《大黃蜂》- 拍給蠢人看的蠢戲
認真，我好耐無試過係戲院出返黎之後係咁唔鐘意一套戲嘅。
但恭喜你呀！《大黃蜂》，你做到左！
因為我驚一陣間鬧得太長你無時間睇落去，所以我係呢度好簡短咁鬧一次先：
呢套戲呢，入面嘅所有角色，都係白痴黎；只有當觀眾白痴，先會咁樣寫劇本，先會咁樣處理D細節，先會咁樣描寫D奸角；而成件事最白痴嘅係，我居然比左一舊水真金百銀入去睇，所以話最白痴果個應該係我。
你睇我短短咁鬧左一段，就寫左四次「白痴」，你就可以想像到套戲其實係有幾咁白痴。
求其講少少你就知有幾咁白痴（有劇透，如果你想自己入場親身睇下佢有幾白痴，就唔好睇落去啦！）：
1. 主角大黃蜂智力同一隻狗差唔多
嗱！呢套戲其實應該叫《領養小狗大黃蜂》，即係阿大黃蜂你堂堂一個軍人，一個戰士，你失憶啫？點解會變左隻狗仔？
我唔係吹水嫁，大佬呀，人地叫你匿埋，有腦嘅都知道你咁撚大件唔可能匿埋係度牆後面啦係咪呀！未夠一歲嘅BB都唔會咁啦，無左記憶、智力得返小朋友、同白痴，係三回事黎嫁！
你睇下當年王晶嘅作品《賭神》，高進都係失憶，都係智力下降，但佢都係扭下計想食朱古力咁啫，唔會變左低能，唔會有動作做唔到，唔會咁On9 丫大佬。
然後你跌左個記憶模組，你搵返記憶嘅方法，居然係到左結局無啦啦搵返？
乜撚野呀！你至少都加段戲話佢唔知係邊度執返粒野丫，無啦啦扮小狗同少女一齊生活咁耐又唔恢復，打打下交無啦啦記憶就會恢復？即係你跌左錢，你唔去搵，但唔知點解D錢會無啦啦係你打緊交嘅時候出現返？有無咁撚著數呀！
2. 戲入面嘅軍人全部都係無判斷力嘅屁孩
另外就係果堆軍人，成班好似玩Online Game 嘅細路咁，應該打嘅時候唔打，唔應該打嘅時候鳩衝，如果真係派呢班友去伊拉克（果時九十年代），應該廿四小時之內會全軍覆沒。
我呢，就覺得其實真係唔會人人都咁聰明，但作為佢地嘅長官，阿John Cena，你明明第一次人地都唔係打你，只係兩隻打緊交，唔覺意波及到你你都成隊收皮，第二次你憑咩咁撚有信心話佢有咩異動就打巢佢呢？
佢右邊果個「科學家」，識唔識咩叫風險評估？定係睇得無線劇多所以患上左「測謊能力缺乏症」？大佬呀，阿婆跑得快，一定有古怪啦係咪呀，人地講咩你就信，乜野證據都唔要，乜野交換條件都唔提，就比兩個外星人用你個國防系統？點解你小學會比你畢業嫁？
仲有 John Cena 個上司仲白痴，人地係你面前用你個國防系統搵人，你點解會覺得佢搵到個人之後你就會夠佢打？你點解覺得佢可以用黎搵人，唔可以拎晒你所有資料包括佈防、核彈發射Code之類？無論對面幾友善都好，你第一日識佢你都唔會比你個 E-banking Account 黎搵野啦下嘛？
3. 女主角同佢個小情人係《低一點的天空》果邊過黎的
無人睇過《低一點的天空》？
唉，我都知港產片無人睇嫁啦，係阿嬌、黎耀祥同鄭則士主演，探討弱勢社群問題嘅一套電影黎嘅。
唔緊要，我主要係想話佢兩個弱智啫。
即係你地比人講兩句，條氣唔順，要去人地屋企掉廁紙雞蛋，雖然係小學雞D，但人係有權小學雞嘅（即使佢兩個設定已經18歲）；但其實掉雞蛋呢，係唔使叫個機械人掉嫁，你自己都可以掉雞蛋嫁。
如果你自己掉，咁個機械人就唔使踩爛人地架車啦，你又唔使咁驚啦，反正你仇人都聾嘅（大佬，成部車壓扁，再黎一個側翻，都可以等到你地走晒先知喎！），佢一定唔會發現你嫁喎。
另外，你地自己明知機械人唔可以比人見到，就唔撚好成日坐住佢周圍去啦，你當人地個情報廢嘅咩（結果又真係廢嘅），你問我，佢地應該第一次出完街，未返到屋企前，就已經成隊美軍係屋企等佢啦！（不過堆美軍都係白痴，所以又相對地合理返嘅）
4. 連外星人敵人都係無腦嘅
係，無錯，因為忠嘅全部都係白痴，萬一奸嘅有少少腦，咁呢套戲就要改名做《我是傳奇》，因為全球應該只會死剩 Will Smith 同埋佢隻狗。
做奸人，你想搵人咪搵人囉，做乜野要變做兩架車？你又唔係想潛伏嫁喎？係要殺下人，然後大大條軚痕比人跟蹤，為咩呢？你地自己落黎，靜靜雞等黃蜂小狗狗再收收音機你咪過去殺死佢囉，點解要咁大搖大擺呢？
好啦，當你因為有型，一定要變D野；咁點解後尾你明明都踩住呀黃蜂哥個頭，你都唔一槍打爆佢？你放佢係度除左佢會好返再返黎搞你之外，無第二個結果嫁喎？點解你要走？
又好啦，當佢有主角威能，你唔殺得佢。咁你傳消息去大本營，搵人黎剷平地球，要用個發射塔（呢個都好離譜，不過我原諒佢。）；你舊外星電池點解要放係主角少女爬到上去嘅地方？個塔咁大，你地科技咁好，有咁撚多個位可以擺唔擺，就係擺係少女伸手可及嘅位？即係點？捉象棋讓佢車馬炮全餐剩係篤卒？
大佬呀，唔好咁低能好唔好呀！
5. 最痴線嘅係，連班編劇都係無腦嘅
無錯，我認真嘅，班友傻嫁，點會諗到用「唱歌」黎代替大黃蜂講野嫁？你咁樣完全係玩自己，佢仲要唔係玩一兩首，大黃蜂後半套戲幾乎全部對白都係用當年嘅流行曲黎做嘅！
咁樣完全係玩死你自己，阿黃蜂哥本身已經夠白痴；唔夠，仲要個白痴唔可以講對白，只可以唱歌；都仲唔夠，佢只可以唱90年代已經發行過嘅歌。
你自己寫又寫得辛苦，觀眾又睇得辛苦，最最最慘嘅係，後面有一句對白編劇們終於投降，求其Cut幾條友講野黎講左佢。（所以我上面係話「後半套戲『幾乎』全部對白都係用當年嘅流行曲黎做」）
大佬呀，你放過我啦，我睇到果個位真係想企起身大嗌「如果你到最後會投降，開頭就唔好做啦不如！」
我真係好難受。
我覺得受到冒犯
認真，呢個係我睇完呢套戲之後嘅感覺，你成套戲都咁白痴，令我覺得我好似專登比一舊水入戲院比人鬧我係白痴一樣咁撚白痴。
而更得人驚嘅係，好多影評話好好睇，拍到《變形金鋼》嘅精髓。
OK，如果《變形金鋼》嘅精髓就係「所有人都好白痴」嘅話，我會尊重佢呢個傳統，留返比D白痴入場睇的！
識我嘅人都知，我好少咁樣鬧一套戲，咁嘅Budget比套咁嘅白痴我睇我真心嬲！以前「咪高悲」亂咁爆炸都仲好D，爆黎爆去我反而無咁在意劇情。
同期有《大老作家》，我覺得好睇過佢無限倍，生命有限，遠離白痴！