有少少搞笑：老師學生對話
派考試卷，對卷中。
老師：「呢題個答案係338433，不過如果你寫337434我都會俾分你。」
（估唔估到係乜嘢科？呢段對話之後開估）
學生舉手：「我寫338434點解錯架？」
老師稔都唔稔，問：「咁你寫既字似唔似338434先？」（does your handwriting looks like 338434）
學生：「唔……啲３有啲似５(some 3 are like 5)……但係我真係寫338434架，咁有冇分啊？」
老師：「無啊，你都話啲３似５咁，咁我唔會俾到分你架。」
學生：「唔公平啊，我明明識！」
老師：「咁你下次就寫得好啲，考試就係咁，改卷老師睇唔到就係無分，唔係你哋個個寫到亂七八糟之後話識咁點算啊。」
（開估：地理，對緊坐標）
對卷，一學生大叫：「我全部啱晒啊除佐一題！（I got everything right except one question!）」
老師：「咁你咪唔係全部啱晒囉……（then you don’t get everything right…）」
英國好多學校都用Hegarty maths出數學功課，而Hegarty maths係由數學老師Mr Hegarty創辦既。最近學校開始轉用另一個系統，呢個系統係會隨機出問題所以啲學生好難可以抄功課，仲成日有檢查問返你十題前個答案係乜所以一定要用手計下寫返低啲答案。
學生１：「咁煩，點解要轉？」 老師：「因為Hegarty math年底就會無。」 學生２：「吓，點解啊？？」 學生１：「係咪學校無錢買License啊？」 老師：「唔知，我淨係知Hegarty math個網站會停運。」 學生３（認真）：「係咪因為Mr Hegarty死佐？」
有個老師叫Mr Jackson。我個自閉症學生成日要填老師名時都填佢做Jack，咁就算佢真係姓Jack，佢哋都一定要寫Mr Jack， 我次次都提醒佢加返son再加返Mr。
今日佢無端端上緊堂問：「Sir, what's your name?」 Mr Jackson窒一窒：「Mr Jackson……」 仔：「what's your first name?」 Mr Jackson：「That's not important right now」（呢度啲仔真係好鐘意問九唔搭八問題，而我哋通常都係話That's not important right now） 佢（認真）：「Is It Michael?」
阿sir都忍唔住笑佐：「I am not Michael Jackson, thanks for asking. 」
之後落堂，Mr Jackson同我講話阿仔得閒都email佢叫佢做Jack，佢仲以為阿仔會問佢係咪叫Jack，仲俾我睇佢放假時收到既email 「Jack! I have done homework. Bye!」
救命……我聽日要教阿仔寫email
呢度啲仔唔知做乜，成日上堂都會除鞋，間唔中落堂都有仔話：「我隻鞋唔見佐！」——因為俾同學踢佐唔知去邊（有時係無心，有時係專登）。
老師其實都見怪不怪唔理，點知今日老師播地理教學youtube片既時候，坐第一行既Ｐ仔除完鞋之後開始除襪。
Ｐ仔除完一隻襪之後，仲若無其事咁放佐隻襪喺枱面。佢旁邊個同學望住佢呆佐。我心稔，你真係當呢度係自己屋企睇緊電視？
佢開始除第二隻襪，老師見到佢枱面有隻襪，皺眉：「Ｐ，你到底做緊乜嘢啊？我哋唔想喺度見到一隻腳……（P, what on earth are you doing? We don’t want to see a foot here…)」
Ｐ仔好明顯唔知自己除緊襪，尷尬：Sorry Miss同即刻著返隻襪。
因為學校唔夠電腦科老師，所以我要拍一個體育老師客串教電腦。
體育老師跟powerpointy讀一陣就會拋個波俾我教，同埋學生有問題都係我答。學生見到我教書都有啲驚訝，我稔住佢哋以為我係Learning support assistant唔會教書。
今日上堂學生問問題老師又叫我答，我答完之後，學生問體育老師：「你做乜唔答全部問題都係Miss思（佢哋因為讀唔到我個姓所以真係叫我Miss思／Miss痴）答架？」
體育老師：「你睇我一身打扮都知我係教體育，唔識呢啲，所以要Miss思幫手。」
學生：「Miss思，你喺邊度學呢啲架？」
我：「我喺大學學。」
另一個學生驚訝：「Miss，你讀佐大學！？你幾多歲！？」
原來佢哋一直以為我係敝校嗰啲中七畢業想試下喺學校工作既實習生啊。
