「想清洗所有紀錄試過結識你」

上回講到，如果讀 Master degree 係為咗搵工跳糟，比較似樣嘅選擇係得 MBA 。問題係， MBA 究竟憑乜嘢收你三四十萬？

咁又訴諸返呢個世界「識人好過識字」嘅定理 (就快變 Rule of Thumb 咁滯) 。相信好多人都聽過，甚或自己講過，讀 MBA 最主要就係識人。

講真丫， hard knowledge 如會計、財務、管理同經濟呢啲， BBA 要讀嘅都讀晒，冇讀過嘅喺水過鴨背嘅 MBA 課程入面亦唔見得會學識 book keeping 或者分析 yield curve 背後嘅深意。課程本身只係一個載體，為嘅係畀你班友一齊困獸鬥，擦出火花又好，磨練得一身上乘武功又好，總之係提升你自己嘅過程。

喂，又話「識人」嘅？做乜講咗去「提升自己」？即係咁，識人，我覺得起碼有兩個意思：一係認識多啲唔同嘅人，即係大家原本諗緊嗰個意思；二係懂得閱讀同理解別人，性質類似「相馬」或「品酒」。

先講第二個解釋。 MBA 一般嚟講分兩種，一種係 full time ，畀嗰啲做咗三年嘢，可以奢侈地 take 個 gap year 嘅後生仔女入嚟雕琢下自己嘅知識同 soft skills ，以便轉身射個三分波，入 Investment Bank 嘅 Associate Programme 行條快線。當然都有啲成熟啲嘅人真係劈炮唔撈一年，攞嚟為職業生涯重大轉向做好準備。但少啲。

另一種 MBA 係 part time ，履歷由三至十九幾年不等。但一般嚟講，平均都係做咗七至八年嘢，事業去到樽頸位，人生嚟到三字頭，想要尋求一個突破，於是豪擲六位數字嘅學費，攞苦嚟辛。如果話 full time MBA 係天之驕子，咁 part time MBA 某程度上係敗部復活。又當然，總有啲人可能係從事家族生意，為咗裝備自己準備接棒而讀個 MBA 。

點解話 part time MBA 攞苦嚟辛？因為通常有份 full time job 星期一至五朝九晚六七八咁返。剩低一係閒日夜晚、一係星期六日嘅日間，即係私人時間同休息時間。咁犧牲呢啲寶貴時間用嚟返學，其實都係對體能同精力嘅一大挑戰。

Having said that 呢班兼職學生都有返好幾年工作經驗，大公司嘅推莊、小公司嘅一腳踢，睇唔晒都起碼講得出。至於點樣管教啲細嘅、點樣招呼老細，當然都係家常便飯。又由於 MBA 海納百川，由金融、科技到零售、廣告甚至藝能、教育界都有人入讀，大家交流得耐自然增長見識，視野唔會停留喺自己公司或所屬行業嘅層面咁狹窄。呢種識人，或者係睇眉頭眼額，或者係推敲 hidden agenda ，係教科書唔會教，其他學科做 project 都難以修煉到嘅功夫。

除咗識「別人」，學習嘅過程其實都係重新認識緊你自己。當你每一次同唔同嘅人合作，身處唔同嘅崗位，你知道自己 comfort zone 喺邊、做啲乜嘢一定唔出事，但既然交功課都好難肥佬，有空間畀你試下做啲未做過或唔會做嘅職能， why not ？同你一齊 go through 呢個過程嘅同學，既係你嘅戰友，亦係你嘅鏡子同導師。更深入地知道自己有所為、有所不為之後，事業前路嘅抉擇縱使冇包生仔，但至少把握大咗。

至於第一個「識人」，即係交朋結友、廣結善緣嘅意思，除咗好簡單直接咁為你添加一啲 business contacts ，準確啲講係為你舖好職場上嘅社交網絡。先前講過 LinkedIn 嘅玩法， MBA 為學生帶來校友嘅網絡、帶來上屆現屆下屆嘅聯誼機會，當然亦有業界人士講 Career Talk 或 Seminar 所製造嘅契機。點把握就因人而異，但門就幫你打開咗好多度喇。

所以話，「識人好過識字」，正正係 MBA 課程值錢嘅地方，亦係其他專門 (例如 Finance 、 Economics 、 IT) 學科、冇咁著重學生及校友之間聯繫嘅碩士課程所無可比擬嘅地方。唔使擔心我呢篇係廣告，如果係廣告嘅，我又點可以唔開啲大學嘅名呢？放心，如果真係有朝一日有 paid content ，呢度一定有利益申報。