民協左右做人重難過做鬼 給我一個投票的理由

九西補選的事，好明顯係氣氛冷淡，選到頹咗廢咗。我無睇論壇呀，唔係成日上fb，亦少feed選舉 post，連甚麼登的選舉 post也少。只牽涉政治的政治（牽涉政策就不在只限）成為圍內嘢，即係啲人鍾意行山釣魚打機咁，其他人係唔明的。

曾經有期全民皆政治造成社會家庭夫妻撕裂，而家好啦，社會和諧，政見不再相干。政治花生不再好吃，得閒唔好睇下姜濤 & Mirror（又係圍內嘢）。

而家接觸選舉，真係喺街到會見到人助選（今次李卓人係好過上次姚松炎），同埋同從政人士聚下先（順便）知多啲。

民協左右做人重難過做鬼

有人鬧點解民協放遠手腳唔落力唔幫李卓人洗樓拉票等。民協中人話，去洗樓，反而被街坊鬧，做乜唔幫馮檢基。街坊係認人頭，認咗咁多年好難改，你又好難令佢明白係阿基自己走喎，唔係民協趕佢走喎，所以佢哋都好難做。更重要係你知民協係靠區選，都要睇住區選盤數做，單對單唔可以得失咁多街坊，所以難搞呀。

然後又被人問：有無幫手train阿人辯論。「無呀，我有咩資格呀」阿陶都話：「阿人一把年紀無得 train 咖喇，係咁就係咁。」事實上有幾多人睇論壇呢又？

跟住又有人問，做咩小麗唔入民主黨，入工黨呢。人哋白鴿俾你做家禽先得咖，咁多人排晒隊，點會咁易讓個山頭俾你呢。

真係唔知鹿死誰手

講勝算，本來睇阿人係輸硬唔駛玩，阿基拿回萬幾兩萬票就完了。

但原來另一邊又有隱憂。民記唔想被人上，上到下屆留起度又選點搞呀，所以都係頹幫嘅。知名度係好重要，同番當年同期的新聞小花傾，原來有單咩「剪呔」，但我當時太細個喇真係唔知。當時《壹周》重係好有影響力的說…

啲人話阿基兩邊界，一開始我覺得點會呢，建制鐵票來。但市民都係投有知名度的，咁界埋建制都唔出奇。

奇就奇在話，劉細良話驚阿基界太多，界死陳健康，所以派佔中人士去撐佢場，驚佢贏太多。

咁就奇喇，如果係咁，叫阿周生出嚟，應該係令建制覺得佢更建制，所以係界更多建制，而界更少泛民喎。

不過周生真係好唔出名，應該無乜人留意。係搵就搵呀私煙姐去，但佢好似婚後從良了。

所以泛民中人話，阿人應該都贏到嘅咁話。

咁投定唔投呢？應該話會不會行入票站呢？

本土派朋友斬釘截鐵講咗喇，寸步不移的。

深黃呢都係一定會機器投。

但呢個世界有啲人，係差一個入票站的理由啫。