「捉鬼」真係好無謂

元旦遊行因灣仔匯豐被裝修，其間有和理非捉鬼，繼而爆發警民衝突，最後被迫終止遊行。事後諗返，和理非民眾到底有乜野需要檢討？

記唔記得元旦點解要出黎行？

元旦遊行呢尐傳統節日，一向都係七一遊行窮人版，規模細，人數少。2019的元旦遊行只有5,500人參加（呢個唔係警方數字，係民陣數字），所以1月1日2:00pm已經企爆草地銅鑼灣，要提早開始遊行的一刻，和理非在展現人數的目標已經贏左。

另外，大家唔好忘記6.16二百萬人大遊行的教訓，我地而家面對的政權，並唔係靠遊行展現民意就搞得掂。所以警方會想破壞遊行，就算俾你和平完成遊行，林鄭政府亦唔會順應民意而改變。

遊行完，然後呢？

唔係話遊行完一定無效果，例如2003年七一遊行後會有田北俊帶領的自由黨倒戈、2004年七一後董建華下台、2014年七一遊行連接雨傘運動，不過更大部份的遊行後係聽朝9點要返工（我已經好怕呢種心態），而且大家都清楚今次遊行係反修例運動的中途站，所以若果元旦遊行和平完結，根本沒有為反修例運動增值。

難得有「鬼」

其實無論搞裝修的係手足定鬼，最終警方都會借題發揮，終止遊行及清場。其實對整個運動的影響都係正面。第一，再次證明香港的集會自由受嚴重限制；第二，警察濫權濫捕尚未停止；第三，香港政府對反修例運動依然無動於衷。我地有一班打文宣同國際綫的手足，時時刻刻需要彈藥，一個元旦遊行除左展示103萬人的堅持，仲有咁多增值真係何樂而不為？！我明白和理非會驚會怕，老弱可能要食摧淚彈甚至其他警暴，但今時今日的係香港你未食過TG但你話你係黃？

假設遇到懷疑係「鬼」

了解咗背後意義，其實好易處理。

如果佢係真手足，你捉到佢，手足暴左光，咁以後就真係少個手足。

如果佢真係鬼，你捉到佢，你隨時係襲警，就算俾你跟到佢，影到佢行入警署，咁又點？唔通你認為佢會受法律的制裁？不要太天真吧？獨立調查委員會一日未有，呢班黑警依然逍遙法外。

所以最好的方法就係唔好理佢，怕的就離開現場（因為好有機會防暴黎緊），因為無論結果如何，都係警方終止活動的借口，睇完戲、食完花生可散水。

圍觀的力量

可能大家見到遮陣會興奮，見到black bloc跑上前綫會高興，其實呢尐都係係多餘的。我唔明白放條快線俾勇武跑上前綫送頭有乜意義，既然元旦遊行係和理非主場，和理非就應該保護返勇武手足，平時黑警截查小朋友大家都識舉機圍觀。留低、人多，可能要食TG，但同樣可減少黑警濫捕的情況。點解銅鑼灣會有400人被捕？因為103萬人差唔多走晒，佢地已經「落單」。請重溫去年七一入立法會的畫面，「留就一齊留、走就一齊走」咁先對大家最安全。

聽聽少年話

筆者係整個遊行都在維園草地當民陣義工，除左「光復香港 時代革命」「五大訴求 缺一不可」外，好多年青人都叫「香港獨立 唯一出路」，和理非們，出黎並唔夠架，緊跟時代，為少年人護航吧。