avatarShuk Lai

Summarize

「早出世,早上位,能力唔夠冇問題?」

前言:職場心經喺 JobsDB Hong Kong 嘅專欄,我都會轉載返呢啲文章畀 Medium 嘅朋友睇,希望大家都有所得著。原文連結如下:

返學同返工,我諗對於好多朋友嚟講,分別在於接觸嘅人,年齡層闊咗好多。以前喺校園,同班同學多數同年,入大學之後,同一個課程,大不了咪多幾個 Year 3 、 Year 4 師兄師姐?至少,同一條跑道上面,唔會話忽然有啲叔叔嬸嬸攔途截劫。

但係返工就真係第二個玩法。一個部門上上下下,由老細到茶水阿姐都可能年紀大過自己,初入職場嘅後生仔女,唔學返兩道散手,習慣哥前哥後咁稱呼人,都唔係咁容易融入其中。

好喇,到日子耐咗,大家已經成為公司嘅一份子,工作能力獲得認同,甚至已經喺「晉升的階梯」排緊隊。但係人生嘅另一個迷思又會出現:明明自己表現咁出色 (我相信冇太多人會覺得自己返工表現不濟嘅) ,點解職級高過我嘅嗰個「前輩」,可以揸流灘、懶懶閒、交行貨?

係呀,呢位「前輩」,大家身邊都可能有一個。甚或者,大家都會冠名佢哋做「老海鮮」, “Old seafood” 是也。

對於年少氣盛、自命不凡嘅各位小朋友,「老海鮮」嘅生存之道可能係難以理解,但係賴叔好好醜醜都喺職場打滾咗十幾年,見過甚至交手過嘅「老海鮮」甚至「老油條」真係不計其數。佢哋除咗贏在早過大家出世之外,其實都仲有其他長處,係值得大家參詳或學習嘅。

首先,職場嘅法則,並唔似得校規咁一板一眼寫晒出嚟。俗語講,係要「浸」嘅。浸淫過後,青澀嘅小伙子,就會進化成大丈夫,甚至老油條。如何睇人眉頭眼額,或如何好仔/女兩頭瞞,都係修為嘅一部份。

工作場所有別於學校,唔係單純比拼成績或業績。如何運用交際手腕、面面俱圓去平衡各方勢力,最終達到皆大歡喜嘅局面,講求嘅係修為。而修為,非一朝一夕可以收成。

有一段時期,我老闆係大老闆嘅親信。喺旁人眼中,佢百無一用,除咗從不得罪任何人之外。但平心而論,佢作為大老闆嘅左右門神,喺把關同揣摩上意呢方面又真係有一手。替大老闆消災解難之餘,亦為對落嘅同事擋住部份壓力,呢種「太極」功架,值錢架。

其次,「老海鮮」擅長讀心,尤其是老闆嗰個。知人口面不知心,從來唔係前輩嘅煩惱。即使呢一刻搞唔清楚,透過人脈、收風或者鑑神辨色,謎底自自然然就會解開。呢啲 social capital 同 soft skills ,同樣並非 GPA 4.0 或者考多幾個專業資格就可以鍊成。

大家要接受一個現實,陳年佳釀,係必須畀足夠嘅時間去醞釀,急都都唔嚟。頭先講嗰位「太極」高手,喺公司一早搭通天地線,對於一個項目牽動到邊個陣營嘅神經,以及如何交換條件解難拆彈,都可謂瞭如指掌。呢個特殊技能,千金難買。

最後,亦係最緊要嘅一樣嘢,係知所進退。你撞過嘅板,前人九成九撞過。你識表演嘅把戲,好可能並非「前無古人」。早過你出世,目睹過一啲你未曾經歷過嘅事件,已經係優勢。能夠好好運用,喺適當嘅時候藏拙,喺需要嘅時候獻醜,都係「老海鮮」喺老細眼中嘅價值所在。

畢竟老細都係人,返工都講求 feel good ,如何搭個棚畀老細舉上去威威,又如何卑躬屈膝畀老細宣洩情緒,都需要經驗去好好拿捏。呢啲難以量化嘅優點同長處,喺大家未領略同掌握之前,就當係自己 “underpaid” 嘅原委啦。至少咁樣,大家會舒服啲啲。

圖片來源: https://flic.kr/p/21zEai7 by Matthias Ripp
香港
中文
職場
工作
Integration
Recommended from ReadMedium