旅行隨筆：維也納地鐵

搵返篇 2019 年嘅草稿寫埋佢

Vom Westbahnhof ins Schloß Schönbrunn, Anschluss in Längenfeldgasse, in der’s 3 Gleise gibt. Wieder mit der U6 in die Luft. Spittelau bis Schwedenplatz, wie Invalides bis Champ de Mars.

二零一九年七月八日星期一，喺鹽堡 Salzburg 三日兩夜後，我食過酒店早餐、喺頂樓睇多次風景，就快快手手落咗去退房，行過隔離火車站，等搭火車去維也納。架火車係去維也納中央車站 Hauptbahnhof [1] 嘅，但我 book 咗嘅 Airbnb 係喺西站 Westbahnhof 附近，所以要喺聖帕爾滕 St. Pölten 轉一次車。

不幸地架火車中途延誤咗十幾二十分鐘。即使我本身要轉嗰班車都一齊延誤咗成個字，我落車嗰刻佢都開走咗了。於是我就去咗票務處攞延遲證明書，同時出過張飛，等三個字後另一班去西站嘅普通車。還好去到維也納都只係下午四點零鐘嘅事。“

„Entschuldigung, äh… ich hab’ diesen reserviert, aber wegen… wegen Verspätung…’’ „That’s OK it isn’t your fault“ „Dankeschön“

放好行李後，我沿住西站站前嘅商店街 Mariahilfer Straße 行。沿住行就會進入內城區 Innere Stadt，首先係博物館區 Museumsquartier，轉個彎再過馬路就係瑪利亞・泰蕾莎廣場 Maria-Theresien-Platz，同埋兩邊嘅藝術歷史、自然歷史博物館。再過去就係冬宮 Hofburg 嘅範圍，再遠啲可以去到市中心嘅聖士提反大教堂 Stephansdom。呢段路大致同維也納地鐵 U3 綫平行。

U3 係條車站、月台設計相對簡單嘅典型地鐵路綫，東西向咁貫穿維也納，並且喺大教堂前嘅士提反廣場 Stephanplatz，同南北向貫穿維也納嘅 U1 綫交會。U2、U4 則喺內城區合組成一個環形，圍繞住內城區，再以唔同方向伸展至市郊。而不入內城區嘅 U6 綫，就主要服務維也納西面同北面。

呢個設計感覺有啲似，幾條路綫以台北車站為中心圍成一個環形、方便唔同路綫直接轉車嘅台北捷運。而同其他路綫分得較開、大部分路段架空嘅 U6，亦有啲似北捷嘅文湖線。（雖然呢個講法有少少「韋拿踢法似我」。）

由西站前往參觀美泉宮 Schönbrunn，可以搭 U6 轉 U4 過去。U6 列車一離開位於地下一層嘅月台，就馬上鑽返上地面。列車沿天橋越過維也納河後，就到達轉乘 U4 綫嘅長原街 Längenfeldgasse 站。呢個站係並排嘅雙島式月台設計，乘客可以直接過對面轉乘同一方向（入城/出城）嘅 U4 或 U6 列車。

講開又講，U4、U6 都係由 1898 年開業、最初係用蒸氣火車頭嘅舊維也納城鐵（Wiener Stadtbahn，同現今 S-Bahn 唔同）改建而成。所以兩條綫都有較多嘅露天路段，月台嘅設計亦同 U1、U3 等唔同，整體感覺比較古雅。

有一日我又係搭 U6 轉 U4，不過今次係北上，去到 Spittelau 轉 U4 返入市中心。由西站北上嘅列車，同樣係一出站就衝上地面，喺有上百年歷史嘅高架橋上行駛，沿途乘客可以觀賞到維也納嘅街景。

而 U4 離開 Spittelau 後，就會沿多瑙運河（Donaukanal，中世紀曾為多瑙河幹流）南下。乘客可以隔住鐵絲網，窺看河邊嘅公園同步道。呢段路有啲令我諗返起，之前由凡爾賽搭 RER-C 返巴黎，去到塞納河邊都有段差唔多景色嘅路。當然維也納呢面乾淨啲，同埋 U4 冇 RER-C 咁嘈。

順住 U4 搭到卡爾廣場 Karlsplatz，可以再轉乘 U2 綫，沿內城區搭足一圈。U2 以紫色為代表色，沿綫各站嘅牆身亦有唔少係用紫色紙皮石鋪成，有種太子站嘅氛圍。（不過冇太子站嘅味道。）

至於 U5 — — 而家嘅維也納地鐵係冇 U5 嘅，不過過多兩年就有嘞。U2 將會由市政廳 Rathaus 站向南延伸，完工後 Rathaus 至 Karlsplatz 嘅 U2 路段會撥入新嘅 U5 綫，再連接北面嘅新路段。（啱啱上官網望咗望，原來 U2 呢部分路段已經因應工程，由今年五月尾開始停運，暫定 2023 年秋天重開。）

同第一次搭巴黎地鐵，嗰種期待下個車站有冇特色裝潢 [2] 嘅刺激、新鮮感唔同，維也納地鐵畀我嗰種感覺，或者可以話係樸實之中嘅舒適、愜意？

[1] 同德奧瑞大部分中央車站唔同，維也納嘅 Hauptbahnhof 係新起嘅，離內城區市中心有大段距離，甚至有另一個更接近市中心嘅 S-Bahn 同機場快綫 CAT 車站叫維也納中站 Wien Mitte。

[2] 例如新橋站（Pont-Neuf，唔係東京嗰個）牆身啲錢，巴士底站嘅革命壁畫，協和站牆身嘅人權宣言。