平時就唔肯認老 有著數就話自己長者 要孭飛就走頭

羅志光話60歲先係中年，話你哋班友唔好扮老然後恃老賣老啦，出嚟做嘢啦，跟住被人淝話涼薄迫啲「老」人家出來做嘢喎。

我識啲老人家係唔鍾意認老嘅, 好多已「登六」人士話根據 聯合國定義青年係 18歲至 65歲 .既然唔鍾意認老當然都唔應該有長者優惠同長者乜乜喇。

點可以有關愛座就認老，要為香港社會孭飛時就走頭啫？

之前去 viutv 個《個個得把口》（張堅庭、曾美華）那個節目，有個資深工程師話香港工程咁差，係啲後生廢喎，啲年輕工程師未夠班喎，啲大工10個有8個都唔掂喎， 所以香港啲工程爛曬喎。

好話喇，我當係啲細嘅做喇，究竟係邊個監工呢？邊個簽紙 certify 嗰質素呢？邊個做管理呢？細嘅做錯，你啲唔知唔check唔理嘅？你哋做得 management 就要有辦法處理到啦。而家根本就調轉嚟講，個則睇嘅時候已經有問題，下面做唔到，上面 唔想搞大佢所以齊齊包疪吧。

話啲細嘅唔得，咁邊個搞到青黃不接呢？港鐵有好幾個，過晒退休年齡都唔走，話「下面無人呀」。咁點解無搵接班人，無栽培，搞到佢可以聲稱自己想走又唔走呢？

某程度上工程係變咗水泡科,但 Engine grad 供過於求, 咁應該會揀到啲好，外國grad 都有回流，同埋有好多東南亞拿scholarship 來讀。一單工程幾十億幾百億，讀又辛苦,出嚟做grad e 人工又低，叻啲都入咗 bank and big 4...唔分多啲錢養班細嘅未變成水泡科囉，你睇 鄭若驊個老公幾有錢先得㗎, 根本成行自己攞嚟 。

而家林鄭要人負責，都係炒幾個60+ 管理層啦，唔通炒個20幾30歲年輕工程師單嘢就平息到？有啲工，特別高人工，例如 CPA 核數簽紙，被發現係假數要 send 去同CEO, directors 一齊去坐監，唔通佢可以踢個 junior 的 A2去孭咩。個啲 authorized person，批則個啲，棟樓冧咗，都要搵佢算帳啦。金融業個啲幾號牌如是，醫生更加要為病人生命負責（有個別case話下面nurse做錯真係唔關醫生事，咁呢個係個系統問題要改善，但總的來說個 accountability system 而家係咁。）外國醫生人工無咁高，好多嘢delegate 咗俾其他 health professionals 做，其他 health professionals 就要為病人生命孭多啲飛，咁人工都係 related to 個責任囉。

套制度港英時代無事嘅，而家就係你班5,60後當家作主時崩壞倒退。唔能夠 assume 人一定性本善，or 性本惡，套制度唔跟個 cost 細過跟，啲人未慢慢唔跟囉，甚至如果唔跟，會有更大 benefit。好似大陸做嘢咁，唔同流合污，點埋堆啫；做黑社會唔劈友，點信你啫；ICAC出現前，做警察唔貪，點升你啫。做細嘅真係睇上面點做，睇個制度行。 好似公務員互相租屋呃房屋津貼咁 ， 以前個個咁做，因為前人做過冇事吖嘛 。如果制度嚴謹，做得唔好就被人兜咗啦， 廢柴嘅𡃁、唔跟規矩嘅𡃁 點樣留到喺度啫。

資深工程師後來先話政府唔啱囉，protocol唔好囉，制度錯囉。係喇，點解前唔壞，後唔壞，就在你們手上壞？個制度爛，好可能係 structural problem，作為 individual 係不可抗力，但你將成個責任隊落年輕工程師身上，係對下一代不義。

講番要老人家做多幾年嘢，其實我身邊好多50尾60頭的人因為種種原因被迫退休好唔高興，佢哋都想做多幾年嘢，儲錢又好，唔想咁快進入 inactivity 又好，想人生有多啲細藝都好。尤其高學歷高技術個批。個問題從來都係職場如果全free，年紀大的人會更被 valued 佢嘅能力、經驗定被人年齡歧視啫，咁明顯低技術勞動者就無咁著數喇。

另外，年齡歧視從來都係 interact with 性別，女人好早就因為年齡問題受困擾，男人唔到五十歲甚至更老，根本感受唔到女性承受緊社會咩嘢壓力。

好喇，而家終於有個政策，令59歲的男人終於理解因為歲數被人唾棄是甚麼感受。當59歲的男人仍然覬覦緊20歲的肉體，佢哋終於被人嫌棄番。

佢哋都好應該加入中女、熟女大聯盟，一齊聲討因為歲數搞出來的大頭佛。