搭上方舟

喺賴叔成為賴叔之前，都曾經滿有抱負、一腔熱誠、動不動就因為一啲唔公平、不公義、有道理嘅事情而咆哮，或者寫千字文。

根據非正式統計，我咁多年嚟寫文嘅長度都係介乎 1,000 至 2,000 字左右，《上一個豬年》引用嘅，好明顯係當年嘅節錄。太短，我覺得到喉唔到肺 (即係我個人唔得言簡語賅， aka 長氣) ；太長，我又會失去焦點，何況我都唔鍾意引經據典，好少可爆字數。

2007 年，我投筆從戎，係金融個「融」，冇得返工寫字，變咗放工打文。寫緊以下呢篇嘅時候，我已經出席過一兩次某銀行嘅面試。唔知有預感定係預先扯白旗，當時我已經有心理準備，好快就要轉行。

生於香港，是一種福氣，也是一種不幸。因為香港記者再出色，接受的訓練、可做的項目，永遠受這一塊彈丸之地的面積與政治現實所限制；也因為如此，真正影響你我他她牠的動盪大事，不會有本港新聞從業員的份兒。即是，當初的「想做戰地記者」，或現在某台所標榜的「走在事實最前線」，根本不符現實，更顯得自欺欺人。

奉勸現在還在學院的師弟妹們，認清香港傳媒生態；明白傳媒只是商業社會的一個環節；理解自己不過是其中的一隻棋子，而不是棋手。之後，才許下任何宏願。「世界和平」之類，八十歲黃伯與三歲陳小妹妹有生之年都看不到的狂想，還是省下來比較好。

認了吧。我絕對樂於承認，是自己能力不足、性格不適合，所以選擇承認失敗，然後conform to reality。

往後要做的，是「自己要做甚麼甚麼」以滿足別人的要求。是求己，不是求人。如果自己做得不夠好，唯一選擇是繼續努力。因為再不會幻想「別人可以給自己甚麼」或者「自己可以得到甚麼」。暫停替自己估值，換來的是等待一天別人跟自己說「你值幾多幾多」，期間，就用書本、電影、音樂填滿自己的生活。

這一年的所得，大概也符合自己曾經說過的「當做一、兩年intern」。或者累積下來的工作經驗不會令resume漂亮多少，但其中的見聞，高低起跌，換來對現實的體會、學懂妥協的藝術對於生活的重要性，該就是最大的收穫。我固執、硬頸嗎？依然。我隨和、順從嗎？也有點。站在十字路的街頭，我知道快樂是選擇。

(2007 年 6 月 18 日)

呢一次轉工兼轉行嘅影響，對我嚟講當然係極度深遠。冇轉工，就冇今日嘅賴叔。咁係好定唔好？好卦，至少物質生活基本不缺；精神上亦較少因為自怨自艾或者憤世疾俗而健康少少；學識上，亦因為入咗一個特定行業而變得專門少少。

冇轉工，更加唔會有今日嘅置記。點寫《漫遊中環》呢本書啫？能夠將工作同興趣或嗜好切割，其實真係幾爽。唔明？之前咪有寫過「第二生命」囉⋯⋯