射箭訓練器材

市面上有唔同嘅輔助器材幫我哋練習動作技術，冇時間冇地方天氣唔好時又想練習，好多時就會想搵呢啲器材幫手，其實呢類工具都係不外乎畀你模仿一下拉弓嘅動作，最多畀你練埋撒放。究竟呢類器材係咪真正你想要嘅嘢，係咪真係幫到手？買之前可能要諗清楚，因為部分產品都真係幾貴。咁啱近排見有人講呢類器材，就分享一下自己使用嘅感覺。

我會將輔助訓練器材分成三大類，第一類係一大舊嘢裝上自己把弓度，畀你模擬放箭；第二類係綁住手肘同弓弦畀你拉弓或者拉弓+撒放；第三類就係拉力橡筋。

第一類其實並唔係一啲新嘅嘢，喺我初學射箭廿幾三十年前嘅時候已經存在，我玩過嗰隻好似係叫airbow，而家上網都搵唔番，歡迎留言話畀我聽叫咩名，又或者有相可能send番畀我睇吓就仲正。呢類型輔助器材唔同年代斷斷續續有唔同廠商出產，並無一間廠或者一件product特別出名特別受歡迎，更加無一個統一易記嘅名稱（下面我姑且叫佢Shoot Trainer），所以未必為意佢有咁耐歷史，會誤以為佢係新嘢。佢嘅外形係一大條喉管，入面有支「箭」，靠空氣阻力令到支「箭」於撒放時緩慢地衝出去，咁就唔算放空弦唔洗對弓片食番晒能量而爆limb。

Shoot Trainer流行唔起係有原因， 因為 舊款使用上有唔少問題。本身安裝Shoot Trainer已經幾麻煩，裝上把弓度又要扭螺絲拆箭托之類，絕對唔算得上話放便，而佢支「箭」個箭尾大細同你條弦配唔配合扣唔扣得上條弦又一個問題。自然搞完裝好之後你就唔會想用完即刻拆咗佢，非常減低使用嘅意欲，所以好少人會將佢裝落自己把主弓度用，而係搵另一把士啤弓裝個Shoot Trainer，除非你有排都唔諗住射箭。

另外一個問題更加致命，部份Shoot Trainer嘅條喉管好肥好粗，弓身嘅弓窗永遠都唔夠佢闊，即係話裝好之好係夾硬扭曲住條弓片，長期扭住條弓片會唔會有傷害，應該無人做過研究去證實，但我估都唔會有人想試。

我未試用過比較新款嘅Shoot Trainer，但見到廠商其實有好努力嘗試解決呢啲問題改進件產品，例如將喉管放到去弓身出面而唔係喺弓窗內，同時可以調較center shot唔會長期扭曲弓片，又例如「箭」唔係用普通箭尾扣落弓弦度要係上螺絲夾穩，甚至乎可以模擬有用響片射箭，亦有得調節空氣阻力大細，配合唔同拉力需要。

雖然搞到好fancy，但Shoot Trainer始終有佢嘅限制，手感同真係射箭有頗大分別。個喉管不論於弓窗內定係放喺弓身出面都有一定重量，改變咗把弓嘅重心同反應，令拉感有分別，而撒放時有阻力亦都會令感覺變得奇怪。我係唔like呢一類輔助器材嘅，如果我想要要練動作同時保持肌力，咁就開把弓拉弓或者做SPT，如果想要練習撒放，就直接拎條拉力橡筋做撒放。即係話我想要練習嘅項目，其實唔一定需要用Shoot Trainer先做到，而且唔用Shoot Trainer反而更加方便簡單。

最後要提一提我見到網上有人將Shoot Trainer裝落複合弓度使用，確實有部分產品係有分反曲弓複合弓型號，但亦都有一啲產品係冇寫俾唔俾復合共用，如果真係諗住用落複合弓度，我建議必需要先research清楚。第一當然係睇佢有無話適合複合弓使用，第二係check清楚拉力上限，相同拉力嘅反曲弓同複合弓儲存嘅能量並唔一樣 。另外我覺得仲要諗吓其他潛在風險，因為並非所有Shoot Trainer都可以set到center shot，而放箭時阻住條弦飛出去同時又會增加左右擺動，增加出軌甩弦嘅危險性 。

第二類嘅輔助器材我姑且統稱佢叫拉弓帶，結構就係尼龍帶/繩索加橡筋帶，一邊穿某戴到拉弓手肘上，另一邊係綁喺弓弦上面，用嚟拉弓或者拉弓+撒放。好多品牌都有做呢類輔助器材，比較出名應該係Formaster同埋Astra Shot Trainer， 與其話係一個輔助嘅訓練器材，我會話佢係一個幫助學習正確動作技術嘅工具，用於教學直線用力同執行撒放，唔好縮唔好鬆。同樣地拉弓帶都唔係咩新嘢，其中Formaster跟埋本書仔係1993年版，另外有人話1996年嘅The Art of Winning一書中亦已有提及Formaster，咁合理估計Formaster於90年中甚至更早已經存在而且可能有好多人用。

拉弓帶一邊箍住手肘，另一邊扣在弓弦上，拉嘅時候容易感受將力量轉移到背部。而當用作撒放時，如果手指鬆弦後未有保持執行撒放的背肌群力量，手肘就會被弓弦拉番轉頭，所以能清晰感受正確的「繼續用力」。呢點令我覺得呢類型嘅輔助器材好實用，平時點教學生講話放箭唔好鬆，要繼續用力之類，都無真正畀佢自己感受有直接回饋咁實在。

Formaster本書仔咁講

teaches the upper-back side muscles the correct muscle force for the correct push-pull balance;

teachers how to relax the string fingers while keeping back muscles working throughout the shot

Astra Shot Trainer介紹就話

…learn what a strong shot feels like. Train your mind, body, and spirit to execute that strong shot…

要留意嘅係好多款式嘅拉弓帶都話要搭箭嚟使用 （Rigid Formaster除外，可以選擇上唔上箭使用），而撒放時之箭係會飛出去，雖然唔遠可能只係飛出去三兩米外，即係話其實呢啲拉弓帶要去射箭場使用，如果你冇時間冇場地，拉弓帶係幫唔到你。

如果有睇過我之前器材說明書一文就會記得，射箭器材咁危險，廠商通常都好識戴頭盔，例如Formaster說明書話：

…sooner or later the rubber cord or rope cord will wear out…

咁其實佢又無講錯。而為咗方便使用，有啲款式嘅拉弓帶會使用金屬扣連接尼龍帶/繩索及橡筋帶，既然說明書都講到條尼龍帶/繩索或者橡筋帶遲中會磨損，即係總有機會斷，我會避免揀拉開弓之後有金屬parts位於手肘同臉之間嘅拉弓帶款式。萬一條拉弓帶有咩意外鬆脫或者斷開時，起碼打臉嘅唔會係金屬。咁都唔係所有安全指引係單純為戴頭盔，亦有啲實際有用嘅指示，例如例如Formaster寫明唔可以用有金屬板嘅護指，因為會對尼龍帶/繩索或者橡筋帶做成損耗。

自己擁有Formaster，但未用過Astra Shot Trainer，就講多少少Formaster，佢個size chart 寫咗綁手肘帶嘅尺寸，計算手踭嘅圓周，就咁睇數字都唔知係幾大。我自己用中碼（藍色）就勉勉強強，手肘位條橡筋箍得我唔係好舒服，佢寫係畀10至11吋，但我度關節對上先剛剛好10寸。另外我仲有條細碼（紅色）用黎教學用，我自己就完全戴唔落。

除咗揀綁手肘帶尺寸大細，仲有得選擇橡筋拉力，我覺得呢個比較次要，因為用黎學習動作唔係要拉重去練力，同時每個人用緊嘅弓拉力都唔同，咁按佢建議用男女年齡黎分別應該使用幾重嘅橡筋，我睇唔到有乜意義。

Formaster有話可以畀複合弓用，或者當年嘅複合弓啲cam設計無咁惡係會安全啲，但今日仲敢唔敢咁做呢個又係自己諗清楚，撒放完左搖右擺，條弦唔上唔落把弓半拉開狀態，會唔會有危險甩弦，我就一定唔會博。

拉弓帶呢啲尼龍帶/繩索加橡筋帶普遍都賣得幾貴，我覺得Formaster跟埋本書仔係一個bonus，書裏面除咗講解番Formaster點用，仲有一啲運動解剖學同埋動作技術嘅資料，都幾值得去睇。而最開頭都提過，我會認為拉弓帶係幫助學習正確動作技術嘅輔助器材，所以都幾藉得去使用，特別係自學嘅射手。

第三類嘅輔助器材就最簡單，係平時見慣嘅拉力橡筋。要練習射箭動作技術最先並唔係需要重，而係要做準個動作再重複一致，咁所以一條好基本嘅拉力橡筋已經有呢個效果。

拉力橡筋都有嘢值得留意嘅地方，最常見應該係扁扁一塊嘅形狀，其次仲有tube圓條形狀嘅拉力橡筋。練習拉弓動作技術我會偏好使用圓條狀嘅拉力橡筋，因為拉弓扣弦手指容易勾住條橡筋，推點亦都會感覺受力位置比較集中，不過圓條形狀嘅橡筋可能比較冇咁常見冇咁容易買得到。

另外需要留意嘅係究竟橡筋喺推弓手上面應該點樣揸，有啲人會係兩條橡筋放曬喺虎口上面位，我就比較鍾意一條喺上面一條喺下面圈住手掌。呢個好關乎你把弓嘅set up、重量同埋你使用嘅技術，究竟你射箭時感覺係拉力拉起手腕，定係拉力穿過手掌上下感覺平衡， 建議兩樣都嘗試吓，咁就可以搵到一個比較近似自己射箭時感覺嘅做法

拉橡筋帶亦都有唔同變化，例如加個握把去推弓手一面，可以知道推得正唔正確，同時亦可以測試握把是否合適自己。又例如除咗用手指勾住條橡筋黎拉，亦可以放長條橡筋箍住個手踭拉，咁就變咗好似拉弓帶咁，有助將注意力放到手肘、背脊及拉直線上。如果想做呢個練習，用塊狀橡筋帶會比圓條形狀嘅好，因為圓條形狀嘅會好容易碌走咗。

其實如果目標單純係想練習動作技術嘅話，平平地買條橡筋帶已經好足夠，要想練力就可以開番把弓拉，所以並無話邊一樣輔助器材係好必需，必要嘅只有係射手自己唔怕悶嘅恆心耐性。

最後講多一個練習動作技術時我會用嘅方法，有時我會將一支箭或者平衡桿放喺虎口上面，另一端用食指中指夾住，再模仿拉弓動作沿住支箭/平衡桿滑動。如果你係好強迫症需要完全沿直線拉弓，呢個方法就會幫你好清晰知道拉弓過程入面直線有無變化，或者動作有無偏離直線。即使你採用嘅技術並唔需要完全直線拉弓，呢個方法都會幫你更清晰理解自己嘅動作、拉弓嘅軌跡，同埋分辨出每一次拉弓動作是否一致。

開咗個BuyMeaCoffee 帳戶，如果like我今次嘅分享，或者覺得之前嘅文章資料有用，請支持吓幫補吓我諗緊寫咩時沖杯港式奶茶飲 。