屯馬（綫）通車真的很＿＿？

你真係叫佢「屯馬綫」㗎？

沙中綫第一期——西鐵駁九龍南線駁尖沙嘴支線駁東九龍綫駁馬鞍山鐵路嘅「東西走廊」——黨鐵屯馬綫喺27/6/2021正式通車。

身為一個冇車牌嘅專業乘客，我嘅反應係：淨閱，哦。

對於有唔知讀中學未嘅鐵路迷對住記者講佢由出世等到而家，仲有個喺度唱香港人的噩夢（i.e.《綠袖子》），其實佢哋問咗住九龍城、馬頭圍、土瓜灣嗰邊嘅呀婆呀伯未？佢哋喺嗰邊大嘅話，佢哋係等咗呢段鐵路等咗五十幾年，大半世人，佢哋喺通車嗰日係咪可以開心到往生？

首先，唔好唔記得點解大家決定罷鐵，所以有新站我唔覺得需要大肆慶祝（我不如等倫敦Northern line extension好過）。其次，我真係冇乜需要去新站嘅範圍，除咗去搵靚慧拍片，不過我都係會巴士出入。然後，關於工程嘅concern，我認為，你驚就唔好搭喇。

其實當年個地盤話有問題嘅時候呢，咁啱我有讀工程嗰陣嘅同學做緊呢幾個地盤，佢哋紛紛喺個同學WhatsApp group喊冤，表示都冇問題，D數佢哋check過哂等等。咁我會交條命俾我呢班舊同學。

總括以上幾點，其實我都係唔會點搭嘅。

不過咁，呢次咁樣將兩條通咗車差唔多廿年嘅鐵路好似龍珠咁合體，喺香港都好似係第一次見。對於我呢個住喺火車頭站區嘅人嚟講，我呢D山區兒童改唔到口喎。

兩條綫合咗體，不過我都仲係覺得，係西鐵同馬鐵囉。

而家全條綫27個站，而呢兩日我嘗試自己講下，發現到自己有以下嘅嘢：

1. 紅磡以西全部叫西鐵
2. 何文田以東全部叫馬鐵
3. 紅磡同何文田呢兩個站有時會叫西鐵，有時會叫馬鐵

其實我試嘅方法就只係，喺呢條綫入面，由A站出發去B站係[西鐵/馬鐵]咁樣諗出嚟嘅啫。

當然喇，屯門至紅磡範圍我都會講搭西鐵，大圍至烏溪沙範圍我都會講搭馬鐵嘅，其他嘅範圍我就可能有其他配搭喇。例如我會講：

• 喺烏溪沙搭馬鐵去南昌
• 喺南昌搭西鐵返烏溪沙
• 喺美孚搭西鐵去土瓜灣
• 喺土瓜灣搭馬鐵返美孚
• 喺柯士甸搭西鐵去宋皇臺
• 喺宋皇臺搭馬鐵返柯士甸

諸如此類。

我覺得可以設計一個實驗，就係攞呢27個站出嚟，要人揀A去B嗰條係西鐵定馬鐵。應該都係得27P2=27*26=702個選擇啫，應該做得到嘅。

至於何文田同紅磡嗰段，我唔知點解，我係叫嗰段做西鐵。即係我會講「喺何文田搭西鐵落紅磡」同「喺紅磡搭西鐵上何文田」。可能都留意到我喺後面個動詞唔同咗，但係好多時，喺我印象中兩個地方係南北方向嘅話，我在會用北上同南下。應該就真係喺我印象中，何文田站就係喺正紅磡站嘅北面，仲要唔係遠㖭，咁咪當係少少西鐵嘅再延長囉。

不過去到來回紅磡同土瓜灣，我就已經係講返搭馬鐵。

不過呢D講法都係因人而異嘅。例如我同我家姐講起呢件事，我講「喺啟德搭馬鐵去荃灣西」，點知佢話：「荃灣西係西鐵站，所以我都係會講搭西鐵。」

係呀，咁咪試下點講囉，有唔係要你真係搭。話唔定試下試下就會得出一個大家都接受嘅結論㗎喇。

然後我諗緊嘅係，到東鐵過海之後，我係咪真係會講「去金鐘搭火車」。