【 工商管理學101】一間企業是屬於老闆？還是屬於員工？
某廣告界KOL係facebook發文，為美心集團護航（註一）。佢既理由係「美心不是屬於伍淑清一個的，而是屬於『一群熱愛香港的美心集團員工』」。所以，裝修師兄針對美心集團旗下一眾鋪頭前，應該為呢班黃絲員工著想，唔好搞到佢地、唔好打爛佢地飯碗咁話。
判斷誰是誰非之前，讓我地先重溫一下人物背景：
伍淑清， 美心集團創辦人伍沾德長女也，芳齡七十有一，未婚，無子嗣。身為一個富二代，繼承少量美心股權，每年收既股息已經超過四百五十萬港元（註二）。勉強算係衣食無憂。
伍大小姐做過政協，早前聯同澳門賭王之女何超瓊，走去聯合國人權理事會議發言，唱衰逆權運動。亦曾以金主身份，叫自己捐獻過既學校打壓罷課學生同教職員（註三）。因而被市民針對。美心被「裝修」之後，仍然上中央電視台接受專訪，話香港需要愛國教育。
簡單講，此人係一個典型奶共離地權貴，藍到發紅既老細。
接下來，我地要問，如果一間公司既老細/高層立場係「藍」/「紅」，又明顯助紂為虐；但係班伙記，有唔少「黃絲」同路人。呢間公司，應該如何處置？我唔直接答你，用例子答：
- 「黨鐵」高層屈服中國官媒壓力，全面協助差佬打壓示威活動；但係好多車長同前線職員都係黃絲，佢地仲搞過實名聯署（註五），支持抗爭。
- 國泰高層屈服中國民航局，大搞白色恐怖，鼓勵員工互相篤灰，只要曾經係社交平台發表過支持示威者言論，就要炒。但好多空姐/空少/飛機師都有出黎抗爭，仲有機師因為咁而被差佬告暴動罪添（註六）。
係香港，好多同路人都係跟黨鐵、國泰、富臨、優品360以及其他中國國企搵食。我地懲罰、杯葛呢D公司，無可避免會搞到「自己友」。因此，以呢位廣告界KOL既邏輯，無一間商店可以被抵制。大家應該忘記呢班奶共老細/高層做過咩衰野；只記住「溫暖微笑嘅空姐」、「友善嘅中年波板糖阿姐」就好。
Well，任何機構只要有一定規模，就係社會縮影。除非請人果陣已經有政治審查，否則同事們黎自十八區，邊可能都持同樣立場同政見？（可能警隊除外）根正苗紅如國企中資銀行同TVB，都總有一堆黃絲係果度打工。係咪因為咁，就間間公司都唔應該受到制裁？I don’t think so囉。就算無讀過BBA，係人都知一間公司入面，老闆係最有話事權架啦（其次係高層）。香港又無工會，佢地可以輕易辭退講野唔岩聽既人。公司既方針佢地定既；公司賺既錢，落佢地袋既。佢地為達到政治目的，有權力利用公司資源，係社會發揮影響力。老闆唔代表緊一間公司，唔通班細既代表公司咩。
以美心為例，董事局/管理層如果唔認同「小股東」伍淑清既言論，大可以學似會德豐果位富二代主席咁，話佢阿爸譴責示威者「僅屬於個人意見」（註七），唔代表公司立場。而家佢地無出黎割蓆，由得自己公司受牽連，即係默許/認同伍淑清代表公司啦。
其實，早係社會運動之初，美心西餅就有政治審查：拒絕為顧客係生日蛋糕上面寫「光復香港，時代革命」做祝福字句。由此可見，美心集團根本就係同伍淑清一丘之貉，並非無辜或是被大眾誤會。美心員工如果因為店鋪被「裝修」而要加班執手尾、店鋪提早關門而被扣薪扣假、甚至因為公司賺少左而唔派年尾花紅……就怪班管理層好了。係佢地為左迎合中國市場，而犧牲你地（同我地，因為佢出賣香港）。
今時唔同往日，以前商家佬為左討好中國，出賣自己良心，否定民主自由呢D普世價值；而家終需付出代價（當然，我絕不鼓勵任何違法行為）。莫講話實實在在影響緊香港既企業，就算離地如美國籃球巨星LeBron James亦唔例外（註八）。
By the way，咁耐以黎，負責裝修既師兄都只係針對藍色企業既「死物」，從來無為難過任何前線員工。美心賣餅姐姐都未出黎譴責同割蓆，廣告界KOL做乜無啦啦打晒溫情牌咁為佢地強出頭？徐生，唔好當香港人傻先得架，你做邊行、今次接邊位大客既order、點解寫一篇咁既洗白帖文做spinning，大家心中有數！
註：
- 〈美心是什麼？〉，徐緣，2019–10–18
- 〈美心太子女伍淑清被指不止持有100股 年收息逾450萬〉，HK01，2019–10–17
- 〈中華基金中學傳打壓學生罷課 過百校友街坊聲援 署理校長否認打壓〉，明報，2019–9–4
- 〈指香港中學生純如白紙 伍淑清：中華基金中學不歡迎罷課〉，巴士的報，2019–10–9
- 〈港鐵列車車長聯署信〉，獨立媒體，2019–8–14
- 〈國泰解僱兩機師 一人涉暴動罪〉，明報，2019–8–14
- 〈會德豐：吳光正聲明屬個人意見 下半年樓市經濟料上上落落〉，HKET、2019–8–12
- 〈LeBron或許碰到生涯最致命危機？〉，運動視界，2019–10–16
(2019–10–22)
傳送門：西米Go短評 #001–100，#101–200，#201–300
傳送門：食晒兩家茶禮的營銷手法
傳送門：做個精明消費者，請睇「選擇」月刊