旅行隨筆：羅馬的貓

好耐之前寫咗意大利嘅火車，今次寫返城裡面嘅事先。我第一站係羅馬，但我想寫啲與別不同嘅地方，所以古蹟就唔多講，畢竟梵蒂岡、萬神殿、鬥獸場我諗太多人去過、講過。羅馬幾日裡面，令我感受最深刻嘅係間 Airbnb 所在嘅聖安哲羅區，同埋嗰度附近一個羅馬神殿遺址嘅一竇竇貓。

聖安哲羅區 (Sant’Angelo) 係羅馬以前嘅一個分區，曾為猶太區同貧民窟。嗰度唔少舖頭、建築仍然有啲猶太特色，區內亦有猶太教堂同埋大屠殺紀念碑、紀念館。

呢區雖然離火車站唔近，亦唔喺地鐵沿線，但交通都幾方便。來往火車站或者係去梵蒂岡，都可以搭快速巴士 40 號。區內亦有電車線，因行程關係無緣試搭。步行嘅話，向北行幾個街口就係萬神殿 (Pantheon)，向東行就會去到紀念意大利統一嘅祖國聖壇 (Altare della Patria) 同埋古羅馬嘅羅馬論壇 (Foro Romano)。

上面呢座就係祖國聖壇。啱啱去到羅馬，架巴士經過威尼斯廣場時，呢座咁巨型嘅聖壇好暴力咁進入眼眶，睇到我嚇咗嚇，第一下仲以為聖壇就係威尼斯廣場。不過威尼斯廣場實情只係聖壇前嘅廣場，得名於隔離嘅威尼斯宮。由於威尼斯廣場係幾條大馬路交匯嘅地方、廣場旁邊亦設有電車總站，喺呢度過馬路有些少麻煩。而根據網上討論，我並唔係第一個一開始當咗祖國聖壇係威尼斯廣場嘅遊客。

我哋落車嘅巴士站叫 Argentina。最初以為係同阿根廷有關，後來查返先知 Argentina 巴士站得名於隔離嘅古羅馬神廟遺址。呢個遺址叫銀塔廣場 (Largo di Torre Argentina)，得名於一位十六世紀喺呢度住嘅教廷司禮長 Johannes Burchart。由於佢係史特拉斯堡人，所以啲人就叫佢啊銀 Argentinus，久而久之佢寓所嘅名亦變咗做銀塔，之後仲成為附近社區嘅代稱。

咪住——史特拉斯堡明明叫 Strasbourg，同銀、同阿根廷有咩關係？事緣史特拉斯堡古代拉丁文名叫做 Argentoratum，得名於嗰度相傳有貴金屬 (特別係黃金) 開採。至於 Strasbourg 呢個名就來自日耳曼語系 (今德文 Straßburg)，即係有街道嘅城。

所以照道理 Argentoratum 可雅譯「金城」，而 Strasbourg 則可譯「街亭」。

不過當年嘅銀塔係喺遺址範圍隔離，唔喺裡面。而喺阿銀住喺銀塔嘅年代，亦冇人知道呢區地底埋咗四座神廟。隨住時間過去，銀塔亦已消失於歷史長河。現今嘅銀塔廣場遺址，係喺上世紀二十年代拆遷活動時發現。考古學家喺度發現咗啲古羅馬雕塑，進而展開考古挖掘，就是就掘咗成個遺址出嚟。遺址裡面有四座羅馬共和國時期嘅神廟，而凱撒遇弒嘅龐貝劇場，亦有部分位於遺址範圍內。

咁呢度又同貓有咩關係呢？由於遺址喺挖掘後就冇受維護、修葺，而係直接荒廢咗喺度，於是隨住時間過去，羅馬嘅流浪貓就開始搬入去遺址度住。去到五十年代，演員 Antonio Crast 發現咗喺而家豐盛街 (Via Florida) 正下方、二十年代啲考古學家用嚟存放工具嘅倉庫，就開始咗喺呢個倉庫裡面照顧啲貓。倉庫鎖匙同埋餵貓、湊貓嘅任務自始一代傳一代。由於越嚟越多貓搬咗入嚟住，喺 1993 年一班有心人喺呢度正式成立咗個庇護中心照顧啲貓，醫好佢哋、幫佢哋打針同埋絕育。

庇護中心好歡迎遊客參觀，喺豐盛街同銀塔街路口行樓梯落去就係。我同女朋友去嗰陣，位義工好雀躍咁同我哋介紹佢哋嘅宗旨、工作，同埋喺裡面嘅貓嘅故事。嗰度好多流浪貓以前都好慘，有啲對腳受傷，亦有啲隻眼睇唔到嘢。佢哋唔會逼啲貓留喺裡面發吽哣：啲貓係可以自由出入嘅，想入去瞓覺食嘢亦得，趴喺出面遺址啲磚牆或者草地上面都得。

庇護中心內有 T 裇等物品義賣，佢哋亦都接受訪客捐款。想了解多啲嘅朋友，可以上呢度睇多啲佢哋嘅故事。

順帶一提：Argentina 巴士站個巴士售票機係壞嘅，嗰陣連續兩日俾佢食咗一張票嘅錢 (€1,50)，去到臨走嗰日先知隔離間士多有得買飛⋯⋯同店員講「Buongiorno, un biglietto, per favore」就得。