我嘅一粒鐘，你嘅五分鐘 (之二)

2020 年嘅第一季好快就完結，老套啲問句，大家嘅 new year resolution 進度如何？我唔知，因為我本身都冇定下啲咩目標。

又咁講，我係一個對數字及文字敏感，但對時間概念模糊嘅人。例如話，見到美國嘅波音公司 (BA.NYSE) 股價由一年前嘅頂 USD 440 插到去今年三月中嘅 USD 100 我會覺得誇鳩張而買少少 (三股，你話多唔多？) 然後乖乖地擺埋佢，唔好因為見到反彈上 USD 180 而割禾青。

當然，賴叔貴為一代股壇明燈，大家見到我貪婪時應該恐慌至係。唔信？我壯舉都唔少，當中包括喺 2007 年以近 HKD 50 買入中國神華 (1088.HK) 然後坐艇到唔見咗八成市值先至沽出 (其實係想用 HKD 8 / HKD 9 撈底但係㩒錯掣沽貨⋯⋯) 。

唔夠柒？嚟，仲有一單：我喺 2014 年買入 Imation (有冇人記得佢嘅出品？除咗 USB 手指呢，仲有 120MB 容量嘅 SuperDrive 呀朋友) 然後揸到佢跌到唔夠一蚊，要十合一，然後再跌到變成 GlassBridge Enterprises ，一間做資產管理嘅公司，再到呢間公司喺紐約交易所除牌，股票只可以移師場外市場 (OTC market, “Over-the-Counter”) 買賣，而我喺銀行揸住嗰啲股票就基本上變撚咗廢紙。

Erm. 講遠咗。我原本只係想演繹，我對數字 okay 敏感，完。至於對文字敏感，我相信大家從我對於遣辭用字嘅一啲執著位，例如非常抗拒使用共式文字 (例如「打造」、「加大力度」等) ，又例如一啲非常無聊嘅爛 gag 食字 (例如：「一袋鍾斯 ＝A bag of Jones 」) ，應該都見微知著，唔需要用「我對奶敏感」呢啲咁明咁白嘅解說 (雖然都仲係有歧義，應該予以斥責⋯⋯「斥歧義」 [戚其義，有冇人識笑？]) 。

好。咁對於時間嘅概念，又係乜嘢一回事？

改編自日本漫畫《頭文字 D 》嘅同名香港電影入面有一句經典對白：黃秋生飾演嘅藤原文太咁樣講起周杰倫飾演的主角藤原拓海：

「個衰仔佢同我講，佢話最近唔知點解，睇所有嘢都好似越嚟越慢咁樣⋯⋯喺嗰陣時，我就知道，佢越嚟越快。」

我都有揸車，咁當然就冇得好似拓海咁上秋名山鍊返轉，一日最多都係龍翔公路走三遍，時速快極都係七十幾公里 (超速係違例，係唔～啱～嘅～) ，好難領略到嗰種「睇嘢越嚟越慢」嘅境界。

但係另一方面，我有返工，每個月都有糧出。我好記得，亦應該曾經寫過，當我每個月要數算住某啲「紀念日」，例如「13 日加入公司、 26 日出糧」咁，我就知道時間過得慢嚟越慢，喺公司嘅日子越嚟越無趣味。

時間，其實係一個相對嘅概念。睇一套好爛或者好悶嘅電影嘅時候，我都係久唔久就睇下錶，然後發現自己只係坐低咗 15 或者 30 分鐘嗰陣就會好後悔。換個角度講，踢一場波，走上走落，唔覺唔覺就已經粒幾鐘，話咁快就吹雞要交返個場出嚟。

由於時間具備相對而非絕對嘅特質，林夕喺香港樂壇神作《魅力移動》寫下嘅「我的一分鐘和你一分鐘，怎會與你相沖，可以各有輕重」，其實真係冇錯，唔係鳩嘢。我嘅一分鐘，同你嘅一分鐘，喺各自嘅時空之下，我行緊路、你跑緊步，時間長度或者一樣，但重量可以相差好遠。

今晚喺 Facebook 見到有個 Facebook Page 嘅主人，流浪旅行到秘魯，然後因為當地有旅客返回墨西哥之後確診武漢肺炎，而被當局勒令喺旅舍隔離。唔係自我隔離，因為佢要與同房嘅十個八個旅客喺同一空間內一齊隔離。而隔離嘅時間，講緊係一至三個月。

顯而易見，畀你喺外國自由行三個月，同要你喺外國旅舍被困三個月，係差天共地嘅。喂，自由行，日日去唔同景點，今日飲紅白，聽日飲蘇威，時間過得幾快？喺陌生地方等時間過，動彈不得又冇得四圍出走散心，唔度日如年就假嘅。

Back to my first question: 大家今年嘅 new year resolution 實踐成點？三個月以來，除咗屌鳩 PoPo 阻住大家慶祝新年、搶訂口罩、搶廁紙、搶米、搶廚房紙 (我樓下間超市到家下仲未返貨) 、搶滴露⋯⋯大家做得最多嘅係咪 work from home ？

好老實講，在家工作，係好消磨意志嘅。冇得喺公司騰嚟騰去，冇得同同事吹水講是非 (喺 WhatsApp 講嘅效果點都差啲) ，因為公事畀人激親而想屌人嘅時候，頂多只可以隔住電話對住空氣發炮，同兜口兜面噴到對家一面屁，快感遜色好多。同埋，由於社會運作停頓，公司業務發展都會受影響，嗰種停滯不前嘅感覺，又係會令到時間流動嘅速度相對地變得更慢。

凡事總有兩邊嘅。 Here comes the good news: 即使大家過去三個月俗務纏身而庸庸碌碌，由於武漢肺炎疫情預期仲有一年半年貨仔，隨時持續到年底，目前呢種時間慢溜嘅狀態，有利於大家嚟緊九個月要後來趕上同追進度。

我份人，久唔久就會對於政治厭倦，對於社會漠不關心。對上一次，係 2016 年尾、 2017 年初。當年本土派嘅立法會議會因為宣誓風波而被取消資格，然後林鄭月娥當選行政長官。自此之後，出現咗《職場心經》作為主打嘅一段時期，直至 2019 年 6 月為止。

2020 年 3 月，我有另一種好強烈嘅渴望，好奇怪地，我係想睇雜誌。咁梗係唔係睇《東方新地》或者《 Elle 》啦。早前我拎住本購自英國嘅《 GQ 》 (Gentlemen’s Quarterly) ，封面係 Daniel Craig 。雖然入面有利物浦球員 Alexander-Arnold 相當之趕客嘅訪問 (有邊個曼聯球迷想睇一個利物浦新星專訪？) ，但係唔知點解，我覺得生活缺乏一啲營養， somehow 可以喺一本有觸感嘅雜誌度補充下。

喺香港，要搵本類似級數嘅雜誌，好難。我今日喺便利店拎過幾本類似嘅嘢上手，唔開名啦，廢事，但係，真係差幾皮。由於我懶惰嘅關係，以下開放畀大家介紹有咩雜誌好睇，同埋有咩途徑可以買到。電子版或者網上訂閱呢啲就唔使喇，平時返工放工仲玩唔夠手機咩⋯⋯