星期日休息：從來無人教我愛英國

中國人近日好似發咗癲咁，不斷向幼稚園生搞愛國教育，跟住又通過其實有時間停止器效果嘅國歌法，搞到天怒人怨，相信未有一堆人愛中國，先有一大堆人憎中國。中國人一直好妒忌香港有一堆親英派，或者好似我呢啲以英國人為榮嘅人，但老實講，喺英國人管治香港嘅年代，其實無人教我們要 愛英國 ，我讀咗十三年官立學校，都無教我 愛英國 。

愛英國 係因為長大後明白歷史真相

我小學讀官立小學，中學讀官立中學，雖然金文泰中學係以中文授課，但都係英國政府嘅學校。十三年官校生歲月，從來無人教我唱天佑我皇，無人教Union Jack代表邊四個聯合王國嘅組成部分，真係唯一講到係同英國愛國教育有關，係邱吉爾下議院never surrender嘅演說，果陣係中一教嘅，但宗旨都唔係教人 愛英國 ，而係教人要不屈不撓做人。

你話真係 愛英國 係乜時候，除咗1997年因為國籍轉變，我終要面對做一個英國人嘅事實之外，更大其實係明白歷史後嘅比較。真係令人明白英國人對香港嘅好，喺1996年，果陣好多人都會趁復活節假期做中期人口普查官，擔任人口普查員可以講係我唯一喺英國管治時期嘅政府職位。果陣嘅政府統計處人員，第一次受訓就教政府文件嘅分類，乜嘢叫General、乜嘢叫Restricted，乜嘢叫Confidential，一板一眼，有根有據，我都領教過印尼同中國果啲政府文件一片混亂嘅仆街嘢，你完全明白呢個民族，係殖民都要同你講有規有矩，相比起一個唔講道理所謂「祖國」，你覺得邊個係自己嘅國家。

跟住，我變成咗一個研究南洋史同政治嘅人，南洋政治呢家嘢，真係如果我唔做研究，無人會做，我讀政政系果陣，大家只係當鄭赤琰(後來呢條友變咗一條大仆街，南洋華人嘅盲目愛中國病害咗佢)教嘅東南亞政治只不過係笑話堂，因為南洋政治可以好膠，膠到我依家申請印僑證果個website都膠到無朋友，你就知大家只會當係笑話嘅原因，但我唔當笑話，因為我知南洋政治本來就係荒謬，我研究新加坡政治，發現新加坡最大嘅政治遺產，其實都係英國人留俾新加坡人，令新加坡成為南洋嘅唯一樂土果陣，我果陣就開始變成親英派。因為真相係，英國人雖然喺殖民地得到商業以至地緣政治利益，但英國人留低俾南洋同香港遠遠多過其他人所俾。

左膠成日鬧人殖民，但殖民者係唔係十惡不赦，其實我覺得好睇果個宗主國，好似葡萄牙搞到澳門不知所謂，澳門人唔親葡其實有佢道理，或者荷蘭人喺印尼離開華印關係，最後令中共有機可乘，荷蘭佬梗係抵鬧，但英國喺南洋，至少新加坡同香港嚟講，其實俾嘅遠遠多多佢所得，至少李光耀等人都係英國人一手培養，你諗吓荷蘭佬又葡萄牙佬又有無留低任何政治人才或管治方法俾當地人，係無囉，法國更加唔好講，法國結果係輸出一堆讀到走火入魔嘅變態佬，柬埔寨果班屠夫，唔少有法國嘅高等學位(好多仲要係博士)。英國留低俾香港同新加坡，係一套避免激進革命嘅中庸之道，我就知其實英國人除咗將香港未經公投交俾中國係不道德，其實英國人負香港人唔多，呢個亦係我變成親英派嘅理由。

其實喺全球化年代， 愛英國 甚至唔見得比愛地球或愛社區更重要，就算愛國，都應該係建基於歷史同理由，我指歷史係無經過意識形態扭曲嘅歷史，所以我好肯定自己係一個英國人已經係成年嘅事，甚至由於我意識到自己國家認同果陣，已經係英國新工黨上台嘅年代，所以同一啲old British嘅睇法係有衝突(其實睇BNO平權立場就明，近年分歧收窄，因為大家都知英國喺香港實際已經係不光榮撤退，大家立場相近，但背後嘅論述基礎係唔同，我只能係殊途同歸)。所以我唔會盲目係支持自己嘅國家，而英國今日亦唔係血統主導嘅國家，BBC好多新聞報導員係印度裔，英國近年攞諾貝爾文學獎嘅作家都唔係白種人。依家仲用血統嚟區分民族或國籍，已經係希特拉嘅一套，亦係咁解，就算今日嘅德國，其實都已經係一個多血統嘅國家。甚至大家睇更大嘅歐盟，重要過德國本身。

我只可以講，喺互聯網年代，香港年青人日後發現被愚弄，只會更憎恨中國，一如台灣人對中國嘅憎恨。至於果啲五毛，日本軍國主義分子嘅下場其實相對比較好，如果日後真係有乜大事，我唔認為五毛及其子孫有生存嘅希望。