【曼城周記】秋風蕭蕭愁煞人
2023 ｜ W38
周記，顧名思義，即記貝星人一周之事：一切大事、小事、有事、無事、心事、瑣事、無聊事。
水分偏多，營養欠奉，多屬長文，敬請慢用。
This week’s highlight:
-熱浪一日消失
-秋風蕭蕭愁煞人
-慳家DIY整車
-一個人睇《入樽》
-新病人健康檢查
-教鬼佬唱《圍城》
-Holmfirth美食節
-公司係垃圾堆填區
-香港人最叻係賺錢熱浪一日消失
星期三朝早嘅我：
「今朝 8 度？！前兩日明明 28 度⋯⋯」
上星期明明仲熱到接近 30 度，要拎把風扇出嚟，點知呢個星期忽然入秋，熱浪話走就走，一朝早起身得返 8 度。
雖然話嚟咗英國兩年幾都應該慣咗英國天氣係咁變化莫測、一日四季、時雨時晴，但都仲係覺得佢變得太快，衣櫃都未換得切季呀。
今個星期就係天氣差，大部分日子都係朝早好清涼，多雲加間中有雨，而溫度介乎 10–20 度（係呀！一日 10 度溫差係常態！），怕熱嘅寶寶表示覺得好舒服，我就還可以咁啦，我都係鍾意夏天多啲，暖啲又多啲陽光。
精神體力心情變化
忽然入秋，夜幕提早低垂，氣溫突然驟降，令我今個星期生理、心理都出現明顯變化。
生理上最大變化係每日都無乜精力，好早見攰，晚晚 10 點打後就已經好眼瞓，仲要係攰到一秒入睡嘅境界。心理上就係無心機、無動力，不論跑步定練琴都唔多想郁，放工淨係想攤喺度打機、睇電視做廢中。
但 Why not? Why can’t? 我又唔係漫畫英雄，又唔係政客高官，又唔係父母督住放學要做功課、溫書、上補習班，耍廢咪耍廢囉！
所以，今個星期係有啲少頹。
慳家又 DIY 整車
今個星期最大嘅好人好事莫過放工程師小弟弟幫我整返「汗血寶馬」塊爛鏡同指示燈，慳返啲錢唔去車房。
今次真係無心機再整架車，唔想使錢，幸好身邊有啲技術人士可以幫我手慳慳錢。
#好人一世平安
一個人睇《男兒當入樽》
《男兒當入樽 THE FIRST SLAM DUNK》張戲飛 £5 咋！但泊車都 £5.2，哈哈！
星期一夜晚，喺無人陪之下，一個人夜晚去睇戲，去到停車場無車、戲院又無人咁，靜英英先覺得喺英國無乜事都係唔好一個人出夜街喇，呢度治安又唔係好。
但點解一個人去睇戲呢？G 聽到係日本籃球動畫話無乜興趣；工程師小弟都可能唔同年代嘅緣故，都話無興趣；另一 30+ 工程師朋友想睇但走唔開，因為要慰妻同湊女。雖然無人陪，但我依然好想睇，所以就單拖去睇戲。
套戲其實睇得我幾熱血同幾感動，始終《男兒當入樽》真係中學時嘅青春回憶，可以喺英國呢塊「異地」睇返日本動畫更加難得，當年啲熱血返晒嚟，今次劇場版仲幾感動。
後感可睇下文﹕
掛住阿媽
雖然我撞車後，我媽咪一個電話都無，只係我 Whatsapp 佢時叫我小心啲，但我知道佢心入面都關心我嘅。
自從香港解封後，大家都係咁去旅行，日本日本日本，韓國韓國韓國，台灣台灣台灣……我媽咪都心癢癢，呻無伴同佢去旅行，亦無人陪佢睇戲 (以前呢啲嘢當然係我做)。
佢仲講咗句咁嘅嘢﹕
「一個人去睇戲同旅遊，感覺很悲涼。」
聽完之後，我個心都有啲嗱住，有種內疚感油然而生。
以前我一至兩年點都會同佢去下旅行，睇戲就不時都係有啱佢睇嘅都叫佢陪下我睇，都係我陪佢、佢又陪我咁啦，當然我都會自己去旅行，亦會一個人睇戲或約朋友睇戲。對於我嚟講，我並唔覺得一個人睇戲或去旅行有幾悲涼，我反而覺得都幾爽，自己話晒事，但無奈媽咪再獨立都好，呢方面佢唔係呢種性格，而佢嘅家姐就忙忙忙，佢嘅朋友一係無錢去消費，一係要湊孫或有自己家庭走唔開，忽然間覺得媽咪變咗「孤獨老人」咁……(哭)
我問佢好唔好下年再嚟下英國，但佢似乎又唔想，話諗下先。呢樣 G 都覺得好意外，佢以為我媽咪會好想見我多啲，我話佢而家係想去旅行去玩，而英國並唔係佢首選，我……算啦。
新病人健康檢查
呢個星期喺英國都有好事發生呀！
搬咗屋大半年，轉咗新 GP (醫生)，呢個診所竟然有新病人健康檢查服務，似乎喺英國睇醫生方面我又有返啲曙光！至少舊 GP 完全無啲咁嘅嘢，病到死死下都未見過醫生，唯一係做過一次抹片檢查咁大把。
個所謂健康檢查都極簡單﹕磅重、量血壓、抽血化驗。
驗血結果佢話「無消息就係好消息」。
又，最初護士話驗血時，我第一秒都唔明，因為佢強烈嘅大西北口音唔係讀「blood test」，而係「blod test」，我回過神嚟先知係抽血。
期望無消息。
鬼佬唱廣東歌和音
口音嘅嘢，人人都有，包括 G，講嘅唔係佢嘅英文口音(幸好佢喺南邊大，口音很純正)，而係佢嘅廣東話口音。
佢曾經問過我鬼佬講廣東話同大陸人講廣東話嘅口音有無分別。
有！
我話……真係唔知關唔關人事，但鬼佬講廣東話就係好搞笑，但大陸人嘅廣東話口音係難聽，我話都唔排除係偏見，但我亦相信係普遍操純正廣東話嘅香港人睇法。
啱啱個星期五，我又做「跟得女友」陪 G 去同香港人夾 Band，由於佢想幫手唱下和音，於是呢個星期佢學咗兩句 Kolor《圍城》嘅歌詞﹕
「過去了你那一雙手」、「老去了你卻瑟縮顫抖」
第二句，老老實實真係講開廣東話都覺得要唱出嚟都唔易，不過佢就用咗幾日時間好努力練呢兩句，希望到時出 show 佢唱到。
至於個 show，明明搞手定好「追月」嗰日舉行，臨時又話場地搞唔掂，而家最終都唔知租唔租到場。
Holmfirth 美食節
星期六，因為要幫 G 去老遠拎返部修理完嘅結他，於是侷住車佢返 Huddersfield 再諗住回程返曼城時拎，點知維修專家一拖再拖，由星期五拖到星期六都話未交到貨，我白白就浪費咗時間同油錢去做司機。
為咗令我無咁浪費人生，G 教完琴後同我去咗附近 Yorkshire 一個叫 Holmfirth 嘅小鎮，去嗰度嘅美食節醫肚兼放狗。
地方細細，人多到嘔，勝在 4pm 後泊車免費，嘢食種類算多，不過真係太多人，我就揀咗食泰式沙嗲雞肉串燒，G 就食熱狗 (=_=)。最開心應該係雞蛋仔，可以出下街之餘，又係個個見到佢就讚佢得意撩佢玩。
快閃醫完肚就返歸。
御用司機
回應上星期周記，我今個星期並無 Queen B 皇后式享受，唯一係 G 幫手洗晒啲碗（with Gwai-Lo standard)，但我就日日做司機，車佢去夾 Band，車佢返屋企教琴，車佢去拎返修理完嘅結他再車佢返屋企。佢話下星期佢一定一定絕對絕對會俾我做 Princess (唔知點解下星期唔係 Queen)，我繼續聽住先，暫時我都只係 Driver Queen！
星期日本身可以 hea 下，但因為 G 嘅結他終於拎得，於是又要車佢去拎。維修結他係住宅自家整，附近無公共交通工具，電子結他好重、pedal 又好重，我都唔忍心叫佢自己解決，於是又做司機，但車完佢拎結他已夜晚 8 點有多，英國嘅交通勁差，基本上 G 除咗 call uber 之外都幾難可以星期日晚搭到車返屋企，我亦唯有車多佢一程。
不過，拎完結他再去 Huddersfield 已經係夜晚 9 點，入秋後天已好黑，加埋落雨同有霧，再加埋我「秋困」，成件事好攰，最後我夜晚要留低過夜，第二朝 5 點幾起身返屋企再返工……
我再拭目以待我下星期可以有咩「公主式」享受，哼！
垃圾堆填區
呢個星期，工作煩心。
工作其實一啲都唔難，話忙咩，亦唔算好忙，只係好多牛鬼蛇神令人好厭煩。
呢堆鬼，有懶鬼、奸鬼、廢鬼、小器鬼……
- 負責做會計嘅財務阿姨嗰個就繼續出漏單，繼續兩、三個 email 同佢查詢但已讀不回。
- 有一個就係「千足純膠」，應該買 A5 size 貼紙，佢買咗張得手板一半咁細嘅貼紙返嚟，然後同我講喺 Amazon 個網見到唔係咁細。大佬呀，睇尺寸㗎嘛，唔係睇幅圖當真實大小呀嘛？
- 到「老孤狸」，借嘢唔還嘢，追佢就唔高興，然後就出埋啲小家 Email 質我呢樣嗰樣，但無一樣係我嘅問題(如 Printer 印出嚟多咗條線，從來無同我滙報過，一嚟就問我已壞咗幾星期，幾時先正好﹔或者半年前未找數嘅單問我找咗未，但明明就係財務阿姨工作，唔關我事，我要做嗰 part 已做晒)。
總之，好激心。但打工度度都有激心嘢，都係賺份糧交租，自己勸自己睇開啲，唔好同呢班衰鬼計較太多，話雖如此，實會覺得唔忿氣、唔公平，但人生就係咁。
香港人最叻係賺錢
人在異地，香港人幫香港人？真係一啲啲啦！香港人貴價出租房。
有日喺個香港人群組度見到一個招租廣告﹕
專業人仕(士) 套房出租
全包月租 £600-800
只需帶個人物品:清潔用品、食具用品、睡房用品
地區為 M35 / SK6 / OL2 (距離Metrolink站2-5分鐘步行距離)
我一定要俾埋地圖你哋睇 3 個 post code (M35, SK6, OL2)，等你哋知道呢三個區分一啲都唔近巿中心，其中兩區仲遠過我住嗰區，但佢只係出租套房都租 £600-£800，雖然話全包，雖然我都知我好彩租到間平屋，但我上一間屋用 £600 可以同屋有夾份租到 3 房、有花園、雙車位屋，今年我都用緊 £750 租緊 3 房、有花園、有車位、3 個廁所嘅屋。
我自己只能講香港人好叻買屋出租賺錢，但租俾香港人絕對唔會係益你，都係賺盡。
尹光 WANK 演唱會
最後，純粹笑料一單。
話說 G 喺我朋友 group 度見到呢個廣告後勁笑，仲係咁 send 俾佢自己啲朋友睇，話我朋友邀請大家一齊去 wank 演唱會。
【Wank】verb [intransitive] (BrE, taboo, slang) to masturbate 行手淫
佢啲朋友聽到後話香港似乎係個好快活嘅地方。
事緣 G 上次去到香港見到啲鋪頭名已勁笑﹕WANKO、WAN KEE (允記)，今次仲要有 WANK 演唱會……
我當然有解釋返 WANK 其實個名叫尹光，但無架喇，佢個腦已經同班低能嘅男仔 friend 一齊笑住去咗 wank......
(今集完，請大家拍多 49 下手！)
新鮮出爐！呢期最新文章
埋嚟睇，埋嚟揀！CLAP多 49下！
多謝大家睇到最後，Medium 改制後，以「拍手」同「留言」去計算俾作者嘅稿費，如果篇文唔差，請幫忙多多拍手，可以拍足 50 下！
以下目錄係介紹呢期最新文章同推介其他舊文，歡迎嚟慢慢坐、慢慢睇。