【實用文】IB換完英鎊/加紙/美金，如何免費拎到手？
2023年5月實測
大家去英國、加拿大生活，少不免要兌換大量英鎊、加紙。我諗有做功課既朋友，都知道Interactive Brokers（盈透證券）匯價最好、買賣差價最窄。就算佢收你定額佣金2美金一次，都係比TransferWise或任何銀行更抵。唱外幣，一律建議用IBKR。係香港你都搵就唔第二度個價好過佢。
好喇，外幣換好，點樣由IB出錢去銀行都係學問。唔小心畀銀行收左電匯費，真係喊都無謂。今次介紹返，如何免費將外幣拎到手！
英鎊
所需戶口（全部自己名）：香港HSBC、英國HSBC、香港IBKR
- 由「香港HSBC」入港幣去「香港IBKR」，經FPS免費；
- 在「香港IBKR」兌換英鎊，2美金一次；
- 由「香港IBKR」出英鎊去「香港HSBC」；
- 每個IBKR戶口，每個曆月有一次免費提款機會；
- 落提款order時，選擇電匯，中轉行swift code填 MIDLGB22XXX，中轉行名稱為HSBC Bank plc.，咁就無中轉行收費；
4. 由「香港HSBC」出英鎊去「英國HSBC」，經Global transfer免費
留意返，千祈唔好由「香港IBKR」直接出英鎊去你自己「英國HSBC」戶口！因為香港IB有三個英鎊公司戶口（Citibank UK、渣打UK、JP Morgan UK），你事先係唔知佢用邊個戶口出錢畀你，如果佢用Citibank UK出錢去你英國HSBC個人戶口，英國HSBC會當佢海外匯款，收你5鎊手續費！
加紙
所需戶口（全部自己名）：香港HSBC、加拿大HSBC、香港IBKR、香港Citibank Plus
- 由「香港HSBC」入港幣去「香港IBKR」，經FPS免費；
- 在「香港IBKR」兌換加紙，2美金一次；
- 由「香港IBKR」出加紙去「香港Citi」，免中轉費；
- 每個IBKR戶口，每個曆月有一次免費提款機會；
- 落提款order時，記得填岩你Citi既外幣戶口號碼（例如「通知存款」果個），唔好填錯只得港紙既「利息Booster」，填錯左Citi會自動幫你轉返做港紙；
4. 由「香港Citi」出加紙去「香港HSBC」，經電匯；
- Citi Plus戶口免電匯費
- 落order時，記得揀「費用由我方（i.e. Citi）付」，唔好揀 「費用由對方（i.e. HSBC）付」，因為Plus戶口只免前者費用不免後者費用
5. 由「香港HSBC」出加紙去「加拿大HSBC」，經Global transfer免費
美金
首先，由「香港IBKR」出美金去「香港Citi」，中轉費盛惠13美金。以前免費的，近呢年先有。要完全免費拎美金，一係開個美國既銀行戶口（例如「美國HSBC」，要卓越理財級數先開到），一係用較為轉折既方法：
一、兌換美金
方法A
1. 由「任何英國銀行戶口」入英鎊去「英國版Charles Schwab」在英國Citibank既戶口，經 faster payments（i.e.英國版FPS）免費；
2. Charles Schwab會幫你自動兌成美金，匯價雖然無IBKR咁好，仍然比其他銀行更抵。
方法B
1. 由「香港Citibank」入港紙去「國際版Charles Schwab」在香港Citibank既戶口，經FPS免費；
2. 同樣Charles Schwab會幫你自動兌成美金。
二、提取美金
方法A
- 由「國際版CS」出美金去「英國IBKR」
- 然後由「英國IBKR」出美金去世界任何戶口
方法B
- 由「國際版CS」出美金「英國銀行」既美金戶口
方法C：兌換美金及提取美金
- 由「任何英國戶口」入英鎊去「英國IBKR」，經 faster payments免費；
- 在「英國IBKR」兌換美金；
- 由「英國IBKR」出美金去「世界任何戶口」，每個月免費提款一次；
* 英國IBKR沒有最低結餘要求 * Charles Schwab要25,000美金開戶，存入幾個月後可提走，但戶口最少擺1,000美金
呢篇文章，三分鐘唔使就睇完。我都唔明點解有D Youtuber可以拍條十幾分鐘既片，仲要只講英鎊一瓣。睇佢地既片，真係浪費生命。
(2023.05.08)
