![https://miro.readmedium.com/v2/resize:fit:320/1*[email protected])">](https://miro.readmedium.com/v2/resize:fit:320/1*V_s_sGV1dnSHf7LHvA2pUQ@2x.jpeg)%22%3E){kind=link}
【曼城周記】ToNick 英國演唱會
2023 ｜W6
周記，係記貝星人一周之事，包括大事，小事、有事、無事、瑣事、心事、無聊事。
水分充足，營養欠奉，例牌長文，敬請慢用。
今期摘要：
- 睇ToNick演唱會
- 唔見銀包
- 同鬼佬慶元宵
- 重新學琴
- 梳化退款後續今個星期最想分享係去咗睇 ToNick 演唱會，但入正題之前，先講下尋晚「現眼報」事件。
現眼報
元宵佳節呢晚，同鬼佬 G 出去附近 Town center 据個扒食個便飯，揸車返到屋企，佢話唔見咗電話。
我反眼笑佢："On9 British！"
嗱嗱臨打返餐廳問，職員真係執到佢部電話，算佢好彩，但我就要揸車車返佢去餐廳拎返部電話（重申：萬中無一唔識揸車嘅鬼佬都俾我遇到）。
拎返電話，安心揸車返歸，正當我諗住除件外套上房掛起，發現衫袋入面嘅銀包仔唔見咗！！！
佢不但無笑返我 On9，仲好好咁同我上返車搵下有無跌喺車度，又打返電話去餐廳幫我問有無執到銀包（但無），我自嘲 On9999，當然唔開心，亦覺得煩，銀包入面雖然無乜錢，但就有駕駛執照、信用卡、提款卡。
佢雖然無笑我，但就話："It's karma（因果報應），very drama！"
何止報應？仲要係現眼報，immediate karma! Dramatic karma! 如果呢個世界真正做壞事嘅人啲報應有嚟得咁快就好。總之，小心地滑啦吓！我以後都唔敢笑佢喇！
又，銀行 App 呢個時候就好有用，可以即時凍結張卡唔用住，萬一俾有不軌企圖嘅人執咗都用唔到啲卡先，然後亦可以直接喺 App 度申請報領新卡，盛惠 £5，都無得唔俾啦！幸好前日架車入滿油，又去咗超巿入貨，呢幾日未補領到新卡前，拆住僅有嘅幾十鎊利是錢捱住先。
同鬼佬慶元宵
講開元宵「現眼報」就順便講埋元宵點過。
話說我話俾 G 知「正月十五元宵係中國情人節」後，佢好興奮話不如慶祝呢個情人節。
即係咁，本身就算我喺香港時都係食個湯圓咁，無乜咩慶祝活動，講到猜燈謎，中文燈謎佢唔識猜，英文謎語又唔係嗰回事，於是我話都係出去食過飯加煮下湯圓咁啦！同提佢「元宵」月亮一定係滿月，記住睇下。
佢嚟到就帶咗一紮超巿買嘅花同一盒寫住 "Lots of Love" 嘅吉百利朱古力嚟。我知港女就實笑「送啲咁樣嘅嘢不如唔好送」，不過我嘅心態係「收禮物係收心意」，所以都係欣然接受有人花心思對自己好，惜福，送乜就唔使太在意喇！
G 話一紮花加一盒朱古力係情人節指定動作，而我哋當晚睇戲的確又見到戲中個鬼佬都係拎住紮咁上下細細紮嘅花加一盒朱古力搵戲中女友（有無咁橋）。講到情人節女仔送朱古力俾鍾意嘅男仔表白嘅習俗，G 話喺英國從來無聽過，當然更加無聽過日本人 3 月 14 日「白色情人節」呢樣嘢，佢覺得勁新鮮。
第一次食湯圓
簡簡單單喺附近搵間餐廳食個飯，夜晚就整咗個芝麻湯圓俾佢食，話佢知食湯圓有「團圓」嘅意思，同埋一定要食雙數。
經歷過「恐怖月餅」嘅陰影（佢覺得月餅超級難食，將鹹嘅蛋黃放入甜嘅蓮蓉入面係難以接受嘅事），煮好碗湯圓後，我同佢都各自各擔心，但佢有度好，驚還驚，佢點都試下先嘅，結果係下年可以再煮（假使下年仲一齊的話），佢接受個芝麻餡，但對湯圓皮就一般。我發覺基本上佢對啲稍為質感特別啲嘅食物都係抗拒。
重新學琴
元宵活動除咗食下湯圓都無乜特別，呢日另一活動係作為鋼琴&小提琴老師嘅 G，收咗我呢個唔俾學費嘅新學生，曾經考過 3 級鋼琴嘅我跟 G 由零開始學鋼琴。
本身以前都係出嚟做嘢大個咗先學琴，手勢唔好，根基唔好，大人真係手指硬晒唔靈活。之後學 Pop Piano 用彈 chord 嘅方法彈琴，就更加進一步令我睇五線譜嘅武功近乎全廢，於是真係由零開始學起，而 G 就禁止我再睇 Pop Piano 嘅簡譜，要我重新習慣返睇五線譜。
跟鬼佬學琴第一難度係全英文，一拍、兩拍、半拍英文係乜？我完全唔知，我要再惡補記下。
跟男朋友學琴嘅另一難度係唔驚佢又唔專心，我都好懷疑究竟我哋嘅師生關係 work 唔 work，我講笑問我呢位新鋼琴老師：
我笑問：「你有無錫過女學生呀？」
佢答我：“I’d never work again if that happened with anyone else.”
都預期答案啦，點知仲有下文：
G： “Although a married woman did flirt with me hard! I just continued teaching her, pretend I didn’t notice. But not only was she married, but her husband bring the child every other week! It was a bit much.”
都唔係 “a bit much” 啦吓嘛，又老公又仔，都真係 TOO MUCH 喇啩？但我忘記咗追問返點樣叫做 “flirt with me HARD”, 呢件事要再跟進下先！（笑）
G 話右邊嗰本琴書老過佢同我，因為係佢阿媽細個學琴時用過嘅，嘩！代代相傳，而家輪到用嚟教我！
繼續廣東話
呢個元宵大家都好勤力，我學琴之餘，G 亦好好學地繼續學廣東話。
G 表示 Lesson 4 係佢覺得最有用嘅一課，特別係學識問「呢個係咩呀？」、「點解呀？」，同識表達「好開心 / 唔開心」、「好忙」、「好攰」，睇嚟我要諗下下次教啲乜係實用啲嘅句子同生字。
"On9 8poh on lun 9 diu!!!"
事實上，G 都學有小成。今日佢搭火車經歷到大英帝國火車轉月台但唔通知乘客（哈，英國生活日常啦！），然後佢發以下短訊俾我：
“My train changed platform, but no warning or notice!（你個祖國係咁上下，你估日本咩）Nothing! On6-Gau1 8poh onlun9 diu!!!”
"On6-Gau1" 嘅 6 同 1 都係「粵拼」標音，好準確吖！"Onlun9" 大家都明了，我都唔知我有教過佢，明明我自己都唔會講；"diu" 就肯定有教嘅，佢都無用錯；至於 "8poh"，我知佢鬧緊「八婆」，但就唔知佢鬧邊個喇。
明明 G 講英文都唔多覺佢會講粗口，但廣東話未識講幾多就已經咁爛口，真係愚子可教。
又，G 鍾意咗食 Indomie，今個星期又買多幾包，我今次叫佢買埋出前一丁！
ToNick 5949 Miles Connected
「我哋將香港帶咗過嚟！」
5949 Miles，就係香港同英國嘅距離，上星期四晚，我同工程師弟弟一齊企住睇 ToNick 喺曼城大學 Academy 2 Hall 嘅演唱會。
其實鍾意 ToNick 嘅係 90 後工程師弟弟，80 後嘅我其實無乜聽過 ToNick 嘅歌，我係因為《一秒拳王》而欣賞恒仔，然後先留意 ToNick 嘅歌，亦係因為今次買咗飛聽演唱會，我先臨急抱佛腳煲下 ToNick 嘅歌自習下先。
一煲，鍾意咗。 睇埋個 Concert，更鍾意！
我本身其實好少聽 Band，因為有啲怕嘈，但聽 ToNick 嘅歌就係嗰種有少少嘈，但又唔係好嘈嘅感覺，最鍾意係佢哋唔少歌係會聽到我一邊揸車一邊陰陰嘴笑。
- 《舐嘢》：拍拖拍着條女煩又走晒樣嘅感受。
- 《衰喺個掣度》：一語相關，係香港人都明衰喺個掣度！
- 《玩物喪偶》：男人偷偷買玩具係有少少錯嘅，嘻！
- 《T.O.N.I.C.K.》：認識 ToNick 嘅一首熱血好歌。
- 《海膽生毛》：有陳百強《地下鐵》影子嘅旋律，但配以胳肋底海膽嘅味道。
- 《啱呀》：好啱點俾所有老細聽！
- 《我不能忘記你》：ush ush ush 嘅 AV 情懷。
就係咁聽下聽下，好多首都覺得好有趣味，好有創意，同好廣東話！
聞說 ToNick 呢隊 Band 個名就係話用音樂刻劃生命，紀錄真實生活感受，就係「ToNick」嘅意思，我覺得佢哋嘅歌真係好生活化又好熱血。
去到場館現場外面，排晒長龍等入場。
我問工程師弟弟：「乜 ToNick 有咁紅嘅咩？」（我真係唔識）
而睇完個 Concert 我都鍾意咗 ToNick，而喺場內 ToNick 話嚟英國開 Show 係想將香港帶嚟英國，嗰一下我有種感觸同感動。
我相信在場嘅香港人都知，呢一兩年間咁多香港人嚟咗英國並唔係香港人特別鍾意英國，而係我哋嘅屋企俾咗好多留唔低嘅理由我哋，人在異鄉有新生活、新希望，但一樣有好多新問題、新挑戰，人生要離開成長故鄉喺異地由零開始，真係唔係一件易事，有人喺故鄉用我哋嘅「鄉下話」送上一聲問候，嗰下係暖嘅。
舊屋還匙
星期日，返舊屋還返鎖匙俾舊屋業主嘅代理。
當然會撞到舊同屋主，打完招呼，我同一齊同行嘅 G 就執拾埋少少執剩嘅嘢，再退埋條匙，然後我就正式完結咗喺舊屋 1 年零 9 個月嘅租期。
臨走放返啲嘢上車，一轉身舊室友已走咗，頭也不回，一句再見都無講。唔知會唔會再見呢？但點都好，都叫好來好去就算了（勉強算係），有時都無謂奢求太多、在意太多，心神留俾真正對自己好嘅人先係最實際。
見唔見都好，我哋都仲有啲手尾要跟嘅，譬如佢要交返 1 月council tax、電費、煤氣費俾我，仲有要退返當初租屋嘅按金（收返我就可回返少少血），我亦要退返預繳咗嘅水費俾佢咁。
G 同工程師弟弟覺得室友頭也不回亦唔道別咁走係好事，男人有時比女人更絕。
新屋搞掂晒
隨住啱啱呢個星期裝埋屋企 Wifi，屋企入面要整嘅嘢基本都整好喇！
「無 WiFi，毋寧死」
「無 WiFi，毋寧死」一向係我嘅信念，但住喺郊區嘅 G 就更高層次，佢話今時今日 Wifi 就同食水一樣咁重要，佢覺得佢居住嗰區網絡咁差基本上係侵犯佢人權，佢話現今科技基本上已掌控咗某啲基本人權。
好《黑鏡》。
之於上星期周記有提及嘅 "Allen key Sofa bed 意外"，今個星期已退款成功！有驚無險，攞返啲錢！Yeah！英國人辦事係咁上下，都唔知有無驗貨，反正算快咁退錢就好了。
New year, new start!
希望大家今年都有個好開始！
（今集完）
新鮮出爐！呢期最新文章
埋嚟睇，埋嚟揀！CLAP & LIKE！
以下目錄係介紹呢期最新文章同推介其他舊文，歡迎嚟慢慢坐、慢慢睇。