「尚有些仗，全力亦打不上」

各位搵工嗰陣，有冇認真刨過啲 JD (唔係京東商城，係 job descriptions)？除咗請人嗰間公司個名、部門、銜頭同埋頭嗰一兩項主要職責，我諗冇咩人認真掃到落底睇埋崗位對應徵者有咩要求。

喺 “Requirements” 一欄，通常都有十項八項，針對學歷、相關工作經驗嘅年資通常佔據頭幾行，然後都係一啲個人特質，例如話領導才能呀、數理分析能力呀，之類。擺底嘅，有時係呢句： “Can-Do Spirit” 。

乜叉嘢係 “Can-Do Spirit” ？中文文雅嘅講法，係「明知不可為而為之」。近年通俗嘅講法，係張家輝喺《失戀急讓》入面飾演地產代理嘅口頭禪：「盡做」。如果咁樣都唔明，我會嘗試作出以下定義：

“Can-Do Spirit” ，中譯「『得嘅』精神」，係指一顆專心致志嘅心，為咗達到目的，抱住使命必達嘅精神，無懼荊棘滿途而排除萬難、奮鬥到最後嘅精神。

如果純粹以字面分析，呢種「『得嘅』精神」好浪漫，如果你男朋友/女朋友對於同你嘅關係抱住同一份精神，我諗你唔會捨得令佢失望。如果你已為人父母而子女已經磨練出呢份不屈嘅意志，我估你平時對佢哋嘅要求都幾苛刻。

放諸工作，「『得嘅』精神」有個負面啲嘅講法，可能你都聽過：「我唔理咁多，總之你同我死掂佢！」係架，去除咗浪漫同埋堅毅呢兩個特質，呢份精神背後就係無賴、話之同不可理喻。咁我明嘅，長官意志嘅嘢，威嚴嘅嘢，當然係神聖不可動搖，因而出現「冇嘢係做唔到」嘅催眠術。你試下同老細講，「神能夠創造一舊神搬唔郁嘅石頭嗎」，我保證你聽日就唔使返工喇。

如果你係 Working-Level ，「老虎都要得嘅得嘅得嘅⋯⋯一定得！⋯⋯嘥氣！」時間係最好嘅解藥，因為時間唔等人， deadline 總會過，你手就得一對，做到做唔到都好，老細都改變唔到結果。當然，事後有咩後果同懲罰就係另一個問題。但係，既然企喺度畀你鬧，坐喺度又係畀你鬧，咁梗係坐喺度舒服啲啦，迫得自己咁緊把鬼咩。

但如果你係 Manager ，要捽下低班友仔去做好件事，咁你首先要知道「能力越大、責任越大」。你作為主管，係有判斷同評估嘅能力，知道乜嘢叫可行，乜嘢叫天馬行空。當其他人話知你死而提出離地三萬尺嘅訴求，你應該有腰骨、有膊頭、有勇氣去說「不」。或至少，提出替代方案，唔好人哋叫你跳落山崖你又跟住做。你自己跳猶自可，推啲𡃁跳落去先至仆街。人哋都有阿媽生架嘛。

我覺得，識得拒絕，係一個人由一對手蛻變為一個腦嘅必經階段。當然，大把腦筍未生埋嘅人，未識做好本份就已經學識耍手擰頭，包括我個仔，佢今年兩歲。

但重點係，如果冇呢種 “Can’t-Do Spirit” (「『唔撚得』精神」，唔好問我中間個助語詞點樣走出嚟) ，你真係唔好向上爬而累人累物。大家都係打份工逗份糧架咋，得就得，唔得就唔得。因為呢個世界，總有啲嘢係超出大家能力範圍，夾硬嚟而傷到入肉，真係唔值得。