＃從來是這動人場地
呢個世界有好多紀念活動，我地都唔知佢地係咪真係想紀念既。果d儀式，一直係度，就會係度囉。
好似，有人初一十五會食齋，中秋食月餅，端午要派粽。中國人節氣呢回事，本來就係提醒人時間會過，而且仲會係不經不覺咁覺，所以得閒要做d野，先至值得存在。
但到後尾，我地發現好多野，都真係只剩下儀式。又咁講，係香港，如果有人質疑，問點解中秋要食月餅，端午要食粽，有冇問題既呢？ 應該都冇既。因為，飲飲食食，大家都提出一d 理據，果d 理據合唔合理，都唔緊要，見人見智。
好似咁講呢，有人話，其實而家大家日常生活都有咁多糖份，仲使唔使一定要係中秋節食月餅呢？又有人話，粽呢家野，你去粥鋪都一件三百六十五日都有得食，又係唔係一定要係端午果日先食呢？飲食文化呢家野，就好似可以唔食呢樣可以食第二樣。但對一d 呢個世界好似好不動既價值，例如歷史事件既解讀，事情就好似冇咁多討論既空間。
我想講咩？我想講六四。係，我就係直接同你班撚樣講六四。
幾年前，有大學生就問，點解一定要悼念六四。唔去維園悼念六四，就係唔係代表佢已經唔記得左六四。而甚至有人係尖沙咀搞左一個悼念六四既細台，各大專院校都各司其職咁製作佢地自己各家院校既悼念六四活動。結果換黎d乜野既後果呢？
有專欄作家係大網媒度話，以後唔需要對大學生客氣。佢寫出黎既時候，面不紅氣不喘果下好野。回歸咁多年，有邊年o camp 既時候，係各大傳媒鬥爆「大學淫賤迎新營」玩d乜野？先唔講果d野係咪真係叫淫賤啦。然後年年都話大學生掛住玩成何體統呢樣果樣，之後佢地睇返一d香港情懷既電影，好似《玻璃之城》呀咁呢，就會不斷咁重覆影射當年仲未係香港才子既黃霑先生點樣係d 高桌晚宴度表演大概係香港紀錄最長既粗口。
咁樣既大學生，又成唔成體統呢？
以前既時候，係高桌晚宴講粗口既人，佢地第時如果有好大既成就，就可以將仍地之前所做既所有事，都可以變成美談，都會變成笑話，都會變成佢地人生既勳章。但好可惜，香港而家既發展窒礙。四十年前既成功定義，同四十年後既成功定義，已有所不同。三十年前，你跟人家說你是香港大學畢業生，你係前途無可限量架。大學一畢業，你一定會搵到份工。如果你大學畢業冇工做，一定唔係你「搵唔到工」，而係你「唔想做野」。但而家，你上d 網路討論區度走一轉，你會見到個post 話：我平時係office 都冇咩得罪人，我個人都好受同事歡迎，但今日公司宣佈話要炒人，結果都係炒到我，原因係因為， 我既學歷係公司入面最低既，係xx大學畢業。而同我同年紀既人，唔係英國，美國，就你二三線既澳洲紐西蘭。因為佢地係外國既大學畢業，佢地點都好似比香港既土炮大學高人一等。過去幾十年，不斷都講「大學生其實都唔係咩咁特別」、成日將「淫賤」、「唔尊重」、「唔尊師重道」等等既負面形容詞都塞畀大學生。好啦，既然你個社會都對大學生一直以黎都咁唔客氣，而大學教授，大學講師，甚至是傳媒人，都冇人提出將「大學生污名化」呢一個意識形態工程好似我咁直接咁講出黎。回歸後，董建華下台之時，七一大遊行之後，呢個工程就黎得特別猛，
你地一代香港人，甚至是上兩代的香港人，都已經好似美心果個老女人咁放棄左香港大學生這一代同下一代。大學生們做咩講咩聽咩，關你撚事？
到依家大學生真係對六四冇感覺既時候，佢地就係度痴晒線咁話大學生點解可以咁樣，對中國人既悲劇，可以無惻隱之心。
但係，如果你一路聽，都叫聽得清楚清晰既話，果陣時一代大學生，搞六四大特賣咩？好似台灣二二八果陣，會有二二八快樂，二二八長假期特別優惠等等的專案營銷市場推廣專案？佢地只係唔跟支聯會既大台，然後做一d 配合法佢地既世界觀，又或者係講一d 佢地相信既說話，點解香港既反對派傳媒機器，人人喊打，話而家新一代唔記得六四真係令人痛心云云？
六四，而家變成左咩呢？六四對我黎講，係一個食飯唔係幾好意思打卡既日子。因為，果一日會有好多人，覺得自己去維園點左點點燭光，完左晚會之後就返屋企，第二朝繼續返學返工，然後每一年都搵一個機會係香港叫一叫口號，之後籌錢畀各大政黨。大家自我感覺良好：過去廿幾年既生活，好似又過得幾好咁丫？咁咪一直做落去囉。你做左落去，就會變成一個「一年好似一定要出現」既儀式。
回歸過後，司徒華黃子華都冇畀人拉，即係一國兩制仲存在啦。咁一國兩制既然都存在，六四隨住時間流逝，冇經歷過既後生仔冇感覺，其實又真係唔出奇。但係總之而家，唔知六四，每每大概去到六四前後，你唔講一下六四，寫一下六四，你就好像唔係一個有良心既傳媒人。你係六四果日，你去食好西去餐廳打卡，冇去同d係行入維園條路度擺街站既政治人物揮手捐錢拍照片再打卡，你就好似一個冇良知既人。
都幾唔明，而家d 人成話要冇大台，又話流水悼念。原來，係佢地口中既殘暴政權畀佢地悼念六四果陣，佢地就會覺得自己做大台，好過癮，有細台出現就要出盡奶力咁去屌撚死佢。而家個政權唔畀你搞大台啦，原來遍地開花又得啦！
咁以前果d 話唔使對大學生客氣既人，係咪應該都道一句歉呢？不過睇網上面d 人既炮火，一講支聯會搞大台就出晒網軍攻擊，我就只係想淡淡然咁問一句：咁悼念六四，係一件咩事呢？
係一種和平抗爭？係既，我同意。
但同一件事，做左三十幾年，一d 成果都冇，你出聲話係咪應該檢討，你就會被形容為係共產黨派黎既鬼。一個唔畀人檢討既民主運動，可以點樣下落去呢？有時候，我畀人問得多，我都會反問自己：係咪真係唔可以講佢地做得唔好既野呢？抑或，佢地都真係仲係相信，呢個世界既好同唔好，永遠都係觀點與角度問題，你只要有足夠既話語權，即係你有傳媒，有網軍，就可以定義歷史，書寫歷史，定義真理，書寫真理？
呢個係咪我地想見到既理想新世界？
如果而家係極權，用一個類極權，去換另一個極權，其實我地搞緊咩呢？
呢個問題，我諗左就黎十年啦。我仲未有答案。你呢？
丫，順帶一提丫，呢個星期，好多歌星係度講black lives matter，咁我想問下，剩係去年，都有好多lives 要matters。係咪因為，有d 膚色被警暴就比較值得同情，有d 膚色既人呢，就唔值得呢？拿，我問問題架咋，唔係有心咩引戰呀，撩交嗌之類。我只係好真心咁想知道。所謂既lives matter ，係咪真係有膚色分別既jei。
旁觀他人既痛楚，好容易。同情別人既痛，都好值得做。點解？因為唔會傷及自己，又可以拎到道德光環，咁便宜既勾當，點會唔做？
到有d野，真係係你面前發生，係你屋企發生，大家係咪又真係覺得，丫，講呢d野，有成本，要付出，做一個聰明既人，不如講少句啦。
係所謂新常態之下，我地係咪都要習慣，必需要習慣，呢個，先係我地做人保命既法則？
＃廣東話
＃口語
＃短小
＃負面
＃健吾