【曼城周記】人鬼周年慶
2023 | W34

周記,顧名思義,即記貝星人一周之事:一切大事、小事、有事、無事、心事、瑣事、無聊事。
水分偏多,營養欠奉,多屬長文,敬請慢用。
本周分享:
-「人鬼雙城戀」一周年
-努力搵外快
-好同事、壞同事
-複製上星期五
-鬼妹聯合國生日會
-Safari動物園
-Medium新制
一周年感言
容許我懷住感恩同感動嘅心情,並以感性少少嘅筆觸,嚟開始呢篇周記,因為眨下眼,我同 G 呢段「人鬼雙城戀」今日已經係一周年。
我好快咁喺腦海閃過自己過去 25 年嘅感情路,歷時 1/4 個世紀,但只有我第一個男友兼後嚟嘅老公嗰段感情嘅大部分時期係叫正常戀愛,之後嘅情史雖然唔多,但情路相當坎坷,我未必係個好好嘅情人,但我嘅對手比我更壞,總之,簡而以蔽之,我已有十幾年時間無喺一段正常關係之中好好戀愛過,一係人太多,一係人太差。
過去兩年幾,一個人嚟英國,亦無諗過自己嘅感情生活會係點,只係基於磁場慣性地差,於是提醒自己既唔好做「仆街」,亦唔好做「仆街磁石」,同埋更重要係一個人都可以生活得好好,有個好嘅伴係感上添花,但一個人都可以好精彩。
對於都算有唔少狗血劇情片嘅過去,同 G 開始呢段「人鬼雙城戀」時,我並無太多期望,都係平常心 Date 下咁,大家都係認真得嚟好 casual,無乜期望又無乜壓力。而我身邊好友就覺得都係睇定啲先,因為佢地都好清楚知道我係一塊「仆街磁石」同可以係一個自己不知情、無意識、無不良動機下嘅「仆街」。所以,全球朋友都同我一樣,審慎樂觀地觀察,但無抱太大期望。
不過,做人有時就係咁有趣,你好緊張一個人,日日搵住,千方百計想討佢歡喜,甚至忍辱負重都只係想求見多幾面都好,有啲嘢你越想要就越得唔到,越用力就越適得其反。同 G 兩個就係咁輕鬆咁開始,反而無乜負擔,住喺兩個唔同嘅城巿,無得日見夜見,要雙方都用心安排時間去砌個長周末先見到面,就咁唔覺唔覺一個月又一個月,大家漸行漸近,而喺佢決定同真係跟我返咗一轉香港後,大家亦由 casual 變得更認真,而每一日大家都過得好輕鬆簡單,無無聊聊但開心。
「人鬼雙城戀」既有地域之隔,又有啲語言障礙,要維繫感情都要大家肯付出同出力溝通。我感恩並唔只係遇到一個伴或同行咗一年,我感恩係佢出現嘅 Timing 係彼此都經歷過前半生嘅瘋狂歲月,而都多咗一份「學精咗要醒定啲」嘅人生階段,當佢有佢癲過,我有我狂過,知道咩叫痛,知道咩係苦,終於學識咩叫平淡是福嘅呢份感恩。
好,感性時段完畢。
努力搵外快
過去呢個星期懶惰無跑,其中一個原因係因為放工後好多時都要接 job 搵外快,於是打亂咗我本來放工諗住 gym 嘅計劃,而返完工再做 freelance 個人自然又悶又攰咁,當然就想打機同煲 Netflix 鬆一鬆,信我,真係唔只因為沉迷打機。
我想講,喺我近期俾咗啲啲力去搲撈兼又有好多運氣下,我呢個月嘅外快收入竟然有望可以喺要交車保情況下做到收支平衡,結果要 10 日後埋數先知,但起碼唔係就咁俾多千二鎊車保,而係有出又有入!希望可以創造到奇蹟!
事實上,呢個月我同 G 本來話想慳慳慳,但結果都係咁燒燒燒錢,又要買火車飛月尾南下,我要買信俾 G 嘅屋企人,又要慶祝下一周年紀念,仲有我嘅鬼妹朋友生日,仲有交車保等等等等!結果我地 8 月嘅慳錢大計不但實行唔到,仲要支出好多。所以,幸好有啲外快頂住頂住。
催眠治療
今個星期其中一個 side job 係幫一位客人做 online 催眠治療,之前周記都講過,做催眠治療對我嚟講,收入唔夠寫稿改稿好賺,但工作性質有意義好多,我亦睇成效多於賺錢,始終幫到人係一件好事,錢只係買我去準備同做催眠輔導嘅時間,最重要係成件事有成效,幫到有需要嘅人。
而呢個星期嘅催眠個案成效好正面,接受催眠治療嘅朋友喺完成第一次輔導後已話有明顯嘅轉變,亦願意再繼續落去,希望問題可以得到更大改善。佢嘅正面回應真係比起賺錢令我更開心同感恩,希望可以盡快幫佢完成到佢嘅目標!
穆斯林喪禮
呢個星期有 3 日無咗印度妹妹助手幫手,因為佢家族有白事,好臨時臨急咁請咗 3 日事假去處理喪事。
由於唔係近親離世,妹妹都無乜好傷感,但由於事出突然,佢都感到好愕然。當佢重新返工後,佢就同我分享返穆斯林喪禮嘅做法,話親人離世後一般第二日就會進行喪禮兼埋葬,越快越好。我就分享返香港做法,即使香港人好急好快手,但去到喪事呢樣嘢我志哋又急唔嚟,因為要等,要排期,有時如果撞正新正頭就可能要放耐啲先可以舉行葬禮。
葬禮方面,穆斯林女人唔可以出席睇住先人下葬,因為唔想啲女人太激動,呢啲粗重嘢等堅強嘅男人去做。呢樣嘢又同我哋嘅文化好唔同,我話如果我做女嘅都唔出席老豆葬禮的話,我應該會被千夫所指,一世孭住「不孝女」罪名。
而如果丈夫離世,穆斯林嘅女性作為太太要足不出戶留喺屋企守寡 3 個月零 10 日,好漫長!我同妹妹兩個百無禁忌就講笑咁講,他朝發生的話,可以 WFH,但其實妹妹雲英未嫁,仲好細個,我就半講笑咁提佢 30 歲先好嫁,同祝願佢未來老公長命百歲。
大家唔同種族、唔同宗教、唔同文化習俗,生活上有好多唔同嘅嘢可以分享,但我哋兩個一向都係採出非常開放同尊重嘅心態去交流,互相認識下雙方文化差異。
無家教同事
上星期周記都有分享我公司入面有啲好無品嘅同事,完全唔識「公德心」三個字點寫,極其自私地令到唔少公共地方如 Pantry、廁所等極之不衛生,有興趣可以睇返上星期周記嘅圖片分享,等大家大開眼界。
因為咁,老闆出咗封 email 認真告誡兼再三勸籲同事自重自律,可惜,人類有幾壞,大家都知道,單單一封 email (前後 HR 都唔知出過幾多封),又點會令佢哋痛改前非?今個星期性情況一樣惡劣。



我個人覺得再講都嘥氣,收晒啲杯杯碟碟、刀刀叉叉,唔好再俾啲人用啦,再有放喺洗碗盆唔洗嘅嘢就沒收囉,當係自己出錢買嘅餐具時,我又唔覺啲人會就咁放喺度唔洗等沒收喇!
想係咁想,但公司會唔會做到呢一步呢?又,對付無賴其實真係唔可以用文明方法,有時「你不仁、我不義」都係一個方法。
由於嬲嬲地,所以寫咗篇文講無家教,唔該啲人真係唔識教就咪生仔……
複製上星期五
呢個星期五係複製上星期五咁,又人鬼夾 Band,然後我同 G 再同兩位工程師好朋友喺屋企自製港式韓燒,佢哋整埋等我哋夾完 Band 上去食,非常咁溫馨。
人鬼夾 band 雖然都係要我做下翻譯,但整體氣氛同夾 band 效果都好咗好多,而 G 都為咗同呢隊唔太講英文嘅 band 溝通好啲而練咗一啲實用廣東話﹕
- mm goi saai 唔該晒
- faai d 快啲 (但佢成日讀咗「肥啲」)
- maan d 慢啲
- si do ci 試多次
- si ha la 試下啦
- daai seng d 大聲啲
- sai seng d 細聲啲
但學乜都好,佢當晚最令在場 band 友印象深刻係佢整緊舊機時爆咗句「diu nei lo mei」,全場歡呼!
鬼妹聯合國生日會
星期六都同上星期一樣好頻撲咁遊走兩城之間,前一晚夾完 band,G 第二日又要返去哈城教琴,而星期六晚係西班牙妹同意大利妹生日,佢哋誠邀 G 一齊出席晚飯,於是我哋又要黃昏前趕返曼城。
「鬼道」嘅嘢,永遠令人摸不着頭腦。
6 點約飲嘢,book 咗枱 8 點去餐廳食飯,我同 G 為咗慳錢同盡興可以飲下酒而不醉駕,於是去程搭 metrolink,回程先 uber。7 點半先去到兩個壽星鬼妹住所嘅會所飲嘢,去到時已經好人齊,我哋係最後兩個出席,以為飲一杯大家就會起行去餐廳食飯 (book 咗 8 點吖嘛),但 G 話鬼就係鬼,唔會咁準時,叫我唔好用人嘅心態去諗。
果然佢係鬼且通曉「鬼道」,最後我哋係 9 點後先到餐廳,遲咗足足一個鐘!喺已經 8 點有多時,我已提大家係咪要起行,兩個鬼妹同佢哋嘅朋友於是先拎返啲嘢上樓,但已經 8 點幾,佢哋唔係快快手上樓擺低啲嘢然後急急腳起行,而係上到房仲繼續吹水,仲要喺雪櫃拎枝全新未開嘅白酒倒出嚟大家再飲……說好的 8 點餐廳見呢?我慶幸我同 G 無直接去餐廳,而係先嚟 join 酒局先,否則真係等到眼眉毛都白都未有得食。而最正係,到差不多 9 點起行,其中兩個鬼妹朋友未飲完手上嘅酒,於是由住所拎住兩杯酒一直去到餐廳,食完飯再拎住去酒吧……
除咗遲到,另一「鬼道」就係承上文,飯前要飲酒熱身,飯後又要再飲酒助慶,一餐飯基本上要走三場同飲好多酒先成事。仲有,食飯唔係坐定定食飯,而係每隔 15 分鐘就要拉大隊出去「煙 break」,留低唔食煙嘅人坐喺度(其實無乜人唔食),好奇怪。
呢晚全部都係鬼,但來自五湖四海,除咗西班牙妹同意大利妹兩個主角,仲有其他嚟自西班牙、意大利,墨西哥、摩洛哥嘅朋友,而我同 G 就代表香港同英國出席,歐洲、亞洲、美洲都有代表,聯合國一樣!而呢個聯合國組合有一個共通點,就係全部人都好憎法國,睇嚟法國都好勁,與世界為敵!
是夜大家好盡興,一如一貫「鬼道」,不論男男女女都有攬攬錫錫嘅禮儀,對 G 嚟講就家常便飯啦!自然唔會呷醋,對我嚟講都一樣好習慣同我兩個鬼妹靚女朋友咁親熱,當然都唔介意同佢哋嘅朋友嚟呢種西式禮儀。而意大利妹本來想錫我面珠,就意外地同我嘴對嘴錫咗啖,兩個男朋友在場笑笑。
G 話好感受到我嘅香港朋友同鬼妹朋友兩組人嘅氣氛與互動好唔同,佢兩樣都鍾意。
在場有位墨西哥籍廚師,我知道後就咁問﹕
我﹕「墨西哥人係咪真係會戴住頂帽拎住個結他彈歌仔架?係咪個個都識得唱歌架?」
G﹕「哈哈!好心你咪咁 Stereotype 啦!」
但點知墨西哥廚師答我﹕
墨﹕「係呀,我係 musician,我彈結他又唱歌,嚟緊下個月仲會有 party 表演添!」
G﹕「哈哈!證明 Stereotype 係有一定嘅可信程度。」
野生動物園
星期日,慶祝「人鬼雙城戀」一周年,我哋去咗 Knowsley Safari 野生動物園。呢個動物園嘅特點係可以自駕遊,親身感受同啲動物近距離接觸。不過,因為聽過太多百厭馬騮仔破壞汽車嘅傳言,於是我決定課金搭動物園巴士,又竟然司機安排我哋兩個坐最前座,飽覧最佳景觀,好 lucky!
馬騮幾曳可以睇相。
我哋坐完巴士都有徒步遊園,兩條路線係唔同嘅,同埋有啲機動遊戲玩下咁,我就喺「被邀請」嘅情況下挑戰咗海盜船,大部分時間都係合埋眼玩,嗌得大聲過啲細路。英國玩機動遊戲嘅僅有經驗中,同香港最大分別係喺香港你玩完都意猶未盡,喺英國係一邊玩一邊諗幾時先完?






一周年紀念
由曼城出車去動物園大約 45 分鐘,唔太遠,動物園唔算好大,所以下晝都可以返歸。
其實一周年慶祝都無乜特別,都係搵個地方去玩下 (動物園),搵間靚靚餐廳食餐飯,大家寫張卡俾對方,送下小禮物。窮鬼談情,簡簡單單就係,同埋去咗 ROSSO 食呢餐都唔平,加埋去動物園,呢日我哋係豪使喇!
不過,一年一次,又難得有呢一周年,使少少錢慶祝下都值得嘅。
食完餐飯,我都喺 FB 同 IG 出咗個 post,thanks G for everything,我哋大家都覺得感恩一齊一年嘅,而呢個 post 一出,我嘅朋友俾 like 就意料中事,畢竟我都咁多年無正正常常有段穩定又見得光嘅關係,今次公然出 post 見樣係歷史性時刻。
但我個 post 亦有好多 G 嘅朋友俾 like,連佢自己都好意外,因為好多陳年封晒塵嘅朋友都忽然出土祝賀,當中仲要包括佢阿媽、前女友 (唔只一位)、前女友屋企人、前情敵等等,好熱鬧嘅踩場,但難得佢啲前度sss 兼前度屋企人都咁戥佢高興,都值得安慰嘅。
希望我哋唔只一年貨仔啦!


Medium 新制
呢個星期都有出文講 Medium 又轉制,文章收入計法又唔同咗,以「拍手」同「留言」為依據。
喺出文後,各位讀者文友都十分友好地大力派 Clap,多謝各位善長。
事實上,我覺得 Medium 改制就係想出少啲錢俾作者,我相信唔少作者同我一樣都有發現今個月已過咗 2/3,但文章收入遠遠不及上個月,甚至連一半都無!慘不忍睹!
我都忍唔住喺 Medium 講改制個 post 度留言,表明我今個月嘅收入如無意外會係上個月嘅 3 分之 1 甚至更少,對於呢個改制非常失望,尤其本身都唔係俾得多錢作者,今次咁樣就更加雪上加霜。
我當然唔會咁天真豬以為留個言可以改變現實,都只係宣洩下情緒。我亦無因為改制後閱讀時間唔再影響收入而刻意寫短啲文章,呢篇周記一樣係咁長。講到尾,錢永遠都緊要都好,喺呢度寫文又真係唔係為錢,都係「為情而造文」有感而發又圍爐取下暖咁,但我都希望 Medium 聽下會員作者心聲(都唔少人留言)。

(今集完,請好心拍多 49 手呀!)
新鮮出爐!呢期最新文章
埋嚟睇,埋嚟揀!CLAP 49下!
如果睇完/鍾意呢篇文,請 Clap Clap 拍拍手話我知!
多謝你睇到最後!「拍拍手」唔使錢,如果喜歡呢篇文,希望你「拍拍手」話我知,如果好鍾意,不妨拍多啲 (可拍1–50下)!
以下目錄係介紹呢期最新文章同推介其他舊文,歡迎嚟慢慢坐、慢慢睇。