林鄭三招繼續虛張聲勢無料到

今朝極早上電台講咗林鄭三招，本身有電視台找我，但真係要開工，時間夾唔到。

1. 一手樓空置稅：無乜用，所謂9000個空置，其實得3000個係多過一年，計及發展商已經租緊出去的一手單位，真正空置得1500個，唔值得搞咁多嘢。有人問，有咗呢單，可能會搞更多稅，方向正確呢，咁我點知佢有無下一單，呢啲嘢方向正唔正確係睇細節.

2. 居屋售價同市價脫勾：本身在「團結香港基金會」寫份報告都係咁講，當時係寫「用成本價」。就資助房屋而言，目標係資助人，又有資產審查，無理由過到資產審查嘅人供唔起，過唔到嘅先供得起，咁樣嚟玩啲香港市民。但資助房屋呢舊嘢本身適唔適合喺香港咁做，係另一問題。

3. 將私樓地撥去起公營房屋：在需求不變，私樓地供應減少，整體土地供應一樣情況下，私樓樓價必再創新高，根本係幫地產商托價。我想話 2017年年尾那個居屋項目白表中籤好似係 1/280。咁我俾你撥地撥到中籤率 1/200，甚至 1/100，咁其餘199/200, 99/100 嘅白表申請者點呢？私樓再創新高，大部分人都係買唔到樓，中唔到籤繼續捱，咁樣係促進社會穩定？你又唔似得星加坡，香港根本無咁多地，而家星加坡結婚後等 3–4年就可有組屋，你同我講 40年後大家都有居屋，in the long run we are all dead 啦。想抄新加坡，睇下你咩新鮮蘿白皮先得咖。如果唔可以將中籤率大幅增加令排隊的人有希望，呢單嘢只係輕微地製造多少少贏家咋。

真正要解決房屋問題，唔係靠公營房屋呀，因為可以平買平租，供應多多都唔會夠。真正搞係要打通公私營私分割市場，用私人供應再搞冧個市令到大家在市場都買到樓啊。要搞分割市場，cover 80%香港市民，首先你要公營充足，但可見將來公營供應都唔會充足。政府又好驚搞冧個市，社會動蕩，無喇無喇。而家真係等幾時來個災難大家攬住死咖啫。林鄭呢啲虛招真係純粹用來掩飾佢乜都做唔到。