旅行隨筆：一戰停戰協議之地

呢篇遊記本來應該喺一戰一百周年結束前寫嘅，但我擺咗喺草稿度太耐，結果而家已經過咗停戰 101 年先放上嚟。中文版後補。

半年前寫到 grad trip 由伯恩 un 火車 un 咗四個幾鐘去巴黎，而家就寫返喺巴黎嘅事。第一次嚟到呢個法國首都，旅程比想像中愉快，冇咩大失所望嘅事情發生，亦只係喺榮軍院 (Les Invalides) 附近一間 café 食過一次種族主義悶棍。

個零禮拜裡面，除咗凡爾賽、羅浮宮、榮軍院、百貨公司s 等多數人第一次去巴黎都會去嘅熱門地點外，我哋仲去咗大王宮 (Grand Palais) 睇一個社會主義藝術嘅展覽，同埋抽咗日去東北部小鎮康邊 (Compiègne)。去嗰度嘅原因，主要係想趁一戰停戰 100 周年內嘅時候，去返呢個當年德法簽署停戰協議之地留影。之後我哋就幸運地喺熱浪侵襲前，走咗佬去北面嘅加萊 (Calais) 停留幾日。

由巴黎去康邊嘅火車係由北站 (Gare du Nord) 出發。不過女友要先去隔籬東站 (Gare de l’Est) 嘅時裝舖退返件衫，所以我哋就由 Airbnb 先行去東站，再行返過北站。即日買去康邊嘅來回飛約 €30，兩個人加埋就 €60 鬆啲。去康邊嘅火車都係普通 TER，快車大約 40 分鐘，慢車就要大約個零鐘。

紀念館嘅位置喺市郊森林一個角落，而嗰度係冇公共交通工具過去嘅。所以等咗陣的士之後，我哋就 call 咗架 Uber過去，埋單約 €15。

落車首先見到嘅，係通往紀念館嘅林蔭路入口對面嘅雕塑。一把劍插落隻殞落嘅鷹度，象徵法國喺一戰戰勝德國，解放普法戰爭落敗後一度失去嘅阿爾薩斯 (Alsace) 同洛林 (Lorraine) 故土。

沿林蔭路行入去，就係當年兩次簽署停戰協議嘅車卡當時嘅所在位置。整個紀念館園區由森林裡面嘅一大片圓形空地、紀念館建築、雕塑及眾多紀念碑組成。空地空地由兩段平行路軌割開，兩段路軌近圓心嘅位置皆有一塊石碑，分別記錄住 1918 年德國同協約國雙方車卡嘅所在位置。空地圓心亦有一塊大石碑，紀念兩次大戰中為國捐軀嘅軍人。

沿住「德國車卡」所在嘅路軌行到空地角落，嗰度矗立咗座帶領法國打贏一戰、代表法國簽署停戰協議嘅福煦將軍 (Foch) 雕像。而沿住「協約國車卡」所在嘅路軌行，就會行到位於空地另一角嘅停戰紀念館。入口前一段小徑及旁邊嘅小花園，豎立咗唔少紀念碑，紀念喺唔同戰役犧牲嘅大小兵團。

入到紀念館首先要買飛，入場費 €7。入場券嘅設計模仿舊式火車飛，睇落幾特別。而入場後首先見到嘅，係當年簽署停戰協議嘅車卡嘅複製品——點解唔係原本節車卡？

原本節車卡喺 1940 年第二次簽停戰協議後，俾希特拉下旨運返柏林展覽，後來運到圖林根 (Thüringen)。車卡喺 1945 年一場大火中燒毁，只剩低車底同扶手等少量組件仲用得。戰後車底獲重用做貨運用途，直至七十年代退役。散失嘅零件後來陸逐獲捐返紀念館，部分作為展品展出。

經過車卡左邊後會走入一個細細地嘅大堂，門口對面佈置成一個祭壇咁，三枝旗杆掛上美、英、法三國旗幟，紀念三國軍人。而兩側嘅牆身則刻上多場一戰重要戰役嘅地點，附有圖文說明幾場重要戰役嘅經過及對戰局嘅影響。房間內有幾部類似望遠鏡嘅機，裡面有好多士兵、戰場同戰後廢墟嘅相片，遊客可以自己望入去捲嚟睇。

穿過大堂後就會進入講述法國一戰後至 1940 年投降之間歷史嘅展覽。展覽先介紹一戰末期，德國向法國提議停戰嘅經過，同埋簽訂停戰嘅過程。揀喺康邊市郊森林呢度簽署停戰協議，係法國代表福煦將軍嘅主意。

根據展覽所講，協約國唔揀喺本身已經有座王宮作為議場嘅康邊市區、而係另闢地方簽署停戰協議，唔單只係想避免早幾年先被德軍蹂躪過嘅康邊市民攻擊德國代表，亦係想避免過分羞辱德國。孰真孰假，不得而知，展覽亦講到佢曾經下令禁止記者影相。當然有禁令就自然有人犯禁，如果唔係就唔會有當日嘅相片流傳後世嘞。

下一個展廳講述嘅，係戰間期嘅國際形勢，由法國及世界各地戰後復元嘅過程，去到法西斯崛起之路以及二戰爆發，當然亦有講到停戰紀念館嘅由來。目前嘅紀念館原來係喺二戰後重建嘅第二代，而最初諗到起紀念館，以及出資興建第一代紀念館嘅，都係美國人。

再下個展廳就係介紹法國淪陷同第二次停戰嘅經過。為咗將停戰車卡運返出上次簽約嘅位置，希特拉下旨拆毁第一代停戰紀念館。至於佢喺簽約期間點樣羞辱法國代表嗰啲，我諗大家上網都睇到。同上次官方低調處理嘅態度唔同，德國今次停戰協議隆重其事，仲幫埋外面嗰座一把劍插住隻鷹嘅雕塑冚旗。冚嘅當然係納粹旗啦。

最後我哋經過大堂，出返去展示停戰車卡間房嘅另一邊。走廊牆身除咗講述停戰車卡最終命運，及解說各個協約國同殖民地喺一戰嘅貢獻外，亦展示咗一啲協約國嘅戰爭宣傳海報。

走出紀念館，我哋喺花園行咗個圈。花園內嘅紀念碑紀載咗法國百幾年嚟嘅戰爭史：喺西非嘅多場殖民戰爭、普法戰爭、一戰各場戰役、二戰法國戰役，以及後來對抗殖民地獨立嘅戰役。較近年者，則有紀念喺 1983 年黎巴嫩貝魯特軍營炸彈襲擊喪生、以及 2008 年喺阿富汗被塔利班埋伏陣亡嘅士兵嘅石碑。此外法國外籍兵團亦有塊大碑紀念其一戰戰功。

臨走前我哋再喺空地度行多個圈影相。下面嘅法德雙語碑文，記錄住法國總統馬克龍同德國總理默克爾二人，喺 2018 年 11 月 11 日一戰停戰百周年當日，重申德法兩國和解，對服務歐洲、對世界和平有幾重要。

由於冇公共交通工具，我哋本來諗住再 call Uber，但係冇車肯過嚟。最後唯有請紀念館嘅職員幫手 call 的士返康邊火車站。雖然康邊本身仲有個王宮，但因為返到火車站已經五點、我哋又想早啲返巴黎，就冇特登行返過去了。火車站外馬路嘅聖女貞德像 (因為佢喺度俾勃艮第俘虜) 亦都冇睇到。

由於展覽內容以法文為主 (雖然多數內容有英、德文翻譯)、加上紀念館位置比較偏僻，所以我都係建議大家識返少少法文傍身再去會較好。而對小妹嚟講，呢次半日遊絕對係好有意義嘅。

題外話：值得一提嘅係，喺巴黎東站同北站正面入口嘅外牆同屋頂，都刻有唔同城市嘅擬人雕像。東站兩個屋頂，分別坐住一戰期間傷亡慘重嘅凡爾登 (Verdun)，同埋戰後從德國手上奪回嘅重鎮史特拉斯堡 (Strasbourg)。北站規模就大好多，除咗多個法國北部、西北部城市外，仲有倫敦、布魯塞爾、阿姆斯特丹、維也納等外國首都嘅雕像。而位於正中間最高最大嘅，自然就係巴黎嘞。