「普世價值」必須建基於文化、傳統同國族之上

（寫於2018年12月13日，略有修改）

如果純粹出於「普世價值」同「人權」而追求「民主、自由、法治」，咁只係講緊，「因為人人都有呢啲嘢所以我都要有」。先唔講呢啲嘢係咪真係人人都有，咁樣係好弱嘅講法，既解釋唔到點解呢啲嘢咁重要，實際上亦推動唔到一般人去爭取或者守護呢啲嘢。唔係個個可以好似Hayek咁從哲學 / 知識論上論證「民主、自由、法治」有幾咁重要；但佢最重要嘅觀點之一，就正正係指出：呢三樣嘢之所以喺西方屢經挑戰仍然屹立不倒，靠嘅其實係一般大眾偏執、唔理性同教條式嘅信念 — — 我哋宜家稱之為「文化、傳統」同「國族主義」嘅嘢。正正因為呢啲嘢非常直觀，深度影響每個人嘅行為，而且由幾百甚至幾千年嚟世世代代嘅經驗累積而成，基於呢啲嘢而發展出嚟嘅集體行為，往往產生廣泛而深遠嘅影響。反之，無論你嘅理論幾完美、論證幾完整、邏輯幾完美無瑕都好，只要同呢啲嘢有衝突，根本好難改變一個族群嘅集體行為。

自馬克思開始，左派好鍾意形容呢啲嘢做「意識形態」。有人認為，人要得到「真正嘅自由」，就要從各種「意識形態」中解放出嚟，唔受佢影響。但就連Žižek都有講：以為自己唔受「意識形態」影響（free from ideology）就正正陷入咗「意識形態」當中。你叫佢「意識形態」又好，「文化、傳統」或者「國族主義」都好，呢種直觀、教條式嘅信念 / 信仰本身無話好定唔好。Hayek就覺得，呢啲純粹係人類社會為咗要大範圍地互相合作而演化出嚟嘅產物，係協調大量人類行為而又行之有效嘅機制，partly as scientific truth ，partly as human necessity。

關鍵在於，點樣喺一個文化 / 傳統中，將正確、有用同過時、有害嘅經驗區分出嚟，以符合本身文化 / 傳統嘅方式改進。對宜家嘅香港人，以至香港嘅下一代而言，呢種辨析能力異常重要。

歷史早有答案，困難在於如何將原材料重煉成當代神話。