攻，而防守嘅時候就變返四人防線，華湯根由中間偏左移向左路，夏薩特亦要回防助守，應付麥巴比同柏華嘅攻勢。

上半場基本上可以分成兩截：頭 23 分鐘係比利時圍攻法國，不時見到一對中堅甘賓尼同艾達維特都壓到上中場附近猜波，由右慢慢轉到左，又由左慢慢轉返右。夏薩特係前線最搶鏡嗰個，有兩腳埋門都相當近磅，多得法國門將羅利斯同中堅華拉尼，法國半場保住清白之身。不過戰況同時提醒咗大家柏華其實原本唔係法國正選：只係曼城嘅文迪成季受傷患影響而冇乜態而已。

法國故意地縮得比較後，唔畀太多空間比利時快速突破。簡迪繼續演活防線第一道屏障嘅角色，而普巴喺反守為攻嘅時候三番四次送出致命直線畀麥巴比快放，只可惜法國嘅後續執行失諸交臂，否則面對 shaky shaky 嘅比利時防線，其實有條件憑速度壓倒對手而先開紀錄。

上半場嘅後半段開始，法國開始壓返上啲，感覺上好似係「哦，乜係咁多咋嘛？咁我嚟喇」。基沙文、麥巴比同基奧特面對住比較慢嘅比利時防線都有一定優勢，普巴助攻亦令到丹比利相當辛苦，又推又拉都搞佢唔掂。好在比利時門將古圖奧斯繼續有水準演出，幾乎讓大家將佢喺車路士失色嘅一季好似粉筆字咁抹咗佢。

形容法國對比利時為「高手過招」絕不為過，如果法國係睇定嚟食、以靜制動嘅梁朝偉飾演嘅葉問，咁比利時嘅前場緊迫就似章子怡飾演嘅宮若梅，「六十四手」華實並重，壓得對手幾無喘息空間。雙方都有條件致勝，亦深知稍一不慎即會落於下風，是以拳拳到肉，球迷越睇越興奮。

下半場初段法國更加主動進攻，基奧特禁區內頂住甘賓尼嘅壓力，嚟個靚轉身施射被救出，後續嘅角球就見到安迪堤攝前柱，早費蘭尼一步頂入。

比利時落後之下必須強攻，將攻守均見吃力嘅丹迪利抽起，換入右翼美頓斯，後者好快已經交出兩次優質傳中，其中一次費蘭尼嘅埋門只差兩三個波位，差啲扳平。

比利時複製返對日本落後之下，兩翼吊高波畀盧卡古同費蘭尼埋去湧嘅方程式，一度搞到法國禁區風聲鶴唳。好在安迪堤再無重蹈分組賽防守高波時舉高手申請十二碼嘅失誤，而專注防守嘅普巴亦有身高優勢去頂住一次又一次嘅斬中。

如果大家記得《一代宗師》嘅劇情，大概會記得葉問形容宮若梅「只差一個轉身」。費蘭尼守唔住安迪堤嘅頭槌固之然，但成隊比利時又何嘗唔係？當兩邊斬中此路不通，天才橫溢嘅迪布尼喺關鍵時刻又未能挺身而出，只能靠夏薩特個人上腳突破，但法國連基奧特都返埋禁區邊落腳鏟波，成架雙層巴士泊喺禁區咁款，而比利時可以變嘅招只係由卡拉斯高入替費蘭尼 — — 而呢位踢緊中超嘅左翼球員今屆賽事好似冇幾腳好波。

戰術保守到接近孤寒度縮嘅迪甘斯，喺最後十分鐘換走中鋒基奧特，換入防中安桑斯，用意明顯不過：一球魚生粥僅熟就夠，又或者睇死你比利時再無板斧。當你見到盧卡古一而再、再而三地同埋門機會擦身而過；美頓斯、卡拉斯高同沙迪利意欲上腳推進但係畀法國睇穿晒嘅時候，你不禁懷疑，自己緊嘅係咪兩年前或四年前嗰隊各自為政嘅比利時，而唔係今屆眾志成城嗰隊。

補時階段有六分鐘，不過頭嗰兩分鐘都畀法國喺前場角球旗附近浪費咗。麥巴比甚至因為阻延比利時攞返個波開界外球而領黃。不過唔緊要啦，入到四強人人黃牌都洗底，唔影響出席決賽嘅。不幸地比利時喺 70 分鐘之後已經係強弩之末，補時長短，以至巴舒亞爾係咪入替咗，都完全唔重要。

「黃金一代」似乎係一個咒詛多於祝福，葡葡牙 2004 年歐洲國家盃如是，比利時亦如是。對於法國同迪甘斯嚟講，防守嘅專注同球星一兩下嘅爆發就已經足以晉級，戰術上嘅創新或者進攻嘅流暢都只係次要。係好殘酷嘅，就即管睇下英格蘭或者克羅地亞可否為今屆世界盃提供另一個答案。