星期日休息： 理大民主牆 事件睇學棍同政棍

理大民主牆 事件搞到有人被踢出校，呢件事係十分令人憤怒，亦反映出學界學棍當道。而劉炳章，以至仇思達嘅反應，就連政棍都浮上水，果然有黨嘅指令下，就乜嘢牛鬼蛇神都會出現，如果話依家係香港最黑暗嘅時刻，甚至之後再黑一啲，我唔會意外，因為政棍同學棍都急不及待聽黨嘅指令，唔記得咗，螳螂捕蟬，黃雀在後。

理大民主牆 與學棍

我先講學棍，對學生表達意見果陣鬧事，但仍然力挺學生到底嘅校長，講嚟講去都係得一個，就係前中文大學校長，光纖發明人，兼諾貝爾物理獎得主高錕爵士。高錕爵士某程度上，佢係一個英國紳士，所以面對成棚中國膠力排眾議企喺學生果邊，亦無人敢反佢，因為佢係校長。本來就算無中共，華人學界都會變學棍溫床，因為君君臣臣父父子子果套儒家文化，簡直係製造學棍嘅地方，呢個唔係中共唔中共嘅問題，而係乜嘢要「敬老」、「欺君犯上」呢啲嘢，深深植入中國人嘅DNA裡面，無諗過係需要一個公平嘅平台表達意見。其實只要唔涉及惡意，唔係事實嘅抹黑，就應該百家爭鳴，特別喺大學，特別你係做校方嘅。但香港啲大學，本來已經充滿中國膠嘅腐儒文化。

跟住，香港做學者，有幾多係安貧樂道，其實當一份高薪厚職嘅比較多，做得校方高層果啲，本來好多就特別鍾意搞辦公室政治，甚至平日做事手腕都仆街，邊間大學都差唔多款，係唔知點解中大上世紀九十年代出咗個高錕爵士做校長。所以成班權鬥專家，本來思維方式都係太監咁，樓上一個指令壓落去，仲唔做仆街嘢呀，所以，唔好話理大，間間大學高層都會做仆街，呢個係成個香港扭曲嘅大學文化問題，你望大學高層做知識分子，做番以前書生嘅嘢，你估呢度係法蘭西同德國咩。所以當時反對懲處學生嘅，除咗高錕爵士，就係當時大學輔導長關信基教授，我唔意外，歐洲出嚟嘅學者，邊個未見識過更激進，更激烈嘅示威(呢個亦係歐系學者，無法喺美系學者當道嘅香港突圍嘅原因，美系學者可以好唔理政治)。

而更大問題係，呢幾年大學好多所謂商業合作，呢啲商業合作，好多又同中國啲公司有關，變成咗好多所謂學者，根本係掛學者羊皮，賣商人狗肉嘅友仔，你班友擺明從商仲好少少，問題依家呢班友係扮學者，扮書生，所以果套偽君子嘴臉係特別核突過人嘅。所以本來充滿有毒文化嘅香港，再加上UGC果套funding制度，入到大學學者變人渣有乜奇，呢個亦係就算我讀咗博士學位返嚟都好(雖然未來幾年都唔會有呢個時間)，都唔會返香港嘅大學教書嘅原因，係再客串都未必有興趣，因為知得太清楚成個大學變質到乜嘢地步。

理大民主牆 與政棍

因為梁振英係理大嘅「傑出校友」，所以理大梁振英嘅影響力係有番咁上下，否則唔會有劉炳章做校董呢啲事。而劉炳章有著梁系人馬嘅特點，就係面皮特別厚，明目張膽雙重標準都得，佢鬧啲學生係黑社會果陣，佢竟然講出刮友呢啲黑社會術語，如果喺以前，隨便講黑社會術語係拉得，可以見到佢當年出席小桃園飯局係絕對有原因，邊個比佢更加熟啲黑人物？本來劉炳章做嘢，好多時都游走法律灰色地帶，所以佢一句刮友，簡直震驚全港，我依家十分之有興趣考究一吓，究竟劉炳章喺小桃園飯局扮演嘅角色，究竟邊個負責幫梁振英聯絡啲黑人物？劉炳章似乎對啲黑道用語係講慣講熟，真係Freudian slip，做慣仆街嘢，見慣人渣，唔小心漏口出嚟。

理大民主牆 呢件事，本來係獨派受災，連被踢出校果個人，都係學獨聯代佢申請司法覆核就知，但仇思達突然走出嚟，其實係因為要幫中共轉移視線，再加上理大嘅獨派有意跟隨中大做法，佢哋會入番學聯，而邊個要千方百計打散學聯先得。所以梁振英要冧友，要一呼百應，就將佢啲黨羽一次過抽番出嚟，我就踢爆呢個真相中嘅真相。健吾喺呢件事嘅立場，同樣係將佢嘅真實立場上浮上水。如果呢班友係左膠，你可以選擇唔幫佢，我理解。但一班主張港獨嘅人，你兩條友咁搞法，呢啲就係明目張膽嘅政棍所為，請留意，呢次第一時間出嚟挺學生，正正係被批評為大中華膠嘅民主黨，跟住係泛民聯署。當然泛民中人有幾真心唔知，但最得意係，鄭松泰又係唔知去咗邊，相反，楊岳橋、梁耀忠都會做吓戲，你覺得呢次係唔係政棍照妖鏡？

理大民主牆 呢件事，點解值得用一篇長達兩千字嘅篇幅去講，雖然呢個年代嘅人，都未必再想睇長文，因為呢次，係反映香港啲有毒文化同制度製造學棍，所以啲藍屍，或少部分黃絲唔支持學生，呢個正正係所謂儒家文化荼毒嘅結果。而劉炳章嘅談話，反映佢喺小桃園事件，有可能正正係協助梁營同黑社會聯繫果條友，日後係一定要立此存照，而焦土派健吾同仇思達，雖然分屬兩個系統，但佢哋嘅目標都係打受害學生落水狗，仲要班學生係獨派，反映呢班友係收中共指令做人，唔係有自己嘅真政治立場，佢哋所謂本土都係欺騙，你仲當佢哋係本土派真係認真就輸了。香港有咁多牛鬼蛇神，一次過浮晒上水，日後仲陸續有嚟，有排你受。乜嘢叫黎明前嘅黑暗，就係呢啲，但你要有1944年-1945年期間荷蘭民眾嘅意志，諾貝第登陸咗，都唔代表納粹立即消亡，荷蘭北部當年要捱到1945年德國全面投降，係Dusseldorf自己無血開城，阿姆斯特丹都仲喺納粹魔掌之下，香港人諗清楚未來可能嘅情況。