《暖男爸爸》每集觀後感連截圖合集(二)

本來有諗過寫完幾集就放棄唔寫，但又估唔到有人會鍾意睇。既然都開咗個頭就索性整一個截圖連感想合集分享俾大家。(圖同字夾埋比較多，為方便閱讀就索性分為四篇吧）

今期字同圖都勁多勁豐富～鍾意嘅俾多幾個clap同share呀 :)

《暖男爸爸》第六集。 呢一集開始講配角嘅小故事：一個係接送暴龍哥返學遇到嘅miss，一個就係暴龍哥同學嘅媽咪。

兩個角色嘅經歷都有個共通點：就係信錯人而受傷。一邊係情人，另一邊係朋友兼上司。劇情想交待嘅結論係：無論你有幾想維持當刻或者已經逝去嘅感情都好，千祈唔好為咗討好身邊嘅人而強顏歡笑。

哭吧，哭不是罪。

《暖男爸爸》第七集。 今次主角係暴龍哥同遊戲治療師 Leah。

雖然劇集都有避重就輕唔駛小演員太多感情戲，不過小演員依然發揮唔錯，言行舉止都似番個細路（大台嘅小演員就顯得有啲太老積，去咗浸小朋友味，不過各台風格唔同，唔多作討論）。

而更有驚喜係由Crisel Consunji 飾演 Leah 背後嘅感人故事。 睇完佢一段廣東話solo，再加同佢前夫嘅對手戲，我絕對可以講：比起《淪落人》，呢套劇先係可以完全發揮佢演技嘅舞台。

用《無人像你》做背景都有少少催淚，各方面配合都係令情感自然流露，絕唔會好似啲催淚片咁整色整水、加幾個感動位要你喊。

(* 唔好意思最近睇得比較慢。我知道講呢啲阿劉江叔都已經出場，但我諗我都係跟返我步伐睇啦。唉仲有好多劇未追呀……)

《暖男爸爸》第八集 今次嘅主角有芷明嘅client有錢仔「投胎界KOL」、同佢同事Bianca。不過前者嘅信息太重，就唔講佢同事先。

好坦白講，我每一集都等緊佢冷場。但今集依然係有新驚喜。

呢集講嘅，係被稱為「投胎界KOL」心目中嘅理想：就係希望透過老豆留落嚟嘅遺產，去培養香港人嘅品味同國際視野，而且係有目標咁由年輕人著手。

佢講嘅例子亦好一針見血：「大便臭唔臭，係咪見仁見智，試一啖咪知囉。」 有時啲嘢，好同壞係有標準嘅，唔係一句「見仁見智」就可以推搪過去。

無品味嘅可以培養，但集非成是就註定無得救。

《暖男爸爸》第九集 算係比較平平無奇嘅一集。 今集主軸終於返到去芷明個同事Bianca度。 Bianca由小康完整嘅家庭，到後期因為父親包二奶而離異。 套劇都用咗一個比較特別嘅方式去表達：開頭一幕嘅場景有啲似「美夢突然變成惡夢」，氣氛由和諧到惡劣，最後Bianca就好似一個受驚嘅細路女咁離開現場。

呢個背景解釋返點解Bianca完全唔信任愛情、甚至任何一種關係。但正正因為咁，佢反而同理到因為心裡面有個人、而投入唔到喺其他感情嘅 Lantau。

《暖男爸爸》第十集 今集嘅內容主要係圍繞住

屌！講呢啲

屌！講呢啲

應讀者Lee Tinnie 要求嘅特別臨時加長版

《暖男爸爸》第十集 今集嘅內容主要係圍繞住芷明對男人嘅觀察同補完返Bianca嘅身世。

成為單身貴族後嘅芷明喺同事嘅吹水會發表偉論：「男人係天生扮專注嘅聆聽者，就好似女人與生俱來識扮性高潮一樣」 可能我印象中嘅張可頤都仲係TVB嘅程寶珠，所以聽到佢講咸濕笑話係有少少odd（而佢又真係好展現到唔習慣講果類笑話嘅尷尬，不過我覺得ok嘅，佢都唔suppose要做果種風騷女人，而係果種同事間講咸濕笑話嘅半熟唔半熟feel）。

講遠咗，佢指男人呢種生物係「好似好專心咁聽你講嘢，但其實係心不在焉」。其實我都一半認同嘅。但如果話唔專心聽你講嘢，就二分法覺得「個男人對你唔好」、係唔細心；而細心嘅男人係會聆聽晒你講嘅嘢，又好似武斷咗少少。畢竟兩個人相處係長時間嘅生活，無可能你講嘅嘢對方一定就好有興趣去聽嘅，更何況對方真係有嘢忙緊？

另一個位係Bianca嘅故事。佢今集個鏡頭處理又進一步引證我上一集嘅想法：就係對於Bianca衝擊嘅位，佢都會用震動鏡頭嘅方式處理。呢個Bianca獨有嘅鏡頭處理係一個好好嘅嘗試。而且飾演Bianca嘅陳俞希本身就好擅長飾演天真女同心機女（兩者互swap都handle到），由佢演無憂無慮嘅有錢女到家道中落嘅轉變，就自然唔係一個大問題。

最後最令人期待嘅，當然就係萬眾期待嘅劉江叔啦！（唏，講呢啲） 睇個勢佢應該會係飾演唔好相處嘅「惡伯爺」？值得期待。

補充多少少唔記得咗講： 交待Bianca嘅身世，某程度係幫佢同強尼飾演嘅Lantau作一個前奏：因為爸爸先出軌出賣媽咪，所以係爸爸唔著；而媽咪因為破產而果斷離婚保障自己，媽咪唔係真心愛爸爸。最後竟然係第三者喺爸爸最一無所有嘅時候辭厚職照顧爸爸，道德唔啱卻反而係爸爸嘅真愛。呢樣嘢成為咗Bianca對愛嘅迷思，亦有待「性愛player但感情A0」嘅 Lantau 去同佢追尋答案。