【曼城周記】國殤紀念日
2023｜W46
周記，顧名思義，即記貝星人一周之事：一切大事、小事、有事、無事、心事、瑣事、無聊事。
水分偏多，營養欠奉，多屬長文，敬請慢用。
This week highlight:
-國殤紀念日
-冬日藍天
-鄰居花園
-逛Costco
-同居考慮
-鬼妹重聚
國殤紀念日
11 月 12 日係「國父」孫中山壽辰，喺英國殖民管治時期嘅香港，呢日係學校假期，所以我先會記得今日係佢生日，而將呢日定為學校假期係用嚟紀念孫中山推翻滿清嘅革命成功，但隨住 97 香港回歸中國，呢日假期都無咗。
而喺英國同其他英聯邦國家，今日係 Remembrance Sunday，即最接近 11 月 11 日「國殤紀念日」嘅星期日，所以年年唔一樣，唔一定係 11 月 12 日。「國殤紀念日」係紀念喺戰爭中嘅死難者，特別係喺兩次世界大戰中陣亡嘅人，又叫「停戰日」（Armistice Day），因為第一次世界大戰宣佈停戰時就係 1918 年 11 月11 日上午 11 點。而尋日 11 月 11 日上午 11 點嗰陣，大家都會暫停做緊嘅嘢 1 分鐘，為戰爭死難者默哀。G 當時搭緊嘅電車都停駛 1 分鐘，而佢亦叫喺屋企前院掃緊落葉嘅我暫停活動 1 分鐘，一齊默哀。
而喺英國 11 月呢段日子前後，唔少人胸口或車頭都會掛上一朵紅色嘅「虞美人花」（Poppy），除咗紅色嘅花瓣代表住戰爭中流出嘅鮮血外，亦因為第一次世界大戰中傷亡最慘烈嘅法國北部戰場亦盛開住呢種花，所以有咁嘅象徵意義。不過我喺英國住咗將近三年，都無特別掛過 Poppy 去紀念戰爭死難者，將來或者都應該參與下。
而今年呢日喺倫敦有聲援巴勒斯坦嘅停戰示威，新聞報導話有多達 30 萬人參加，呢個遊行未開始已氣氛緊張，身為英國內政大臣嘅 Suella Braverman 指責出嚟遊行嘅人係「暴民」同呢場遊行係「仇恨遊行」，即使本身遊行訴求應該係「停戰」，佢嘅言論被指搞分化 (而佢今日付上代價，俾首相話佢煽動種族暴亂而炒佢魷)，而遊行當日亦有啲反對示威嘅極右分子同警方發生衝突，結果有 82 人被捕。
冬日藍天
2021、2022、2023，唔經唔覺已喺英國經歷第三個冬季，時間過得好快。
入冬後，呢排成日都係落雨，無計，本來英國就多雨，冬天更加係雨季，而家仲要 4 點半就開始天黑，又黑又凍又濕，係少灰，星期六朝氣溫仲跌到 1 度𠻹！
但開心係個天都仲鍾意我！呢個星期五同六有兩日「雨後藍天」，大大個藍色天空，配上片片白雲，心情忽然舒爽！
可惜係星期五咁好陽光又點？我竟然坐喺 Office 入面返工！當我咁樣呻出聲時，成個 office 嘅同事都好有共鳴！於是大家忽然興起，動議一齊放棄今日帶咗嘅 lunch box，一齊出去出面食個 Happy Friday Lunch！
就係咁，我哋就開開心心喺中午行出去食飯，喺短短嘅路程上享受下人體「光合作用」，大大力去吸收下久違了嘅維他命 D，一個二個即刻好似叉完電咁，醒返晒！好耐無見過大藍天，大家都真係好興奮！開心可以好簡單！
做人有時就係要咁，俾自己鬆一鬆，休息係為咗走更遠嘅路！
片片落葉
趁住好天氣，我都要做下啲 Gardening 嘢！
話說有日朝早出門踩過門前同鄰居相連住嘅前院草地，令隔離位太太唔多高興，叫我唔好踩上去佢嘅花園草地，我都連忙道歉，行返門前鋪門樹葉嘅小路。
但諗返起又有啲奇怪⋯⋯
大門前院嗰塊草地係相連住兩個單位，按面積計的話，係我屋企門口佔大啲，佢佔少啲，如果認真計，嗰塊草地又唔可以叫做「佢嘅花園」，但我又無乜所謂，一嚟塊草地真係相連兩個單位，佢都有份係真嘅，二嚟佢前院剪草係佢哋打理嘅，所以佢話塊草地係佢的話，我無異議，佢叫我唔好踩上去，我亦 OK。
不過，點解我會踩上塊草地呢？首先係因為我喺單邊位，入秋後旁邊嘅落葉鋪滿門前小路，樹枝又生到好長拮住晒，行得好唔方便。其次係因為隔離屋個仔同啲鄰居小朋友都會喺屋前踢波，不下一次見到佢哋踩上草地玩，所以我先諗住踩上去行過無問題，無諗到係佢哋踩得而我唔踩得，睇嚟佢哋真係當塊草地係佢哋自己嘅。
而呢件事令我回想起初初搬嚟嘅另一單嘢，就係當時我後院無上鎖，而佢哋就無問過我自己走入我後園拎我個 Garden waste bin 用，到我有日發現時個垃圾桶裝滿草同泥，嚇親我唔知有賊定有鬼，後尾佢哋個仔嚟拍門話想借我個垃圾桶用我先知係佢哋，我亦因為咁而買返個鎖去鎖住個後花園。Well，即係咁，你不問自取拎我個垃圾桶用又 OK，但就唔俾我踩返自己屋企門前撻草地⋯⋯
G 話英國人有啲人係會過度保護自己嘅花園，佢話為免同鄰居有乜爭拗，就照聽佢講唔好踩，豪個前院俾佢。係係係。
好喇，講返正題，由於我都想做個好鄰居，除咗唔再踩嗰塊有大半塊屬於我屋企門前嘅草地之外，我就去清理下自己門前嘅落葉先。住單邊有好多好處，但住單邊又近住一堆樹嘅壞處就係入秋後日日都好多樹葉跌落嚟，前院嘅門口小徑同我架車頭都日日鋪滿落葉，但基於天氣成日又冬又落雨，我又無工具去處理，於是一直由得啲片片落葉喺度。
呢日經歷完「草地事件」，我即刻上 Amazon 買個掃把同鏟，趁住周六好天氣去清下門前落葉。本身清完都好有滿足感，但到星期日又變返一地落葉後，我就發覺都係算喇，或者要等另一個好天日子再清理。
外國生活就係咁，好多呢啲香港無嘅「家務」要忙。
逛 Costco 的樂趣
呢個星期帶個香港同事去逛 Costco，佢話從來未去過，於是一齊去逛下。
事前我同佢講，之前睇過 Documentry，話 Costco 就好似成人版嘅「玩具反斗城」，入面嘅貨品種類繁多，花多眼亂，加上刻意嘅區域不分明設計，令人入到去樂而忘返。
結果我都好似真係帶住個細路仔逛「玩具反斗城」一樣，佢邊行邊係咁話好興奮呀，好多嘢睇呀！見到不論嘢食、玩具、威士忌都好 High，仲 High 到嚇親其他客人，佢自己都 77 地咁同人講﹕
「Sorry 我第一次嚟 Costco 好興奮！」(英文)
人哋都尷尬笑笑。
星期日，約咗 G 一齊去逛 Costco，有三大目的﹕
- 睇下入面個 Optician 有無得配眼鏡，聞說平過出面，而我自覺右眼有散光。
- 睇下有無啲嘢啱買做聖誕禮物，下個月南下時可以送俾大人小朋友。
- 入下貨，Costco 嘅天婦羅蝦、韓式牛肉都係我常入又鍾意食嘅嘢。
明明星期六好好天，星期日又變落雨天，去到泊好車，行到大門準備入去時，我先發現自己無帶 Costco 會員卡！
入 Costco 一定要有會員卡，要 Scan 之餘，職員仲會對下你個樣同卡上面張相係咪一樣，無帶卡就無得入，借人地張卡俾職員發現就會沒收咗張卡 (不過可以免費補領返)。
於是，我哋都唯有折返……
G﹕「如果呢件事發生喺我身上，我實俾你話我大意！但我係唔會咁做，我會原諒你，同唔會之後拎返出嚟講。」
頂佢，佢講足一日啦！
後尾係我又做司機車佢去搭巴士，佢先話無數唔再講咋！
大頭蝦
而我就趁機活動教學，立即教佢咩係「大頭蝦」(big head prawn) = absent-minded, careless，而佢就喺返屋企段車程係咁練習廣東話，忽然好勤力。
「nei hai daai-tau-haa」
佢然後想知自己係「金魚腦」點講，我話就無謂學 goldfish brain 係乜，因為發音太似「金魚佬」(gam1 jyu4 lou2) = men who abduct or harass young girls under pretext of inviting them to “see goldfish”.
佢聽到後又覺得好得意，話英國嘅講法係 candy man，用包糖就呃到小朋友，佢覺得香港小朋友會俾金魚吸引到好有趣。
最後我哋返咗屋企就打機，落雨濕濕，然後 G 晏啲又要返屋企教琴，結果 Costco 購物行程取消，下星期再去！
又，曼城嘅 Christmas Market 都開咗喇！下星期都可以去下！
同居？
星期中，有日放工帶埋雞蛋仔飛車去咗 G 度「宿一宵」，上星期係因為突然有啲掛住佢，今個星期就係心靈需要佢。
佢呢晚同我講﹕「我覺得你應該搬過嚟同我一齊住。」
我覺得應該好多年後先發生好啲。
每星期周末見下，不論係佢過嚟定我過去都好，大家都好 enjoy 「周末同居」嘅見面樂趣，同時又好享受「平日分居」嘅自主自由。如果 24/7 放埋同一間屋度，情況就可能好唔同。
首先，我返早放早，佢啲學生就大部分放工放學去學琴，即係我放工時佢返工，而佢仲要在家教學，如果一齊住，即係我放工後只可以匿埋喺樓上間房，雞蛋仔亦無得自由活動。
第二，如果搬去 Huddersfield，我返工距離就會遠咗，雖然係慳咗租錢，但亦會用多咗時間同精力喺交通上。
第三，喺英國嘅朋友唔係多，但主要都係喺曼城，如果離開曼城，我嘅社交生活多少都會受影響，而我而家唔似二十年前咁樣生活只要有男友就夠，我都要朋友。
第四，me-time 好重要，單身嘅日子令我由害怕寂寞變成享受自由，好鍾意見己宅在家打機、煲 Netflix、練琴、寫文，同居的話唔係唔可以，但一定少咗 me-time。
第五，我呢個新居搬入都未夠一年，全屋傢俬、電器咁多嘢，點算？仲有仲有仲有，係我好鍾意而家自己個屋企，所有擺設都係按自己心思設計，又舒服又整齊，又新淨好多……
第六，G 有兩隻貓，肥貓同瘦貓，肥貓好驚青，又怕狗，貓狗同居都係個難度，雖然雞蛋仔就自細跟波波貓哥哥長大，但 G 隻肥貓足不出戶，人生中只見過雞蛋仔一隻狗，好騰雞。
第七，「周末同居」兩日就好 sweet，日日見又係咪咁呢？真係唔知。
雖然佢都只係講下，我亦無認真回應，但打完以上 7 點，都知道未係時候。
鬼妹重聚
終於終於，由 10 月約到 11 月中，可以再見返意大利妹同西班牙妹。
前事提要﹕兩個鬼妹係我喺英國第一份工酒店度認識嘅同事，當時我哋個 reception 組合顏值甚高，佢兩個都係歐洲美女。
轉眼間我哋三個都識咗兩年幾，又大家都轉晒工一年有多，仲可以間中約出嚟見面實屬難得。大家都係英國嘅「異鄉人」，自然都有好多共同話題。
呢日三個女仔 girls night，大家都話要慳錢，於是只係去西班牙妹屋企叫外賣，無出街食，夠晒慳家。
話題好多個，三個輪流講，工作、感情……先講工作，大家都喺工作上遇到唔同嘅難題，相同嘅係大家都覺得英國人工作好 lazy & messy，同埋佢哋嘅友善好假，打個招呼亦好花時間，但就唔見得係真心可以做到朋友，加埋工作能力同態度嘅差異，直情令你唔想同佢哋多講幾句。大家講到好有共鳴感，但我都有啲意外係意大利同西班牙代表都一樣咁睇英國人。
感情方面，兩年幾前大家最初認識時，我哋三個唔同年齡層又唔同國籍嘅女仔都係單身，而家大家都有另一半，工作亦有升遷同變化，真係互相睇住大家喺英國各方面成長。
呢晚佢哋仲送上遲嚟嘅生日禮物俾我，其中一份禮物係鋼琴同小提琴二重奏，話俾我同 G 一齊玩，好有心思！
我哋又繼續講話一齊去旅行嘅事，講極都未實行到，我話不如唔好諗外遊，諗下英國境內遊，睇下會唔會易啲？
希望同佢哋嘅友誼可以 keep 得到……
(今集完)
新鮮出爐！呢期最新文章
埋嚟睇，埋嚟揀！CLAP多 49下！
多謝大家睇到最後，Medium 改制後，以「拍手」同「留言」去計算俾作者嘅稿費，如果篇文唔差，請幫忙多多拍手，可以拍足 50 下！
以下目錄係介紹呢期最新文章同推介其他舊文，歡迎嚟慢慢坐、慢慢睇。